الموضوع: ممكن نعرف كل حاجه عن e200

السلام عليكم
بص يا باشا الe200 دي بدات من اول العيون شايسه W210 قلي هيا من سنة 95 ل 2002 و كمان قلي بعدها شاسيه w211 من2002 لحد 2009
فبل كده كنت مرسيدس ماكنتش بتكتب الE -class
دي صوره ال e200 الW210

و دي صوره الW211

اما الزلمكه شاسيه رقم W124 الزلمكه في منها كربراتير و انجكشن الكرابيراتير اسمها 200 اما الانجكشن 200e مش E200
والابشن فيها كتير ازاز كهربا و اتوماتك و ايرباج و فرامل ABS و كراسي و ستاير كهربا و نظام ال4matic من 86 و traction control حاجات كتير
بس الزلمكه مش واخده حقها عشان الاوبشن طبعا عشان هيا عربيه جميله جدا و مصنوع بجوده و بخامات عاليا جدا دي حتي كانت موجود باوبشن مواتير قدره تحملها لحد مليون كليومتر من غير عمره و طلبات الحجز علي الزلمكة في التمانيات كانت لمدة 11 لقدام فتخيل حضرتك جوده العربيه
و كمان دي من التمانيات يعني احسن فتره في تاريخ المرسيدس لانهم كانوا بيصرفوا علي ابحاث تطوير الموديلات مبالغ خاليه بتوصل ل600 مليون دولار لتطوير موديل واحد و بالتالي الجوده عاليه جدا جدا جدا
اما في منتصف التسعينات فاضطرت مرسيدس تقلل جودة الخامات عشان ازمه ماديه و فرق السعر بين السيارت المنافسه زي ال بي ام و الاكورا اليابانيه و في التمانيات مرسيدس كان اول العربيات من حيث الجودة وارضاء العملاء في العالم و دلوقتي مركزها التالت
و الدليل ان الناس بتقول ان البي ام الe39 افضل من العيون الW210 اما استحاله تلاقي حد بيقول البي ام الe34 احسن من الزلمكه و لو لقيت يبقي متعصب
الزلمكه في منها سيدان و كوبيه واستاشن و كابورليه و مواتير ديزل و بنزين من اول 2000سي سي لحد 5000سي سي
و الموديل ملهوش علاقة بالاوبشن
اسف علي الاطاله و ارجو اكون افدتك

بص يا باشا دي ارقام الشاسيه للموديل كله يعني الزلمكه رقمها 124 و عشان يبقي الموديل معروف وعشان قطع الغيار و الرقم بيبقي مدقوق علي الشاسيه لان مش معقول يقولو 200 او 230 عشان في 200 كتير ف المصريين اخترعوا الاسماء زي الخنزيرة و الحاجات دي
و عاما 200 دي يعني رقم السعة بتاع المحرك يعني ال200 2000سي سي و ال230 2300سي سي و هكذا
و انا حقول لحضرتك قلي عرفوا من اسماء

دي W114/115 بيسموها الخنزيرة و ناس بيقولوا عليها الشمامه من سنه 68 ل76 عربيه محترمه جدا جدا و قعدت معاتا 40 سنه بعمره واحد و كانت اول عريبه ليا و انا بحبها جدا جدا و مبيعاتها كانت مليون 900 الف وحدة
متاحه من 2000سي سي ل 3000 سي سي و منها في منها انجكشن

و دي الW123 في ناس بتقول عليها تمساحة و معدله و عرجة و انا بفضل رقم الشاسيه و اكيد حضرتك عارفها لانها محبوبه جدا و جميله اووي من سنه76 ل85 و مبيعات العربيه 2.8 مليون وحدة و اعلي مبيعات في تاريخ الشركه الي الان
متاح من 2000 سي سي ل 3000 سي سي انجكشن و كرابيراتر و في منها فيه ABS

دي الW124 و بيسموها الزلمكه و دي حضرتك عارفها
كل دول E-class و E اختصار ل ُExecutive
نشوف بقي الS-Class و دي اختصار Special و دي اعلي فئة في المرسيدس و اعلي تكنولوجيا و الافخم و الاكتر راحة و بتاعت الروساء و الامراء و المصفحة و الليموزين و الكلام دا

دي الW116 من 71 ل80 كانت اول اس كلاس رسميه و لاحظ ان فيها شبه من ال123 بس ادي اطول و اعرض و مواتير اكبر و افخم كان في منها موديل واحد كرابيراتير و الباقي انجكشن و اول عربيه اخترعوا فيها ABS للاربع عجلات
متاحه ب محركات من 2800سي سي ل 6900 سي سي و شاسيه قصير و طويل يعني ال450SE شاسيه قصير و ال450SEL شاسيه طويل لان حرف L يعني Long wheel base
و طبعا ال450SEL 6.9 دي كانت اسطوره السبعينات السبب محركها الجبار 8 سلندر 6900 289 حصان من صفر ل 100 كم في 7.5 ثانيه و العفشه الهيدروليك اللي بتوطي العربيه بعد 100كم/س و الفرامل الABS كانت اسرع حتي من البورش ال911 في الوقت دا
الحمد لله انا ليا الشرف ان انا سوقتها مره و معايا دلوقتي 350SE و انشاء في المستقبل 6.9

دي الW126 في ناس بيقولي عليها تمساحة و دي من 79 ل 90 و اكتر مبيعات في الاس كلاس الي الان و دي اول عربيه اخترعوا فيها الايرباج و فيها اوبشن كتير اوووووي اووووووووي اووووووووووي دي كان فيها كراسي كهربا بذاكره و كاسيت سي دي و عربيه عمليه و تحفه مش حيتعمل زيها دلوقتي
متاح بمحركات من 2800 سي سي ل 5600 سي سي شاسيه طويل و قصير

دي الW140 بيسموها الشبح من90 ل99 دي بردو جميله جدا جدا جدا جدا جدا و فيها اوبشن عالي اوي و عوامل امان عاليا جدا
متاح بمحركات من 2800سي سي ل6000سي سي شاسيه طويل و قصير

دي الW220 بيسموها الفياجرا بس الاسم دا في الخليج علي ما اظن المهم كانت من 99 ل 2006 اول عربيه فيا نظام الPre safe
و الاضاءة الLED و طبعا زادت عومل الامان و كان فيها 10 ايرباج و العفشة ال(Airmatic) و اوبشن بطريقة غريبه و في منها بيدور بالبصمه و قلي بتتفتح بكارت و مفتاحها مبيطلعش عليه نسخ
متاحه بمحركات من 2800 سي سي ل 6000.
كل الموديلات دي متوفره بمحركات ديزل و بنزين و مانيوال و اتوماتك و اولهم الخنزيره بس الاس من اول الشبح اتوماتك
ارجو اني اكون و ضحت لحضرتك نبذة عن موديلات الشركه العريقه و في موديلات لم اذكرها
و عايز اقول لحضرتك حاجة ان المرسيدس تختلف عن اي عربيه و عشان تعرف الفرق لازم تسوقها بنفسك و متستغربش انك تلاقي موديل قديم و مرغوب لان المرسيدس سابقا زمانها و اكيد حضرتك لاحظت من الكلام
و اسف علي الاطاله و ارجو اكون افادت حضرتك .......

العفو يا باشا

معلومات قيمة وجميلة خصوصا للميح اللي زي في المرسيدس عشان كمان هي تقسيمتها معقده بس مش مستحيلة خصوصا لما الواحد يفهم من حد فاهم الله ينور ورجاء ياجماعة نعمل تقييم للموضوع من 5 نجوم عشان يثبت عشان موضوع مفيد بجد اشكر اللي سال وشكر الاستاذ اللي جاوب بجد كفيت ووفيت
بس حضرتك ماعندكش خلفيه عن المواتير اللي نازه مصر في مودلات التمساحه والخنزيره والزلموكه