تغيير بطارية الريموت

**M.Nasr** · 05-12-2010 05:30 PM

السلام عليكم يا احلى منتدى

الموضوع ده عملته عشان كنت فاكر ان تغيير البطارية اصعب من كده طلع بسيط جدا واتمنى يفيدكم

المشكلة ان الريموت ابتدى يخرف لازم ادوس كذا مرة لحد ما يلقط ومابقاش يلقط غير من قريب المهم اكيد العيب من البطارية وسألت تغيير البطارية ازاى لاقيت اللى بيقول لازم التوكيل ولازم جهاز اعادة تشفير وكلام كبير كده . انا غيرت بطارية الريموت بنفسى ودى الطريقة عشان اللى عايز يغيرها

دى صورة الادوات اللى محتاجينها لتغيير البطارية : طقم مفكات رفيعة وبطارية من عند بتاع الساعات نوعها باناسونيك زى اللى كانت راكبة فى الريموت وب15 جنيه.

1- فك المسمار بمفك صليبة رفيع وياريت ماحدش يتعافى على المسمار عشان راسه ماتتاكلش والنقشة تضيع ساعتها هيكون فكه صعب جدا وبعد ما يتفك المسمار تخليه فى مكان ظاهر عشان مايضيعش

2- فصل الجزئين بتوع الريموت عن بعض بمفك عادة رفيع

3- بعد فصل الجزئين نخلى بالنا من جزء صغير اوى لاحسن يقع واعتقد ده بتاع الايموبلايزر لو ضاع العربية مش هتدور

الجزء اللى عالشمال ده هو الريموت وبيطلع بمفك رفيع عادى

4- الجزء الاحمر ده هو الريموت وهو مقفول كبس بيتفتح بمفك عادى رفيع وفى شفة هى اللى بيتحط فيها سن المفك ويتفتح منها

الكاميرا بتاعت الموبيل مش واضحة اوى معلش

ودى صورة بعد مافكيت النصين بتوع الريموت

مهم قبل ماتفك البطارية اتأكد من القطبية يعنى مكان السالب والموجب بتاعها

بعد تركيب البطارية التقفيل سهل وطبعا مراعاة التعامل مع الاجزاء دى بحرص

اعتذر عن الاطالة واتمنى يكون الموضوع افادكم