الموضوع: معروض عليا بيتلز وعايز رائيكم ؟

السلام عليكم
قبل ما ارد عليك عايز بس ازجه كلمه لكل الناس اللى بيقولو انها عربية مش كويسة وحقيرة و و و و
لولا اختلاف الازواق لبارت السلع . كل واحد حر في ذوقه . بس مش معنى ان في حاجة مش عاجباك انك تقول عليها حقيرة . انا شايف ان الواحد ممكن يقول الفاظ كتير تانية غير الكلمة دي . معجبتنيش , مارتحتش فيها , مش هي دي العربية اللى انا عايزها . كده يعني لان صعب اوي حد ييجي يقول على عربيتك دي عربية حقيرة .

بالنسبة للعربية بقى اللى انت عايز تشتريها هو سعرها مناسب نوعا ما لان الفلوكس اسعارها في النازل للاسف وده اللى مخليني مش عايز ابيع عربيتي لانها غالية عليا اوي وعشت ابيها احلى ايام حياتي . الموديل مش هايفرق لان كله نفس الشكل .
في حاجة اسمها الرقبة بتاعة العربية ودي بتكون تحت تنك البنزين . لازم تشوف الرقبة وتكون سليمة يعني العربية معملتش حادثة جامدة من قدام ووصلت لغاية الشاسية بتاع العربية . الموتور والعفشة دول مهمين جدا برضه لان موتور الفولكس غالى دلوقتي نسبيا . من الاخر تكون العربية مش متهانة . يعني تحس انها سليمة وواقفة كده .
وانا راي لو لقيت كل شيء كويس اتكل على الله وماتحطش في دماغك موضوع قطع الغيار ولا الميكانيكية . اي عربية مستعملة هاتروح لميكانيكي . والميزة في الفولكس ان اللى بيشتغل فيها مش بيشتغل في عربية تانية . يعني لو شاطر يبقى خبير فولكس بس . وقطعة الغيار بتاعتها الماني وعمرها طويل والعربية حمالة قسية والله . انا كنت بلف بيها القاهرة كلها وعربيتي الحمد لله تاني يد ومكانتش متهانة عشان كده عاشت معايا جوالى 10 سنين اقسم بالله كنت بحط بنزين فقط لا غير . بس هي حاليا مركونة تحت البيت وعليها كوم تراب .
وربنا معاك ان شاء الله

اولا بعتزر يا جماعة ان اللفظ المستخدم بس انا متمسك بالراي العربية مش مريحة
عموما تم انتاج العربية لحد سنة 74 في المانيا و بعد كدة اتوقف و كملت لحد 85 في البرازيل و بعدين لحد 2003 في المكسيك نظرا للطلب عليها هناك و بس
موضوع قطع غيارها الماني طبعا اشك ان فيه قطع غيار الماني ليه في السوق المصري اعتقد ممكن تلاقي برازيلي او مكسيكي
موضوع قطع غيار استيراد معتقدش انها لسة متوفرة زي زمان و ان كانت متوفرة يبقي مش الماني
الاخ صاحب الموضوع نصيحة صغيرة لو ديه اول عربية تقتنيها بلاش تكون عربية قطع غيارها غالية او غريبة في الشغل بتاعها
الرقم بتاعك 7.5 ممكن يجيبلك 127 اتنين باب بحالة معقولة ( عارف انه مفيش مقارنة ) بس انت بـ 1000 جنيه تقدر تجددها لكن نفس الرقم في البيتلز مش هايعملك اي حاجة
يا ريت الاخوة اصحاب العربية يكتبوا بعض اسعار قطع غيارها جديد و استيراد و يكتبوا تمن المصنعيات علشان الراجل يعرف يحكم

شوف 127 إيطالى _هاتعملها 10 الاف_وريح دماغك

المشاركة الأصلية كتبت بواسطة zastaffa

طب هو سؤال واحد بس.....هي الفولكس ليه قلت أوي كده؟؟؟؟ومين اللي سحبها من السوق دفعة واحده كده؟؟؟؟بعد مكانت من سنتين تلاته مغرقه الشوارع وكأن ماسورة أنفجرت وطلعت فلاكس بالهبل!!!!!!!دلوئتي هي ليه بقت قليله اوي ؟؟؟؟؟ماهو أصلي مش معقول كل الناس اللي كانت معاها فولكس باعوها كلهم مرة واحدة

عربيات كتير اوي اختفت على فكرة . 128 و 127 والمازدا 323 وكل العربيات القديمة مش الفولكس بس.
وده عشان العربيات الزيرو بقت في متناول الجميع . ولا ايه ؟؟؟
اناعشان معايا فولكس فعيني بتشوف اي عربية فولكس في الشارع . معظم العربيات مركونة تحت البيوت والتراب عليها بالكوم . كل وقت وليه ادان .
انا عن نفسي لما بركب الفولكس عشان اسخنها مثلا بستغرب ازاي ممكن اركبها تاني في يوم من الايام . لكن مين عارف قدام في ايه . ربنا يكرمنا جميعا ونركب احدث الموديلات دايما .