الايفو خدت عين بعد نص ساعه من خروجها من المعرض :(

**yoko** · 05-12-2010 12:25 AM

المشاركة الأصلية كتبت بواسطة kareemz

الف مبروك .. مع انى مش مقتنع باللى قاله لك.

وأنا كمان مش مقتنع عشان كده قلتلة يطلع على التوكيل خصوصا إن الديول لوجيك مانيوال مش
اوتو

**wael17** · 05-12-2010 07:39 AM

الف مبرووووك علي الاستلام و الحمدلله انها عدت علي خير.....لازم تطلع علي التوكيل و تشيك علي العربية و ربنا يستر

**wael17** · 05-12-2010 07:46 AM

المشاركة الأصلية كتبت بواسطة sweetvolcanoo

الف مبروك يا معلم,بس لازم تعرف اللى حصل ده سببه ايه و تطمنا,و بالمناسبة الحوار ده كله كلفك اد ايه فلوس(الترخيص كله),و الحمد لله انها جت علي اد كده

بالنسبة للترخيص....
المصاريف كالاتي:
777 جنيه ضربية 3 سنين
60 جنيه وصل تاني مع الضريبة مش فاكر بتاع ايه
120 جنيه طفاية
70 جنيه مثلث و شنطة اسعاف (اجباري لان الوصل لازم يكون موجود في ملف العربية عشان الرخصة تطلع)
320 جنيه تأمين اجباري
40 جنيه ورق الفحص
50 جنيه ورق و ملف و دمغات وطابع شرطة و استمارات (كان في باقي بس الموظف علي الشباك ابتسم ابتسامة صفراء و انا طنشت عشان مايعطلنيش)
5 جنيه للواد اللي بيركب النمر عشان مايحطهاش معوجة
30 جنيه ميكانيكي عشان يفك الغطاء بتاع الموتور!!!!( هاقولها بالتفصيل...عشان مهمة قوي)
-----------------------------------
المجموع
1472 جنيه

الحمدلله خلصت في يوم واحد و كنت واقف قدام الخزنة من 8 الصبح ...يعني لو رحت بدري تخلص في نفس اليوم...لو رحت براحتك ممكن قوي تحتاج تروح مرة تانية و طبعا كل مرور له ظروفه...انا باتكلم عن مرور اكتوبر

في نقطة مهمة قوي عايز اقولها للناس اللي رايحة ترخص عشان هاتوفر عليهم فلوس و عطلة بدون داعي

الراجل اللي بيرفع البصمة بتاعت الموتور فضل يدور عليها و مالقهاش و سألني كذا مرة..مش دي فيات امال البصمة مش علي الشمال ليه...قلتله يا عم دور كويس انا مش ناقص تأخير و الناس اللي بعدي عايزين الراجل يسيبني و يروح يرفع البصمة عندهم...و بعد شوية قالي انه مش لاقي البصمة و غالبا هي تحت الغطاء المعدني اللي بيعزل حرارة الموتور عن الكهرباء و المروحة...الغطاء ده مربوط ب 4 مسامير و صامولتين ...طب و الحل...قالي روح عند الميكانيكي علي جنب المرور و خليه يفكلك الغطا ده و سابني و راح يشوف الناس اللي بعدي (كنت رقم 2 و طبعا الدور راح عليا)...طبعا انا قلقت من الكلام ده و رحت مكلم فرع الدقي و سألتهم هو فعلا رقم الموتور تحت الغطا ده قالولي ايوة و فكه سهل و مفيش مشاكل...سبت العربية في المرور و رحت للميكانيكي علي الناصية و قلتله الموضوع قالي بنفكها ب 30 جنيه!!!! 4 مسامير و صامولتين فك و ربط في 5 دقائق ب 30 جنيه...طبعا ده مش تمن الشغلانة...ده تمن ان اليوم مايضيعش عليا...الميكانيكي عارف كويس اني لو حاولت اخد العربية حته تانية و افكها عند اي حد ب 5 جنيه يبقي اليوم ضاع عليا...الحمدلله اشتريت وقتي ب 30 جنيه
القصة دي ضيعتلي حوالي ساعة الا ربع و بالعافية اقنعت الناس تسيبلي الراجل يرفع البصمة لان دوري قبلهم كلهم
نصيحة قبل ماتروح المرور فك الغطا ده...هو بعد مايتفك بيفضل متعلق في الموتور بس بيتحرك علي جنب عشان تكشف الرقم...مفيش ضرر لو فكيته عند اي حد و مشيت بالعربية و هو مفكوك و تربطه بعد ماترخص...عشان توفر وقت و فلوس و كمان ممكن مايكونش فيه ميكانيكي قريب من المرور بتاعك

في نقطة تانية مهمة....لازم كل شوية تفكر هم بالازاز الفاميه عشان ممكن يتنسي و الرخصة تطلع من غير فاميه و طبعا شغلانة انك تصلحها....طبعا المبايعة مكتوب فيها بس لازم تفكر المهندس اللي بيكمل ورق الفحص عشان يكتب علي الورق بتاع الفحص انها فاميه و بعد كده تاكد علي الموظف اللي بيراجع ورقك قبل مايخش الكومبوتر لطباعة الرخصة...الموظف بيكتب بخط كبير ان العربية فاميه عشان اللي بيكتب علي الكومبيوتر ياخد باله

و انا تحت امركم في اي استفسار و بالتوفيق ان شاء الله

**wael17** · 05-12-2010 07:49 AM

المشاركة الأصلية كتبت بواسطة monster245

انا بقى خدت بويه عربيه سوداء ... بس الحمد لله شلتها بأيدي

انا برده خدت بوية بيضاء و الحمدلله شلتها بايدي و ماسابتش اي اثر....يا رب تيجي علي قد كده

**زينة الله** · 05-12-2010 08:32 AM

ألف مبروك و ربنا ينفع بخيرها و يكفيك شرها

و مبروك على الترخيص بس عندى سؤال لو تسمح ؟؟

....لازم كل شوية تفكر هم بالازاز الفاميه عشان ممكن يتنسي و الرخصة تطلع من غير فاميه و طبعا شغلانة انك تصلحها....طبعا المبايعة مكتوب فيها بس لازم تفكر المهندس اللي بيكمل ورق الفحص عشان يكتب علي الورق بتاع الفحص انها فاميه و بعد كده تاكد علي الموظف اللي بيراجع ورقك قبل مايخش الكومبوتر لطباعة الرخصة...الموظف بيكتب بخط كبير ان العربية فاميه عشان اللي بيكتب علي الكومبيوتر ياخد باله

هو الفامية مش ممنوع و عليه غرامة ؟

**azmeralda** · 05-12-2010 08:53 AM

بالنسبة للفاميه طالما العربية نازلة كده من بلدها بيترخص عادى ومحدش يقدر يتكلم طالما فى الرخصة

بالنسبة بقى للى حصل للجميع انا نفسى اسأل سؤال ليه مش كل انسان يكلف خاطره ويقول ما شاء الله ويرحم الناس هيتعب فى ايه الا اذا كان قاصد بقى يطلع الشعاع
وده اصلا اعتراض على حكمة ربنا فى توزيع الأرزاق على خلقه وكل انسان عنده الكويس وعنده الابتلاء برضه بس الناس بترفض تبص للوحش كأنه عمره ما عانى لو ربنا كرمه وعوضه بحاجة فى يوم من الأيام

علام يقتل احدكم اخاه هلا اذا رأيت ما يعجبك بركت

إسلام ويب - عرض الفتوى

**Ghamrawy** · 05-12-2010 10:54 AM

انصحك تطلع على مركز الصيانة و تحكى الموضوع ده و تكشف على العربية و تشوف ايه الموضوع
و فيه نقطة كمان : الفتيس المفروض اساسا ما يوصلش لمرحلة انه يطلع دخان لانه لو انت كنت بتتعامل معاه غلط ( و على فكرة ده عادى فى اول سواقة الدوال لوجيك،انا نفسى مش عارف اتعامل معاه لغاية دلوقتى لان عربيتى فتيس عادة)
كنا بنقول لوا نت اتعاملت معاه غلط حايسخن و حايفصل لوحده و مش حايرضى يدى نقلات و حايدى انذار بارتفاع درجة حرارة الفتيس.
نقطة اخيرة
كنترول الدوال لوجيك ب 12000 (اتناشر الف جنيه ) فى التوكيل
لازم تروح تكشف و تتأكد على سلامة العربية بدل ما اسطوانة الدبرياج تبوظ بسبب عيب موجود اساسا و انت تدفع تمنها على الفاضى و برجعوا يقولوا سوء استخدام