اولا وقبل كل شيء الحمد لله وسبحان الذي سخر لنا هذا وما كنا له مقرنين وانا الى ربنا لمنقلبون

تم بحمد الله امبارح عمل اول صيانة في عمر زوزو... صيانة ال5000 كيلو

أولاً الحجز... تم عمل الحجز الاسبوع الماضي عن طريق الاتصال بالرقم المختصر لمنصور واختيار الصيانة... شاب في منتهى الادب سأل تحب الصبح ولا بعد الظهر... قلتله المهم اقرب معاد عشان عايز اسافر بالعربية وهي اصلاً عامله كتير... وتم الحجز ليوم الخميس (أمس) في فرع الهرم الساعة 5 ونص مساءاً... وتم ارسال رسالتين تأكيد على تليفوني بالمعاد والمكان

ثانياً الوصول للمكان... انا معرفش المكان ده بالنهار شكله ايه.. بس بالليل فعلاً صباح النضافة... وصلت ودخلت برقم الحجز اللي اتبعتلي على الموبايل.. وواحد مهندس اسمه هاني استلم العربية وسألني على المطلوب (الراجل مؤدب جداً الحقيقة).. انا طلبت الاتي:
1- عمل الصيانة الدورية وتغيير الزيت والفلتر
2- تربيط العفشة من باب الاحتياط
3- غسيل حوض الموتور
4- مراجعة السوائل وزيادة النواقص

المهندس استلم العربية (طبعاً يؤخذ عليهم انه مكانش معايا اي شيء يثبت حالة العربية وهي داخلة.. يعني لو طلعوها على حصيرة ومدغدغة مليش عندهم حاجة)... الساعة كانت 6 الا ربع والراجل قاللي 8 تستلمها.. ليه ده كله يا عم قاللي سيبنا نروقلك العربية

ثالثاً الانتظار... المكان منتهى النضافة والناس منتهى الادب.. وفي كافتريا متأجرة لكافيه محترم (باسكوا) واسعاره حلوه جداً... خدت الكافيه واتفرجت على الاسماعيلي وهو بينفذ في سموحة الصح... بعدين نزلت الورشة اتفرج... كان في عربية كروز سودا داخلة على حصيرة ملهاش وش... العربية مخبوطة عدل بين الفانوسين بالظبط ومطربقة لحااااد البلوكة... والفانوسين سلام.. الخبطة عدل في وش العربية.. محدش رضي يقولي هي ليه كده... والعربية اوتوماتيك والكنترول بتاعها شغال بس مش بتدور... وشفت الاسترا والكورسا الجداد.. تحف الصراحة وكله داخل بمشاكل فتيس

رابعاً الاستلام... العربية خلصت في معادها بالدقيقة... وتم عمل كل اللي انا طلبته فوق مع تنضيف فلتر الهوا والغسيل... وتم تربيط كرسي السواق عشان انا من الوزن التقيل... وملأ قربة المساحات ومراجعة السوائل... العربية خارجة من الورشة في منتهى النضافة ومتغلفة بلاستيك على الكرسي والطارة ودواسة في الارضيه وتم ختم كتيب الضمان

التكلفة 261 جنيه شامل المصنعية والضريبة... الزيت موبيل 1 بتاع ال10000 كيلو... يعني الصيانة الجاية مفيش غيار زيت... وبناء على طلبي فعلاً ملزقوش ستيكر موبيل 1 اللي بيبقى على الزجاج الخلفي ده

النتيجة... واضح انه فلتر الهوا كان عنده انتفاخ تراب لأن سحب العربية بقى جبااااار... سألتهم على السوفتوير الجديد قالوا مفيش جديد بعد اللي عندي... لسبب ما كمان الفتيس استجابته متحسنة جداً... يا ترى زيت الفتيس كان ناقص وزودوه من سكات؟ الله اعلم

المهم الناس محترمة والعربية مبسوطة... والحمد لله