تقييمي للايفو بونتو (مهم)

**crazylambada** · 06-12-2010 12:58 AM

النهارده الحمد لله رخصت العربيه و سافرت بيها القاهره
مشيت بيها لحد دلوقتي 300 كيلو و ده تقييم مبدائي للعربيه قد يحتمل الصواب والخطأ
المقارنه حتبقى مع عربيتي السكودا فيفوريت و الاوكتافيا a5
مبدائيا انا مسافر بيها على الطريق و خايف جدا بسبب العين لان العربيه لؤلؤه مميز جدا على اللي حواليك و كميه الناس بتوقفك ايه ديه و موديل كام و بكام بشكل غريب مالك العربيه و مثيلاتها مميز
العربيه على الطريق اسوا ما تكون عربيه سيئه جدا ده اللي اكتشفته في الاول بسبب المكنه لكن و انا راجع العربيه فتحت شويه و لما شغلت الكروز كنترول اتاكدت ان المكنه لسه فيها خير مطلعش علشان كده قررت اجل الموضوع عن قوه الماكنه بعد التليين
الثبات العربيه في ثباتها تحفه لدرجه ان بقيت شاكك انها اثبت من الاوكتافيا a5
الاوبشن بتاع العربيه تحفه بلو اند مي و الفوجات في الكورنر مثبت السرعه اكثر من رائع الستارت اند ستوب اللي بحاول اوقفه لما بكون مش محتاجه مش عارف
استهلاك العربيه للبنزين تحفه و طبعا حيبقى اكتر بعد التليين
العربيه فخمه من بره و من جوا الصالون بتاعها للسائق ممتاز
نيجي بقى للسواقه جوا البلد ميت تحيه لفيات عملت سياره مناسبه للاجواء القاهريه مكنه مناسبه جدا للشارع القاهره خاصيه ستارت ان ستوب ممتازه ابعاد العربيه و خصوصا تصميم قوايم الباب علشان المناطق العمياء و الاهم ثباتها الرهيب في الغرز العربيه ناعمه جدا و الرؤيه بتاعتها ممتازه للمناورات
بص بسم الله ما شاء الله العربيه مطابقه للمواصفات المصريه عدا شيئ واحد هكتبه في العيوب
الاضائه تحفه كنت بفكر اجيبلها زينون مش محتاجه
العربيه عاليه عن الارض كويسه برضه
العربيه فيها مميزات كتير و تمنها قليل عليها بسم الله ما شاء الله

نيجي بقى للعيوب

الفتيس بتاع العربيه مش بيعشق كويس اوي لان انا لما باجي اعشق و اطلع بالعربيه عصايه الفتيس بتتحرك سنه
المرايات بحس ان ليها ابعاد خاصه غير ابعاد العربيه يمكن ده احساسي بس بحس ان المرايا بعيده هن جسم العربيه و معرضه للطيران فاهمين قصدي
العب التالت رقم الموتور اضطريت ان انزل تحت العربيه افك العازل الحراري بتاع الشكمان علشان اجيب رقم الموتور حاجه تقرف بجد و هزأت المهندس بتاع طوارئ فيات بالزوق علشان قالي مكانها غلط كنت مكلمه قولتله المكان المظبوط علشان متبقاش تتوه حد معاك تاني يكلمك بس

طبعا الحمد لله العربيه اتخبطت خبطه بسيطه اثناء الفحص وربنا يستر و تبقى على قد كده ان شاء الله اول ما التليين يخلص و ابتدي اجري بالعربيه حشوف اخبار الموتور ايه بالمناسبه انا حطيت في المره الاولى 92 و التانيه 95 محستش بفرق يذكر

**yoko** · 06-12-2010 01:12 AM

مبروك يا باشا وأنا قايلك من الأول إن الموتور ضعيف نسيا بس متحكمش عليه غير بعد أول 5 الاف

**yoko** · 06-12-2010 01:26 AM

المشاركة الأصلية كتبت بواسطة crazylambada

بشمهندس احمد الله يبارك فيك و شكرا فعلا على النصيحه الغاليه المفروض يعملولك نسبه من المبيعات :d
الموتور انت مش متخيل كان عامل ازاي لما استلمتها ماشيه 85 كيلو من المعرض (المسافه ما بين القاهره و الزقازيق)
الموتور حاسس انه بياخد نفسه كل شويا بس المشكله ان 5000 دول انا اعملهم ممكن في ست شهور لان العربيه مخصصها للسفر فقط

متخفش العربيه هتفوق قبل ال5 لكن بعد ال 5 حاجة تانيه وأول مره أشوف حد يجيب البونتو للسفر دي عربيه مدينة زي ما الكتاب بيقول

**damasry** · 06-12-2010 02:07 AM

الف مبروك يا باشا وبالنسبة للفتيس فالفتيس ها يظبط معاك كمان شوية، اصبر عليه بس

وبالنسبة للمرايات فانا فاهم قصدك وهى فعلا تحس المرايات بارزة بزيادة عن انسيابية جسم العربية

**wael17** · 06-12-2010 12:21 PM

المشاركة الأصلية كتبت بواسطة crazylambada

الستارت اند ستوب اللي بحاول اوقفه لما بكون مش محتاجه مش عارف

ستارت اند ستوب هو الزرار الي عليه حرف S جوه دايره فوق الكاسيت...جنب زرار السنتر و زرار السيتي الي بيخفف الدركسيون و انت بتركن...خاصية ستارت ستوب بتبقي On كل ما العربية تدور و لازم تفصلها من الزرار الي عليه S جوه دايرة و لما تدور العربية هاترجع On تاني...في الاول ماكنتش متعود عليه و كنت باقفله بس دلوقتي باسيبه عشان يوفر بنزين لاني ناوي احطلها بنزين 95

المشاركة الأصلية كتبت بواسطة crazylambada

العب التالت رقم الموتور اضطريت ان انزل تحت العربيه افك العازل الحراري بتاع الشكمان علشان اجيب رقم الموتور حاجه تقرف بجد و هزأت المهندس بتاع طوارئ فيات بالزوق علشان قالي مكانها غلط كنت مكلمه قولتله المكان المظبوط علشان متبقاش تتوه حد معاك تاني يكلمك بس

انا كنت قلت الحكاية دي في مشاركة قبل كده عن الترخيص....رقم الموتور تحت العازل الحراري الي علي الموتور و لازم يتفك عشان في المرور مش هايعرفوا يجيبوا رقم الموتور...فكه سهل بس محتاج مفك طويل او تنام تحت العربية و الاحسن تفكه قبل ماتروح المرور عشان توفر وقت