الموضوع: Getz Club

السسسسسسسسسسسسسلام عليكم ورحمة الله وبركاته
وحشتووووووني اخر حاجة يا وحوش .
معلش انشغلت عنكوا شوية وكان بسبب اني في انتظار خبر سعيد قريب ان شاء الله . دعواتكم بقى ياريت يا وحوش .

المشاركة الأصلية كتبت بواسطة ahmed.ali

انا الحمد لله اشتريت جيتز 1.3 2005 :) بقيت معاكم في club يا رجاله

الف مبروك واهلا بيك معانا وتحت امرك يا باشا في اي استفسار

المشاركة الأصلية كتبت بواسطة elking60309

شباب انا لسه عامل صيانة ال60000 الف وتقريبا انا اكبر عداد فالمنتدى لو حد عايز يستفسر عن سعر اى قطعة اصلى انا فالخدمة

كنت اتمنى انك تبقى اكبر عداد كيلو متر بس للاسف انا عدادي هو الاب الروحي هنا . انا عامل 172000 كيلو حتى الان . والحمد لله العربية لسة متماسكة وده اللى مخليني معجب بيها .
ممكن نقول اني محتاج مساعدين حاليا وشوية تظبيط في العفشة . وده معدل ممتاز لما عربية تحتاج الحاجات دي بعد حوالى 160000 كيلو .

المشاركة الأصلية كتبت بواسطة elking60309

صيانة ال 60000 الف عبارة عن
سير تقسيمة وتمنه 170 اصلى الكيس عليه استيكر هيونداى
سير دينمو وثمنه 20
سير تكييف وثمنه20
سير باور وثمنه 20
بليتين شداد صغيرة وكبيرة 160اصلى العلبة لونها فضي
فلتر هواء ثمنه 40 جنيه
فلتر بنزين تمنه 115 اصلى علبة زرقة
فلتر زيت ثمنه 20
اربع بوجيهات 50
جركن زيت شيل 115 الموضوع بياخد 3 ساعات تركيب

دي مش اسعار التوكيل
ياريت تكون جبت الحاجات دي من حد انت بتثق فيه عشان السوق مليان قطع غيار مغشوشة . وربنا يباركلك فيما انفقت ان شاء الله .
عايز انصحك نصيحة ,
بلاش تحط زيت 5000 عشان ده مش وقته حاليا .
ممكن واحد زي حالاتي يبدأ يحط الزيت الـ 5000 عشان الموتور عندي عامل اكتر من 150الف بدأ يحتاج زيت اكثر لزوجة . لكن انت موتورك لسة بخيره والزيت اللزج ممكن يأثر عليه .
انا مش خبير اوي لكن ده كلام ناس شغالة في غبور وناس شغالة في شل .

المشاركة الأصلية كتبت بواسطة _ahmed_casper_

السلام عليكم يا رجاله ... مبروك للجيتزاوى الجديد و قولنا بقا ايه اخبار ال 1300
انا داخل على ال 25000 كيلو يا جماعه و اخر صيانه عملتها ال 10000 و عايز اعمل صيانه 25000 حد يعرف ايه اللى بيتغير فى الصيانه دى يعرفنى طبعا غيير الزيت .. يعنى البوجيهات و و الكلام ده ياترى فى حاجه بتتغير فى الصيانه دى و لا ايه
على فكره يا جماعه الجيتز دى بجد روعه روعه روعه و رافعه راسى.. النهارده على طريق السويس شديت مع واحد معاه سيفيك كوبيه تقريبا موديل 98 sr و كان ساقط فى كرسى ريكارو و جنوط ماشاء الله و عدسات و حركات انا قلت هيقطعنى بس فضل ورايا و هو شغاال بيسقط نقلات بالهبل و مشفتوش تانى و بعده برضه سيفك و شاب برضه راكبها و حركات و زى اخوه برضه .. خدو الكبيره بقا على الدايرى مع جيتا جيتا جيتا جيتا برصراحه بهدلنا بعض و كان ورايا الحمدلله و كنت باخد ملفات الدايرى على 180 و بجيبه ورايا بعد 180 كمان بس كنت حاسس انى مش على الارض و هديت قبل الزحمه و لما جه جمبى بصلى بصه احترام كده ههههههه اكيد مكنش متوقع .. انا بصراحه مكنتش اتوقع
المهم بعد الرغى ده كله حد يقولى على حوار الصيانه دى و روح غبور ولا فاكس

ابو حميد اللى دايس على الياباني والالماني
بص هو الالماني ركوبة جامدة وقعدة مريحة وامكانيات عالية وثبات رائع طبعا لكن مالوش في الجري اوي . او ممكن نقول اننا نكسب لغاية الـ 120 في طريق مفتوح . لكن هو يكسب بعد الـ 180 بثباته وقوته وجبروته .
الياباني بقى ده قصته كبيرة شوية لان في مليون موديل . انا ساعات اخيط سيفيك وساعات نفس الموديل يروقني . اعتقد انها موديل وحالة عربية وسواق فاهم موتوره كويس . لان الجري ده مش دوسة بنزين وخلاص . لازم عينك تبقى على الـ rpm عشان تدي الغيار حقه وفي نفس الوقت تخلي الموتور يعزم كويس .
بالنسبة لموضوعك بقى يا كبير انا مازلت مصمم على التوكيل عشان الضمااااااااااااااااااااا ااااااااان .
غبور بيتلكك والعربية بتاعتنا حاجتها مش رخيصة ومش متوفرة اوي بره . على قد ماتقدر حاول تعمل صياناتك في الضمان .

المشاركة الأصلية كتبت بواسطة ahmedalaa88

ممكن المساعده فى معرفة سعر قاعدتين موتور الجيتز و الشداد (جيتز موديل 2008)

انا لسة شاري القاعدة الكبيرة اللى تحت سير الكاتينة ودي كان سعرها حوالى 850 من التوكيل والشداد جبته بحوالى450 من التوكيل برضه وركبتهم بره .
مش هاحكيلك بقى العربية فرقت قد ايه . حسيت انها رجعت زيرو تاني والله .
بس في قواعد كوري موجودة بره التوكيل بنصف الثمن وفي ناس بتشكر فيها .
نصيحتى ليك ,
حتى لو الكوري اللى بره التوكيل هاتعيش مده اقل مش مهم . بس سعرها كويس وانا شوفتها بنفسي وهي هي نفس الشكل بتاع القاعدة اللى انا جبتها من التوكيل .
لو عايز ممكن اوصفلك السكة

المشاركة الأصلية كتبت بواسطة Mohab555

يا كاسبر لو مغيرتش البوجيهات فى صبانة 20 الف غيرهم المرة دى وغير فلتر البنزين ... مع جركن زيت لكوى مولى ... و ادعيلى وشوف عربيتك هتبقى عمله ازاى ..

البوب الجاااااااااااااامد اللى دايما بيجيبلنا الجديد
انت يابني اقوى قلب في الclub . بتدوس ومش بيهمك .
انا سمعت عن الزيت ده بس خايف احطه غير لما اشوف حد جربه الاول .
شكلك هاتسخني انا كمان لاني قربت الغير الزيت .
ماتقولي كده اجيبه منين ؟

المشاركة الأصلية كتبت بواسطة Ahmed.Ali

الـ1300 وحش علي الطريق جبت بيها 180 بيييس جدا مع ان العربيه عامله 100 الف كيلو بس ماشاء الله موتور محترم عيبها ان مش نفس قطع غيار الـ 1100 والـ1600 لاكن فيها اسبويلر :):)

ماتجيبش سيرة الاسبويلر ده عشان في ناس هنا هاتموت عليه وانا اولهم و Mohab555 وكان في بنات معانا هنا عايزينه برضه وللاسف مش لاقينه غير استيراد .
ولو قولتلك سعره كام استيراد ممكن تفك بتاعك وتشيله في البيت للزمن , اخر مره سالت عليه كانوا بيقولولي 800 جنيه .
ربنا يباركلك في عربيتك ويحفظنا جميعا من كل سوء