أنا عريس ....وعاوز سيراميك

**ana_3ares** · 25-03-2008 12:35 AM

المشاركة الأصلية كتبت بواسطة m

على فكرة ممكن تشوق للارضيات بورسلين فرز تاني
مش بيبقى فيه عيوب ظاهرة وبيبقى شكله كويس في الارضيات
لكن سيراميك الحمامات و المطابخ والحوائط يستحسن فرز اول

المشكلة عشان تشتري فرز تاني بتبقى محتاج صنايعي نضيف عشان يعرف يداري العيوب وللأسف فالصنايعي ده نادر الوجود ولو لقيتة هتلاقية بيتأخر على ما يسلمك الشقة

**ana_3ares** · 25-03-2008 12:37 AM

المشاركة الأصلية كتبت بواسطة Dr_Smart

ما اانصحش بالبورسلين خليك في السيراميك

الافضل كليوباترا ويليه الجوهرة
ورويال بعدهم

اهم حاجة تختار صنايعي كويس يركبلك والمصنعية في حدود 8 - 10 جنيه للمتر ارضيات

والف مبروك وربنا يتمملك بخير

بص هو أنا لغيت فكرة البوسلين لأن الخصم الي علية قليل لكن السيراميك خصمة عالي

**ana_3ares** · 25-03-2008 12:40 AM

المشاركة الأصلية كتبت بواسطة e_farid

بارك الله لكما وبارك عليكما وجمع بينكما فى خير..

..

بص هو مش بس ربنا جمع بينا في خير هو جمع بينا في الجامعة .وهنكمل لاخر الطريق بس يا رب منلاقيش أخر الطريق لوحة مكتوب عليهاdead end

**ana_3ares** · 25-03-2008 12:46 AM

المشاركة الأصلية كتبت بواسطة onna

يا حرااااااااااام :)

انا بصراحة معرفش موضوع السيراميك دة بيتجاب منين بس كويس موضوعك هيبقي

مفيد جدا لخطيبي يا ريت بقا تعمل سلسلة مواضيع عن السيراميك و الرخام والبورسلين بعدين ممكن باة ندخل على العفش و الدهانات

بجد البنات مش بيتخرب بيتها كدة زى الولاد

ربنا معاااااك

بصي متقلقيش أنا ممكن الاقي خطيبك في أي فرع سيراميك الي لفيت عليهم كلهم.
ههههههههههه

**ana_3ares** · 25-03-2008 12:48 AM

المشاركة الأصلية كتبت بواسطة zeyad1810

الف مبروووووووووووووووووووووو وووووووك وعقبال لما تجوز اولادك
كليوباترا من افضل الانواع وليهم معرض كبير فى الفجالة

بص أنا كفاية عليا أجوز نفسي ,أولادي بأة ممكن أمهم تجوزهم
هههههههههه

**Dr_Smart** · 25-03-2008 12:51 AM

معلش يا بيشو xpert اني ماردتش بسرعه

فيه ناس كتير ردوا قالولك ان السيراميك برد وزحاليق ... فعلا عندهم حق

مابالك بقى بالبورسلين ناااعم جدا ممكن تبقى تلعب عليه Skating :)

**ana_3ares** · 25-03-2008 12:54 AM

المشاركة الأصلية كتبت بواسطة noni67

مبروك مبروك مبروك
كلكم بتباركوا له على ايه
يا ابنى انت صعبان عليا صدقنى
اخلع
لو خايف تطلع عيل ادامهم ولا يهمك
اطلع عيل يوم تعيش راجل طول عمرك
جواز اية وقرف ايه يا عم عيش لك اليومين الحلوين دول
اما موضوع السيراميك فعن تجربة بلاش ابوس رجلك
تلج يا بوى فى الشتا وزحاليق فى الصيف
انا عملت شقتى كلها سيراميك جامبوا المتر بالشىء الفولانى وحياتك انت 180 متر سيراميك قطموا وسطى
وبعد سنة واحده لصقت عليهم باركية المانى وارتحت من 3 سنين يااااااااااااااااااااه لا تتخيل الراحه
شيىء ولا الخيال فى التنظيف والمنظر والنظافة والشياكة
انما سيراميك يغور
وطلع كمان الباركية ارخص منه

صدقني أنا مش عاوز أتجوز بس للأسف بحبها وخايف ملاقيش واحدة أحبها تاني,
بص هو السيراميك لة ميزة جامدة وهو أن أمي تعاير حماتي أن الشقة كلها سيراميك
ههههههههههه
بس والله فكرة وهعمل الصالة كلها باركية

**ana_3ares** · 25-03-2008 01:01 AM

المشاركة الأصلية كتبت بواسطة aif

السيراميك بيديك شعور رهيب بانك في مستوقد فول أثناء الصيف ... وفي ثلاجة موز أثناء الشتاء
علي الاقل غرف النوم خليها خشب احسن وممكن تخلي الريسبشنات بقي حسب الظروف والاذواق والأهم ..... رأي المدام

فول وموز ,أنت كنت بتفسح الأولاد في حديقة الحيوان؟ولا اية؟
هههههههههد
وكمان بلاش كلمة مدام خالص بكرها موت,ممكن تقول ولية,الولية راحت والولية جت
هههههههههههههه

**ana_3ares** · 25-03-2008 01:16 AM

يا جماعة الخصومات هتخلص28/3 وهي موجودة في جميع فروع سيراميكا كليوباتارا والسلاب وهي ليست 40% بل 30%+10% على السيراميك و 10%+5%على البوسلين.
الخدعة:أنك عشان تتمتع بالخصم دة لازم تدفع الفلوس كاملة قبل 28/3مش مقدم بس.
خلي بالك:معرض القاهرة جناح كليوباترا فية موديلات جديدة2008 مش هتلاقيها في حتة تانية بس للأسف استلامها بعد شهرين.

**tmz9111** · 25-03-2008 02:05 PM

الف مبروك ورنبا يوفقك
كليوباترا
المصنعية فى حدود
سفل 1.5 إلى 3.5 للمتر
حوائط 7 إلى 11 للمتر
الارضيات 7 إلى 9
الوزرات على حسب الصنايعى ممكن تتحسب من ضمن مقاس الحوائط أو يحسبها منفصلة