الموضوع: ايه أخبار الايفو معاكم؟

المشاركة الأصلية كتبت بواسطة amrseba

انت قول ايه اخبارها معاك و حاول تقول الفرق بينها و بين العربيات الى ركبتها و هل هيا افضل ولا

بصراحة...العربية الحمد لله افضل مما توقعت! و رغم اني قرأت عنها شهور قبل ما اشتريها بس لاقيت فيها حاجات ماكنتش اعرفها..يعني انا لسه واخد بالي امبارح ان الجراند بونتو مفيهاش corner light اللي موجود في الايفو...و ده فانوس بينور في اتجاه دوران الدركسيون...يعني لو كسرت يمين ينور الفانوس اليمين و ده بيعمل مجال اضاءة واسع عمر ما الفوانيس الامامية تقدر توفره لوحدها.... و طبعا البلو اند مي و ال voice control حكاية...العربية كده تحس انها معمولة عشان تخليك تستمتع بالقيادة و تسهل عليك حياتك...لدرجة اني بقيت باتلكك و اخترع اي مشوار عشان اركب العربية

بعد حوالي اسبوعين استخدام احب اضيف نقطتين
اولا: عندي احساس ان الموتور احسن شوية...زي ما يكون فتح مع الاستخدام و السحب احسن من اول يوم استلمتها...و برده احب اطمن اي واحد ناوي يشتريها العربية سحبها احسن من سبيرانزا 1600 و لانوس 1500 و كيا ريو 1300 (و دي العربيات اللي كانت عندي قبل كده)....و في عضو قال قبل كده انها زي اللانسر 1300 (انا ماجربتش اللانسر)...يعني السحب كويس و مرضي جدا للناس العادية...لكن اللي بينزل الشارع و عايز يشد و يسابق في طوب الارض يبقي ممكن يستني لما ينزلوا ايفو تربو او مالتي اير....او يشتري فيرنا و يوفر 30 الف جنيه

ثانيا: عفشة العربية ناعمة و ممتازة جدا...و الحكاية دي ماكنتش واخد بالي قوي منها في الاول...يعني طبعا العربية انعم و احسن من السبيرانزا في المطبات و الحفر بس كنت متخيل ان برده ده بيرجع لاني كنت بافتري علي السبيرانزا (عشان كنت بأكرهها) لكن الايفو انا باحسس عليها...لحد امبارح وانا ماشي في طريق الواحات...و طبعا انا حافظ الطريق ده لاني ساكن هناك و عارف كل مطب و حفرة و كسر في الاسفلت...كنت سرحان و ماشي بسرعة و مرة واحدة لقيت حفرة صغيرة في الاسفلت بعرض الكاوتش...انا عارفها و اتهبدت فيها 100 مرة بالاسبيرانزا بس كنت سرحان و لبستها تاني...المهم انا لمحتها يادوب قدام العربية و انا ماشي علي 90 و طبعا مفيش وقت افاديها...رحت مغمض عيني و مستني الرزعة اللي ياما خدتها بالاسبيرنزا...و عديت الحفرة و ماحصلش حاجة...مفيش هبد ولا رزع ولا صوت ولا حاجة...يدوب حسيت كأني عديت علي عين قطة...

دي الحاجات اللي لاحظتها عي العربية مؤخرا و تحت امركم في اي استفسار

بالمناسبة العربية فيها امكانية حساب استهلاك الوقود لاي مشوار بتعمله...يعني تطلع من البيت للشغل و تخليها تحسب المشوار ده معدل استهلاك البنزين فيه قد ايه...بس لسه مش عارف اظبطها...محتاج قعده كده علي المانيوال و كوباية شاي

المشاركة الأصلية كتبت بواسطة MNabeih

ما شاء الله,
فيات عاملة شغل عالي اوي في فيات الجديد,
بالنسبة لاستهلاك البنزين في زرار في دراع المساحات بتدوس عليه بيجيب علي الشاشة اللي في التابلوة متوسط الاستهلاك و الاستهلاك اللحظي(دة جميل بيخليك تتحكم في دوستك للبنزين يدوبك علي اد سرعتك) و رانج الكيلو متر اللي البنزين اللي في العربية يكفيك تمشي بية.
دة اللي عندي في اللينيا و اظن هو هو.

انا عندى سؤال بقى فى الحتة دى،
انا كنت متابع العربية بقالى مدة (الاستهلاك اللحظى) و انا بسوق فكنت عارف رنجات للاستهلاك اللحظى لتقريب كل النقلات..
بس انا طولت شوية فى الصيانة بتاعة ال20 الف ، او عملتها على اجزاء
يعنى زيت الموتور و الفلتر غيرته على 21 الف تقريبا او قبل ال21 بحاجة قليلة..
و فلتر البنزين و فلتر الهوا غيرتهم على اواخر ال21 الف..
انا قبل ما اغير فلتر الهوا و فلتر البنزين حسيت ان الاستهلاك اللحظى بقى اقل من الارقام اللى كنت بشوفها قبل كدة..
فرحت غيرتهم و حسيت ان الاستهلاك رجع قريب من الاول تانى .. بس بردو لسة اقل شوية (كل دة على الاستهلاك اللحظى)
و بعد كدة اعدت كذا يوم احسب الاستهلاك المتوسط كل اما اروح و ارجع من الكلية و كان بيبقى مظبوط اوى .. يعنى الكلية كان الاستهلاك لو الطريق ماشى كويس كان بيبقى حوالى 19 كيلو للتر لحد 17 كيلو للتر..
بعد كدة حسيت ان الدركسيون بقى تقيل شوية (كنت مظبط الكاوتش قبلها على 30 بحوالى 3 او 4 اسابيع) ، و فى نفس الوقت بقيت بحس ان العربية بتترج شوية لما بطلع على الاول من غير بنزين مع تقل الدركسيون و لما بفرمل (فرملة عادية مش قوية) الكاوتش بيعمل صوت كأنى بفرمل فرملة جامدة.. المهم، بعدها رحت ظبطت الكاوتش كله على 32 بس الواد و هو بيظبط الكاوتش قال لى الكاوتشة اللى ادام يمين دة ضغطها 15! بس انا مش مصدقه بصراحة لأن شكلها ميدييش خالص 15، شكلها مثلا شبه الكاوتشة التانية ادام و هو قاسها بعدها قال لى بتاع 28، 15 دى المفروض يبقى شكلها نايمة جامد
المهم، من بعدها و انا حاسس ان استهلاك العربية اللحظى دة بقى اقل كتير من اللى كنت بشوفه قبل كدة ..
يعنى مثلا الخامس كان لو الrpm على 2000 مثلا، كان بيبقى جايب بتاع 21 -18 كيلو للتر.. دلوقتى بيبقى مطلعلى بتاع 11 كيلو للتر! لكن فى نفس الوقت الاستهلاك المتوسط قريب من القديم
انا على فكرة ساعة اما زودت الكاوتش فولت التانك.. فهل ممكن يكون البنزين اللى حطيته مش نضيف؟ 92 هو..
هل ممكن يكون انى طولت شوية على تغيير الحاجات اللى المفروض تتغير (فلتر الهوا و البنزين) يكون اثر على استهلاك البنزين حتى بعد اما غيرتهم؟!
هل ضغط الكاوتش ممكن يأثر على الاستهلاك؟ او ممكن يكون الاستهلاك سليم بس عشان معلى الضغط عن الطبيعى شوية يطلع قرايات غلط؟
انا مش عارف بصراحة سبب المشكلة دى ايه !
حد يدينى رأيه بقى فى المشكلة دى :)
اخر حاجة، لما بحسب كمية البنزين اللى استخدمتها فى المشوار بتاع الكلية بيطلع تقريب مفيش فرق عن قبل كدة..

و الله يا وائل لسة التوكيل مدوخني علي الالوان و الاستلام,لدرجه اني بدات افكر اغير النوع خالص و اجيب حاجة جاهزة,واخد قرار بيني و بين نفسي لو ما استلمتش خلال الاسبوع اللي جاي حلغي الحجز,اسلوب المملطله ده سخيف اووووووووووووووووووووووي,� �ل اللي عمال ييجيpk1 بس,انا زهقت لدرجة اني مختار 4 الوان عشان انجز