الموضوع: بتعرف تمشى على الحبل ...... روح مرور السلام طلع رخصتك

السلام عليكم جميعا

أولا أبدأ بالتهنئة على إعادة تشغيل المنتدى بكامل طاقته مع شكر خاص للقائمين عليه وعلى جهدهم الوفير

ثانيا أحب أن أحكى لكم عن مأساتى - قصدى تجربتى - بالأمس فى مرور إللى يروح مايرجعش - قصدى مرور السلام - يااااااااااااااااااااااه بلاد تشيلك وبلاد تحطك ، طوابير طوابير طوابير ، لخبطة ، مافيش تفاهم ، مافيش إستعلام ، مافيش تعاون ، مافيش رحمة ، مافيش دم ، مافيش مافيش
قلة أدب وهرجلة ورخامة وإستغلال وزحام شديد وبشر غريبة اللهم احفظنا
كل الإنطباعات دى آل وكان معايا واحد من هناك بيخلص لى نقل الملكية
أحب أن أقول إن الموضوع خد يومين منهم نص يوم راح فى إستخراج المخالفات - قمة الروتين والعته الإدارى
يعنى يتنده عليك أربع مرات مابين كل مرة والتانية حوالى ساعة إلا ربع وده بس علشان تدفع المخالفات (بدأت رحلة المخالفات الساعة 9 وإنتهت الساعة 12 إلا ربع والله )
باقى الطوابير والشقلباظات المرورية الراجل عملها - طبعا بحكم شغله فى المكان - فى حوالى ساعتين

هبش منى فى الآخر 200 جنيه (طبعا كثير جدا ده غير الفكة يعنى أنا كنت عامل زى نوباتشى الفرح أو عامل زى ما المثل بيقول زى أم العروسة فاضية ومشبوكة بس أنا جيت فى لحظة من اللحظات والله والله والله ساعة المخالفات كنت عاوز رخصتى بس علشان أروح أبيع العربية لاول واحد يطلب يشتريها بجد والله وبدون تهريج)
وما زلت لدى الإحساس المعتم بأن السيارة تتباع أحسن وأسهل للحياة بدون مشاكل
الترخيص طلعته 3 سنين علشان ماشوفش خلقتهم تانى (يمكن الواحد يموت قبل التلات سنين دول ما يخلصو) يبقى مصلحة
رجعت البيت ناقم على كل شىء ومتضايق جدا لولا إنى شفت ولادى بس رجعت لى البهجة مرة تانية
الرخصة طلعت كأنها مولود جديد بيتولد لك بعد عذاب وضيق وإنتظار وجهاد وكفاح والله يا جماعة مش بأبالغ أبدا

لو ميت زحمة وفيه نظام يبقى مافيش مشكلة لكن طول ما الأبواب الخلفية مفتوحة يبقى الفوضى هى سيدة الموقف لتحقيق مصلحة القائمين على المرور والمسئولين فيه .
فى المرور فيه مكان ماحدش بيدخله إلا ذوى الحيثيات الإجتماعية والوساطة يا إما تعرف توصل له يا إما تقف بقى لحد ما تفرقع من الغيظ .
روحت ظهرى واجعنى من الوقفة والشمس هرتنى وفلست والميزانية باظت الله لا يسامحهم

نصائح :
1- إوعى تروح المرور يوم السبت أبدا .
2- حاول تلاقى حد يخلص لك الإجراءات (إلا المخالفات)
3- إذا قمت بنفسك بعملية التجديد أو نقل الملكية إتبع الآتى لتخفيف وطأة الموضوع شوية :
- إعمل حسابك فى أجازة 5 أو 6 أيام وروح المرور بدرى كل يوم علشان تعمل إجراء واحد أو إجراءين حسب طاقتك ووقتك يعنى كل يوم حاجة لغاية ما تخلص الإجراءات كلها وترخص (الكلام ده من خلاصة خبرتى المنيلة وده إللى ناوى أطبقه بمشيئة الله إن كان لينا عمر )


آسف جدا على التطويل بس والله دمى محروق