اخيرا غيرت الكاوتش

**M.Nasr** · 10-10-2010 11:56 AM

الحمد لله واخيرا غيرت الكاوتش بتاع العربية بعد ماعملت به 68 الف كم والعيوب اللى كانت ابتدت تظهر هى الخبط والرزع الجامد فى المطبات والنقر وبقيت احس ان العفشة نشفت غير صوت الصريخ مع الفرامل و الملفات
اول حاجة سألت عليها هى الفردة اللى جاية فى العربية Bridgestone Turanza ودى بعد مادورت فى السوق لاقيت منها الفرنساوى عامل فى حدود 550 جنيه وفيه منها اليابانى بس نادر جدا بيعمل 620 تقريبا بعد كده سألت على انواع تانية ومعظم النصايح كانت للكورى رودستون او كومهو واستقريت فى الاخر على الرودستون الكورى نقشة الشجرة ودى عاملة 400 Roadstone N2000 195 /60 R15

دى شكل النقشة بتاعت الكاوتش وبصراحة شكلها عجبنى جدا وبتدى احساس انها اعرض من النقشة العادية مع انها نفس المقاس
الملاحاظات بعد التغيير :
السواقة اختلفت جدا وبقت ناعمة على المطبات مابقتش اسمع صوت الرزع والخبط الجامد ده
صوت الصريخ مع الفرامل والملفات اختفى
الفرامل اداءها اتحسن عن الاول
فى حاجة انا مش فاهمها وارجو حد يقولى ليه بحس ان العربية بتحدف منى وانا ماشى بالذات لو فى عالى و واطى فى الطريق بتحدف بشكل ملحوظ هل نقشة الشجرة دى هى كده ولا فى حاجة كان المفروض تتظبط؟ مع العلم ان ساعة التركيب عمل ترصيص وملى نيتروجين
واسف على الاطالة ارجو اكون افدتكم واى سؤال تحت امركم

**rafeee2** · 10-10-2010 01:39 PM

اتأكد من ضغط الهوا
ممكن يكون زيادة

**M.Nasr** · 10-10-2010 02:16 PM

هى مظبوطة نيتروجين على 30

**Ahmed Nouh** · 10-10-2010 02:50 PM

لا النقشة او نوع الكاوتش ميفرقش فى الحدف فى اى ناحية طالما الكاوتش نفسه سليم

بس انت بتقول على عالى وواطى , طبيعى اى عربية تحدف على الوضع ده

زيادة تأكيد اظبط زوايا عند مركز كويس وشوف اذا كانت تماما ولا فيها مشكلة

**أبو إياد** · 10-10-2010 03:36 PM

الف مبروك ياباشا وبالنسبه للحدفه غالبا بتكون عدم ظبط ضغط العجل وزياده للاطمئنان جرب ظبطهم تانى على 28 وشوف الفرق

**M.Nasr** · 10-10-2010 03:52 PM

المشاركة الأصلية كتبت بواسطة ahmed nouh

لا النقشة او نوع الكاوتش ميفرقش فى الحدف فى اى ناحية طالما الكاوتش نفسه سليم

بس انت بتقول على عالى وواطى , طبيعى اى عربية تحدف على الوضع ده

زيادة تأكيد اظبط زوايا عند مركز كويس وشوف اذا كانت تماما ولا فيها مشكلة

كلامك منطقى طبعا بس انا قلت اتأكد بردو ان النقشة مالهاش علاقة بالحدفة
انا كنت مظبط زوايا من فترة قريبة عند بريدجستون فى عباس العقاد بس هو تغيير الكاوتش بيأثر على الزوايا؟