السلام عليكم
كيف اعرف ان ديسك و اسطوانة الدبرياج بداوا فى مرحلة التلف او التآكل ؟؟
و ما هى الاشياء التى من الممكن ان تتلفهم ؟!!
عرض للطباعة
السلام عليكم
كيف اعرف ان ديسك و اسطوانة الدبرياج بداوا فى مرحلة التلف او التآكل ؟؟
و ما هى الاشياء التى من الممكن ان تتلفهم ؟!!
أول حاجة بتلاحظها أن سحب العربية قل ومبقاش زى الأول, وخاصة على المطالع بتحس أن صوت الموتور بيعلى بس العربية ماشية بالراحة, وفى الحالات المتقدمة ممكن لو طالع مطلع تلاقى العربية بتتزحلق لورا رغم أنك جايب أول ودايس بنزين:).
بتحصل حاجة أسمها slipping يعنى الدبرياج أو الأسطوانة مابتمسكش كويس, يعنى لو طالع مطلع أو بتجرى بسرعة, بتلاقى صوت الموتور على مرة واحدة والعربية مابتسحبش, وتدوس بنزين زيادة صوت الموتور يعلى والعربية ماشية عادى رغم أنك سايب دبرياج.
بالأضافة الى أن الدبرياج بينزل لتحت ومستوى الدواسة بينخفض بصورة ملحوظة عن الأول.
وأختبار بسيط, هات الرابع بالعربية وهى واقفة, وحاول تطلع بيها, لو طلعت من غير ماتبطل, يبقى العربية الأسطوانة بتاعتها ضعيفة, لأنها لو كانت مسكت كويس كانت العربية هتبطل, بس ده أختبار على الهوا لأن ممكن تطلع بالعربية على الرابع فعلا من غير ماتبطل والأسطوانة سليمة.
واللى بيبوظ الأسطوانة هو الجرى بالعربية عمال على بطال, القيادة العنيفة, والأمركة وأنك تسيب الدبرياج مرة واحدة مش بسلاسة.
وهى عامة بتتغير بعد ال 50000 كيلو, وحسب أسلوب القيادة ممكن تتغير على ال 30000 أو ال 80000 أو أكثر لو العربية مابتمشميش الا قليل.
وشئ أخر, الأسطوانة زى تيل الفرامل بالظبط غرضها توفير الأحتكاك, وهى عاجلا أو أجلا هتحتاج تغيير زى تيل الفرامل بالظبط لأن المادة اللى عليها بتبدأ تتأكل.
وتكلفة التغيير بتتراوح من 150 الى 200 جنيه حسب الميكانيكى, والديسك والأسطوانة تمنهم حسب نوع العربية
طب ازاى اغيرهم بنفسى فى الماروتى
ولو مثلا هغير الاسطوانه فقط
اعمل ايه او ابدأ باية و احل ايه الاول
صعب جدا انك تغيرهم بنفسك روح لميكانكي كويس وهات الحجات وخلية يركبهوملك ومصنعيه تكريبهم مش غاليه
لأ ياباشا دى حاجة شبه مستحيلة, وعايزة عدة ميكانيكا كاملة, وخبرة كبيرة, وصبر الأبل علشان تحل الفتيس بس:)
ده أنت هترفع العربية وتنام تحتها, بعد أما تفك البطارية وقاعدتها وشوية حاجات تانية من حوض الموتور علشان توصل للفتيس من فوق, وتقعد تفك فى الفتيس شوية من تحت وشوية من فوق لغاية مايقع. وهتبقى حاطط تحتيه كوريك تانى طبعا علشان ميقعش على الأرض, وتطلعه من تحت العربية, وتغير الديسك والأسطونة, غير أن زيت الفتيس هينزل, ده اللى أفتكرته, الموضوع أكبر من كده كمان.
الميكانيكى قعد بالعربية يوم فك وتركيب, الموضوع مش سهل, أمال هو بياخد الفلوس دى على قلبه ليه؟
اما العربيه سحبها يقل
وفى المطالع تلاقيها ماشيه بالعافيه وصوت الماتور عالى
اسباب تلفهم
بيعتمد على نوعية السواقه
اما تكون رجلك ع الدبرياج دايمآ على الفاضى والمليان
واما تتحرك بالعربيه وتفضل مريح على الدبرياج وتدوس بنزين زياده يخليك تسمع صوت الماتور
والفرك بالعربيه والخمسات والامركه واللذى منه
وما بين كل نقله والتانيه رجلك على الدبرياج مده كبيره
واشارات مرور وطريق مزدحم كل شويه امشى واقف وتفضل مدى الغيار الاول ودايس دبرياج ومستعد للطلوع
ساعات بتبقى طلعات عنيفه تسمعك اصوات المواتير
والوقوف على المطالع بطريقه الدبرياج والبنزين
كل ده غلط على الاسطوانه
ودى الحاجات اللى فى بالى حاليآ وطبعآ فى اسباب تانيه
انا شاكر لكل الناس الافاضل الى افادونى بالكثير من المعلومات الجديدة بالنسبة لى
عربيتى كان بقالها فترة مش بتسحب زى الأول و خاصة على الغيار الرابع , و من كام يوم كدة حسيت بحشرجة فى ضغطتى على الدبرياج و راحت بعد شوية ,
لقيت عربية عطلانة على الطريق فشدتها , و بعد ما سبتها بحوالى 10 كم , فصلت الفتيس عشان اخد مطب , و بعد كدة الفتيس مرضيش ياخد نقلات تانى
و بدون ذكر تفاصيل كتير , لما فكينا الديسك و الاسكوانة لقينا البلية مكسورة و الاسطوانة مكسورة كمان
النهاردة انا كنت مع الميكانيكى طول النهار بنحاول نركب الفتيس تانى , و لسا مخلصناش , حنكمل بكرة ان شاء الله و يارب نخلص
طيب بمناسبة الكلام عن الدبرياج
طبعا عرفنا ان تحميل الرجل على الدواسة غلط جدا وهو اللى بيسبب المشاكل
والفرك والامركة غلط لأنه بيحط حمل مفاجئ على الاسطوانة
وجر عربية تانية بيساهم برضه عشان الحمل الكبير بيخلى الاسطوانة عايزة تفلت من الدسك وتفوت بسرعة
يعنى دلوقتى في 3 مواقف :
1 : من غير ما ادوس دبرياج خالص والعربية ماشية : في الحالة دى الديسك والاسطوانة كأنهم حتة واحدة بس لو الحمل شديد بيأثر على الاسطوانة
2 : محمل على الدواسة ، او دايس الدواسة لنص مشوارها : يسهل انتقال الحركة من الموتور للفتيس في الطلعة عن طريق الانزلاق بين الديسك والاسطوانة ، وطبعا تحميل الرجل على الدواسة بدون داعى والعربية ماشية بيخلى الديسك ينزلق على الاسطوانة ويعمل احتكاك جامد خصوصا مع السرعات العالية يسرع بتلف الاسطوانة
3 : دايس الدواسة للأخر ، المفروض الحالة دى فصل كامل للحركة يعنى الاسطوانة بعيدة تمااما عن الديسك ومنطقيا في الحالة دى مفيش تأثير على الاسطوانة ، يعنى لو واقف في اشارة مثلا ودايس دبرياج على الاخر ومدي الغيار الاول ، المفروض حسب مانا فاهم الدبرياج ميتأثرش بالموضوع ده ، صح كدة ولا ايه ، ولا اانا فاهم غلط ؟
الموضوع مفيد جدا شكرا ليكو جميعا
معلومات مفيده شكرا ليكم جميعا
بس اختبار التلف انه نشوف ونقوم العربيه ع الرابع دا مش فاهمه
يعني لو العربيه قامت ع الرابع ومبطلتش يبقى الديسك وحش ؟؟!!
أنا ذكرت أنه مش أختبار نهائى, هو بيعتمد على أن لو الأسطوانة كانت حالتها حلوة ومسكت كويس, وأنت مدى الرابع وعايز تطلع بالعربية, الرابع كتير جدا على الموتور أنه يطلع بالعربية من الثبات وبالتالى العربية هتبطل.
أما لو الأسطوانة وحشة وبتفوت, لما تيجى تطلع وأنت جايب الرابع, هتفوت ومش هتوصل الموتور بالفتيس كويس, وبالتالى الموتور مش هيبطل لأنه مش متوصل بالعجل تماما.
شكرا ياباشا
أنا كنت مرة راكب تاكسى لانوس و برضه جه فى اشارة فضل دابي على الدبرياج للاخر فسألته ده مش غلط على الاسطوانة .. فقال لى لأ عشان أنا دايس للاخر.
لأ اعتقد انه غلط انى افضل دايس على الدبرياج مده طويلة لأن ده ممكن بيوظ الاسطوانة واللى اعرفه ان الدبرياج ده اصلا معمول عشان نقلات الفتيس وبس
معلومات مفيده جداااااااااااااا
يستحسن استخدام الدبرياج فى اضيق الحدود فى النقل بس وموضوع الضغط للاخر فى الاشارات ده غلط برده الاحسن تمور العربية وتنسى الدبرياج
انا مرة كنت راكن السيارة لمدة ساعة كده و بعدين دورت و انا بجيب الاول لقيت بدال الدبرياش ناشف اوي غير المعتاد المهم مورت و العربية دايرة و دست علي الدبرياش عدة مرات و را بعض و الموضوع بقي تمام زي الاول هل كده دي اعراض بداية تلف في الاسطوانة و لا لأ؟ بصراحة الموضوع ده مقلق جدا لان اللانوس اللي كانت معايا الاول جابت اسطوانة و هي دايرة و راكن بيها علي جنب كنت بشتري حاجة و من ساعتها متعقد من موضوع الاسطوانة ده ارجو الافادة
موضوع جميل و مفيد، شكـــــــراُ
أهلا بالاخ الفاضل أحمد
الاخوةى الافاضل شرحوا ووفوا من اهم علامات بدايات تلف الاسطوانة هو ثقل النقلة يعني عندا تدوس دبرياج لكي تنقل من التاني الى الثالث أو الرابع الخ تجد نفسك تنقل الغيار بصعوبة و تجد نفسك مضطر لضغط دواسة الدبرياج حتى أقصى نهاية ليها و برضه تجد صعوبة في الغيار كما تجد أن السحب ضعيف في النقلة الاولى و في المارشايير أيضا .
أحيانا بيتم تغيير الطقم كله دسيك و اسطوانة و بلي و فرش لكن عادة بيتم تغيير الاسطوانة مع الفرش و البلي
شكرا لكل من ساهم و أفادنا
كويس ياجماعة انكم فتحتم الموضوع ده لان حصل معايا موقف غريب
كنت راكن العربية ومكنش فيها اى مشكلة وتانى يوم ركبتها و سخنت الموتور وجيت اطلع !! انسى انها تاخد اى غيار زى ما يكون اسكة الغيارات مقفولة ابطل العربية واجيب الغيارت تمام اشغلها واجيب اول ميجيش اجيب مارش اسمع صوت زعيق التروس ...
المهم جبت ميكانيكى على قده حاول يدورها وهى معشقة على الاول نتشت طبعا بس حاول مرة و احدة بس والوضع كما هو
وحاول يعلى الدبرياج لحد معلاه على الاخر وبعدين قال : (انا جبت الدربياج على الاخر !! كده بقى يبقى ديسك او اسطوانة)
الكلام ده كان بالليل وتانى يوم الصبح كنت هقطرها على ميكانيكى تانى ولما دورت العربية وسخنت جربت ادييها الاول كان مزرجن جربت تانى لاقيتو زى الحلاوة بينى و بينكم ماصدقت احسن ما اقطرها
وانا ماشى قلت اديها الغيار التانى لاقيتو تمام والثالت تمام وكأن مفيش حاجة حصلت
المهم وصلت للميكانيكى وافاد بالتالى:( عادى بتحصل حتى فى العربيات الجديدة المركونة فى المنطقة الحرة .. بتبقى الاسطوانة لاصقة مع الديسك و بتبقى مش قابلة اى غيار ولحل المشكلة دى وبتاخد تعشيقة على الاول او مارشدير ويتم تدوير الموتور بحرص فالعربية تنتش وتسمع صوت تكة وبكده تبقى الاسطوانة فكت عن الديسك و الغيارات تيجى فى مكانها عادى
الموضوع ده اتكرر معايا مرتين
وفى المرتين كانت العربية مركونة وقت طويل يوم او يومين
مع العلم بان سحب العربية ماشاء الله ومفيش اى اعراض من المذكورة اعلاه عن تلف الاسطوانة او الديسك
ايه رأى السادة الخبراء فى الموضوع ده؟؟
نسيت اقول لكم بان العربية نصر 128 موديل 85
خالص الشكر للسادة الاعضاء وربنا ميحرمناش منكم
تلاقى سحب العربية فى المطالع مش زى الاول تلاقى لقط الدبرياج والفصل مش على طول مع النقلات صوت الماتور بيعلى شوية
كلام جميل ومقنع وزى الفل
طيب لو انا فى المطلع ومعايا ناس فى العربية وانا طالع وفى نصف المطلع اللاقى العربية تسقف ومش عيزة تطلع
هل ده ليه علاقة بمجموعة الدبرياج ولا العربية عيزة شمبر لاحكام الكبس
مع العلم ان انا عشان انقل اى غيار لازم اضغط للآخر عشان انقل من غير رزعة فى النقلة
شكرا ليك باشا
متابع باهتمام
و شكرا للاعضاء
و ربنا يحفظ سياراتنا جميعا
انا عربيتي ماشيه 211 الف ومغيرتش اسطوانه حتي الان بس حاسس انها محتاجه بس من لما شفت عربيه تانيه كانت فعلا عايزه اسطوانه اقدر اقول ان عربيتي مش عايزه خالص
التانيه كنت تدوس بنزين صوت العربيه يعلي قوي قوي وبعدين تبتدي تتحرك انا عندي اول ماادوس العربيه بتنط وبصراحه مستخصر اغيرها وهي لسه مجبتش اخرها
لو سمحتم يا جماعة
انا عندى سؤال اهبل معلش
هى العربية الاتوماتيك فيها اسطوانة و ديسك بردو ؟
موضوع هايل
شكرا لكل الناس المشاركه
موضوع هايل وانا استفدت منه خصوصا انى لسه جديد فى السواقه ورجلى ثقيله على الدبرياج بس المهم انا عايز اضيف حاجه لوانت واقف فى اشاره او زحمه هطول شويه مور وارفع رجلك من على البرياج وممكن تدوس فرامل علشان العربيه متريحش ولو ثابته يبقى متدوس على الفرامل ده من الاسباب اللى يقلل من استهلاك الاسطوانه والله العلم
شكرا للموضوع المهم ده
عندي سؤال يعني ايه صوت الموتور هل يعني ذلك ان ال rpm يعلي لكن سحب السيارة يظل ضعيف؟
انا عندي مشكلة في السحب من شهور محدش حلها و انا زهقت من الفتي حتي في التوكيل .. العربية علي المطالع غالبا بتبقي تقيلة و ابقي دايس بنزين للاخر و مش بحس باثر له ... كمان من غير مطالع ممكن ادوس بنزين للاخر و تاخد وقت لحد ما تجري مع العلم اني غيرت فلتر البنزين و فلتر الهوا و نضقت البوابة و نضفت الرشاشات بجهاز الضغط و غيرت طرمبة البنزين (مفيش اصلا تاخير في الدوارة)