عملت حدثة

**e_amrawad** · 13-12-2010 03:21 PM

المشاركة الأصلية كتبت بواسطة yahyaabdelmoez

[/size][/size]

يا أخي الحبيب إيه إللي انت عامله ده !!؟؟
لما انت مأمن على العربية إيه لزوم الكلام ده كله
ما تروح تصلح في التوكيل على حساب التأمين بدل القلق ده كله
انا مش شايف مشكلة والموضوع سهل طالما انك مأمن
يبقي ليه توتر نفسك وتبحث عن التقليد والسمكرية وبره التوكيل وقلق من غير داعي
هو انت عاوز توفر لشركة التأمين ولا إيه ؟؟

+11111111111111111

بس لازم تتبع خطوات محددة:
1- تقرا وثيقة التأمين بتاعتك وتشوف اذا كنت محتاج تعمل محضر ولا لأ.
2- لو محتاج تعمل محضر أعملة ضد مجهول.
3- أعمل إخطار حادث في شركة التأمين.
4-أرفع العربية علي ونش ووديها التوكيل تحسباً لأي مخاطر (سؤال أنت رجعت بيها البيت إزاي).
5- التوكيل هيعامل مقايسة والتأميين يعاين وبعد كدة تتابع مع التوكيل ولاحظ انهم في التوكيل ميغيروش حاجة زيادة غير لما يدو التأمين يعاين مرة تانية.
6- هتدفع انت للتوكيل وتسترد من 85% ل90% من اللي دفعتة
7- السنة اللي بعديها بإذن الله تغير شركة التأمين عشان هيعلوا عليك النسبة

وبالتوفيق والف حمد لله علي سلامتك

**MOK3336** · 13-12-2010 06:18 PM

أنا هتوكيل علي الله و أدويها للتوكيل
بس معلش سؤال غبي شوية هل التوكيل هيرجعها زى ما كانت ولا ماشي حالك و خلاص ( سبب السؤال : عشان كان في عضو مش فاكر في قسم إية قال أن التوكيل بيعك و بيستسهل و مش بيشتغل بضمير و أسهل حاجة غير عير )

أرفع العربية علي ونش ووديها التوكيل تحسباً لأي مخاطر (سؤال أنت رجعت بيها البيت إزاي).

هي العربية بتمشي عادي خالص بس المشكلة أن قربة المية أتكسرت بس الريدياتير مليان
واحد صحبي قالي ست خرطوم القربة و أمشي عادي بدال الريادتير مليان
فأنا مش عارف

بس حكاية و نش دي هتكلفني مش أقل من 500 جنيه و الواحد جايب جاز

فأنا هسافر بيها و خلاص مسافة 60 ك و هاخد معايا زجاجة ماية خضراء ابقي أزود بيها لو حسيت ان العربية سخنت
ولا أنتم إية رأيكم

الصور أهه
أه صحيح
طلعت قربة المساحات هي كمان مكسورة

حد يطمنى الموضوع بسيط ولا إية

**amir** · 13-12-2010 06:33 PM

خير ان شاء الله مادام مأمن سايبنا محتاسين معاك ليه بس من الاول ياللا الحمد لله
اعمل محضر طبعا
ودي العربيه التوكيل علي ونش و اياك تمشي بيها من غير دوره تبريد علشان الموتور ميبوظش "و دي هتكون محسوبه عليك مش علي التأمين" و لو انت عربيتك اوتوماتك يبقي هتودع الجير بوكس
و الونش مش شرط 500 جنيه في 60 كيلو ليه يعني الفيل واقف بره؟
اطمن خالص و بلاش قلق زياده عن اللزوم و الحمد لله علي كل شيء قضا اخف من قضا

============

قريت في رد من الردود نصيحه انه يشتري اكصدام تايواني و عايز اعلق علي النقطه دي
الاكصدام الاصلي بيكون اطري بكتير عن التايواني و النتيجه ان لما يكون في خبطه تنيه او شرخ ممكن يتصلح باللحام الفيبر و بيرجع زي الاول بازبط عكس التايواني اللي اي خبطه بكسر

و بالنسبه للاعضاء اللي بينصحو انه يمشي علي مهله و يزود ميا
هي هتكون لحظه واحده اللي الموتور هيوصل لدرجه الذوبان فيها ازاي بس يبقي عينه علي مؤشر الحراره و هو سايق و يظبط انه يقف قبل ما الموتور يسيح!!!
دوره تبيرد مفتوحه= قلتها

**Bishoy.Girgis** · 13-12-2010 09:25 PM

المشاركة الأصلية كتبت بواسطة mok3336

طيب في حل تاني أن حد يشدني بعربيته حد هناك بس مشكلة الفرامل أنها مش هتشتغل غير مع الكونتاكت
يعني ممكن أخلي حد يشدني و أكون مشغل الموتور ؟؟ ولا إية

طيب ولو مشيت وحده وحده يعني علي سرعة 40 -60 مثلا و يبقي عيني علي مؤشر الحرارة و أسد خرطوم القربة ايلي موصل للردياتير عشان المية ما تسقطش و أحاول المؤشر ما يوصلش للتلت الأخير من العداد
إية رأيكم عشان لو كده أتوكل علي الله و أوديها بكرة أو بعدة

وتقريباً الونش ده هجيبة منين أو أطلبه منين ؟؟ و تقريباً هياخد كام ؟؟؟

بص يا mok الكلام النهائي خد العربية علي ونش و اطلع بيها علي التوكيل فورا لأن من منظر الصور كده الموضوع مش الحاجات اللي كتبتها بس لأ دا في حاجات كتير هتتغير و هتتركب غير اللي انت كتبته .
عشان كده اعمل محضر و روح سلم العربية للتوكيل و خلي شركة التامين تاخد اجراءتها لأن الخبطة صعبة شوية

**MOK3336** · 13-12-2010 10:17 PM

المشاركة الأصلية كتبت بواسطة peaceman

بص يا mok الكلام النهائي خد العربية علي ونش و اطلع بيها علي التوكيل فورا لأن من منظر الصور كده الموضوع مش الحاجات اللي كتبتها بس لأ دا في حاجات كتير هتتغير و هتتركب غير اللي انت كتبته .
عشان كده اعمل محضر و روح سلم العربية للتوكيل و خلي شركة التامين تاخد اجراءتها لأن الخبطة صعبة شوية

هو إية تاني ايلي ممكن يتغير تاااااااااااااااااني يا ريت تقولي بالله عليك

**Bishoy.Girgis** · 14-12-2010 12:09 AM

انا شايف ان الرفرف ممكن يتعدل بس مدام في تأمين يبقي يتغير احسن كتير
في كمان كابلات مقطعة و طبعا عايزيين يتغيروا
و اكيد طبعا انت ماشوفتش حالة قربة المياه الخاصة بالمساحات ممكن تكون اتأثرت
علبة الفيوزات اللي قدامي في الصورة ممكن يكون في قواعد مكسرة و انت مش شايفها
لازم يا حبيبي التأمين .. لأن في حاجات صغيرة مش باينة و بتجمع فلوس و كمان انا مش عارف حالة الشاسية و التوكيل هو اللي هيعرف
ادخل في موضوع التأمين احسن كتير و لو توديها السبع في المعادي او المنصورة لو اقربلك و ربنا يرتب
و علي العموم اللي انا شايفه انها حاجات هتتغير و مفيش تصليح لحاجه
انا هقولك علي حاجه و ربنا سترها معاك و هي ان الايرباج مفتحتش لأن الخبطة تعتبر قريبة اوي من سنسور الايرباج لأن السنسور بدرجة 35 من يمين العربية و طبعا هي مفتحتش لأن الحادثه تعتبر بسيطة
ربنا معاك

**Hossam_Zaky** · 14-12-2010 12:30 AM

السلام عليكم
انا شفت موضوعك دلوقت بس و عن تجربة حادثة سابقة مشابهة لك

- أهم حاجة متدورش العربية خالص و خليها مكانها و اياك تتحرك بها لأن الخبطة أقوى من وصف حضرتك

- اول حاجة اعمل محضر بغض النظر عن متطلبات شركة التأمين و حتي لو قالتلك الشركة متعملش و قيده ضد مجهول انك نزلت من بيتك الصبح لقيتها كدة و محدش شاف حاجة و زود في المحضر ( بعد ما تراضي اللي بيكتبه ) و اي تلفيات تظهر بمعرفة فحص الفني المختص

- خد العربية علي ونش ( تسأل عليه في البنزينات ممكن يدلوك عليه و ممكن يكون عندهم ) و بتتكلم في حدود 150 ل 200 جنيه تقريبا ( حتي لو 500 ) و وديها التوكيل

- حتخلي المهندس المسئول عن الأصلاحات سمكرة و خلافه يعملك مقايسة مبدأية لشركة التأمين اللي انت تبعها و حيستلم منك العربية و حيقولك مبدأيا تاخد كام يوم شغل ( وده لازم تاخد رقم موبيله لأن كل حاجة معاه مباشرة )

- مع ملاحظة ان التوكيل مش حيمد ايده فيها لحد ما مهندس التأمين يحضر يعاينها و يصورها عشان يعتمد المقايسة ( الأسعار حيفاصل فيها و احيانا المهندس بيكتب اقطع غيار احتياطي زيادة عشان لما مهندس التأمين يفاصله )

- حضرتك شوف وسيلة ابلاغ شركة التأمين بالحادث ازاي هل بالتليفون و لا ايه و غالبا لازم حضرتك تروح الشركة تعمل بلاغ حادث علي نموزج عندهم ترفق به محضر الشرطة و المقايسة المبدأية للسيارة و حيقولولك المهندس اللي حايعاين حيروح التوكيل في خلال كذا يوم

- حضرتك كدة حيكون دورك انتهي مؤقتا

- التوكيل مش حيبتدي يشتغل في العربية غير لما التأمين يعاين و يعتمد المقايسة فحضرتك حتابع بالموبايل مع مهندس التوكيل لحد ما يؤكدلك أن التأمين عاين العربية و بعدها التوكيل حيشتغل فيها

- لما التوكيل يخلص العربية غالبا حضرتك اللي حتسدد الفاتورة للتوكيل و تستلم عربيتك ( متدفعش الفاتورة غير لما تعاينها كويس جدا جدا جدا و تخلي المهندس يوريك ايه اللي عملوه بالضبط في العربية و أيه اللي أتغير ده حقك بفلوسك ) و لو حاجة مش عاجباك متستلمش العربية و متدفعش الفاتورة غير لما تكون راضي تماما تماما عن العربية

- لما تدفع الفلوس و تاخد فاتورة مختومة بختم التوكيل بقيمة الأصلاحات حضرتك حتروح بعربيتك لفرع التأمين الخاص بحوادث السيارات عشان يعاينو الأصلاحات اللي تمت و يصوروها و حيستلمو منك أصل الفاتورة ( خلي صورة منها معاك و حاول تسلمهم الفاتورة عليها أو برقم عندهم )

- حضرتك بأذن الله حتسترد حوالي 80 إلي 90 % من قيمة الفاتورة خلال فترة اسبوعين إلي شهرين حسب درجة أحترام شركة التأمين مع اصرار و متابعة منك

- ياريت حضرتك تشوف مع السادة الأعضاء أفضل فرع للتوكيل فيما يخص الأصلاح و الحوادث و كذلك حضرتك مأمن في شركة أيه بالضبط يمكن حد يكون عنده معلومة تختصر عليك الطريق بالنسبة لهذه الشركة

- مع ملاحظة غاية في الأهمية أنك حتي لو مش مأمن كنت حقولك روح التوكيل عشان تشتري عربيتك

- الملاحظة الأهم و أن مش عاوز أقلقك بس الصور اللي حضرتك حاطتها فيها احتمال كبير تتعدي حدود القطع اللي بتتكلم فيها و ربنا يستر متكنش وصلت لصدر العربية اللي راكب عليه الرفرف و الكشاف و خلافه

- في النهاية تقبل مواساتي لك فيما أصابك و اتمني متتكررش و خللي بالك اكتر مع انعدام القواعد و الأخلاق و تواجد التهور و الرعونة و عدم الشعور بالمسئولية

**M.Osman** · 14-12-2010 12:47 AM

ياااه الحادثة دي زي بتاعتي بالظبط : (غيرت اكصدام + فانوس+مكنة مياة مساحات+ رفرف+مقص يمين)

بسيطة ان شاء الله متقلقش .. كلها حاجات بتتغير و العربية بترجع زي الأول ان شاء الله

**Hossam_Zaky** · 14-12-2010 12:57 AM

بعد ما بصيت علي الصور تاني

و يارب أكون غلطان

من زاوية التصوير بتاعتك الرفرف نافر ( خارج ) لبرة عن مساواة العربية و انا شايف انه لسة ماسك بالمسامير من فوق جنب الكبوت ( الشاسيه هو الجزء الداخلي من الرفرف داخل غرفة الموتور البومبيه الداخلي الملحوم مع االقنطرة الحاملة للموتور ) يبقي لازم تحط امامك احتمال ان الشاسيه تأثر لأن خارج مع الرفرف لبرة مش الرفرف لوحده
و الكلام ده مش يقلقك لأنه حصل معاية و التوكيل رجعهالي زي ما كانت

لكن حبيت اقولك ان الموضوع حيعدي معاك الحدود الماليه اللي بتتكلم فيها و ده لازم تكون عامل حسابه لأنك حتدفع للتوكيل لحد ما تاخد فلوسك من التأمين و ياريت تعد معايا بأسعار التوكيل

- فانوس أمامي + كليبسات
- اكصدام أمامي + النيكل عشان بيبيعوه لوحده + كليبسات
- رفرف امامي
- كبوت ( غالبا التوكيل حيغيره لأن بخلاف العوجة اللي في بدايته الكبوت كله معووج لفوق )
- ربنا يستر متكنش الخبطة وصلت صدر العربية الأمامي
- كارتيرة رفرف داخلية
- قربة مياه
- قربة مساحات
- احتمال علبة الفيوزات
- بخلاف الأهم أعمال السمكرة و الدوكو دي في التوكيل ممكن تخشلها مستريح في حولي 3000 جنيه مصنعيات أو اكتر لأنه لاقدر الله و دخلت في شاسيه حتخش في فك و تركيب موتور كمان

أنا مش بضايقك و الله لكن بحب تكون علي أرض الواقع و تحاول تفهم المهندس انك حتحاول تظبط الفلوس اللي حتدفعهالهم و يخليه حنين في حساباته و مش يبالغ

اسف لو كنت ضايقتك لكن حبيت اكمل الصورة لك و في النهاية أتمني دي تكون مبالغة مني و تكون الصور مش واضحة و الموضوع يتلم معاك

اسف مرة تانية

-

الموضوع: عملت حدثة

LinkBack

أدوات الموضوع

عرض

-

-

-

-

-

المواضيع المتشابهه

عملت حدثة بالعربيةوربنا نجانى وعاوزمساعدتك

عملت حدثة

يا جماعة عملت حدثة ومشكلة كبيرة جدا - ساعدوني في الحل

الحمد لله عملت حدثة - الله يخرب بيت فرامل اللانوس

عملت حدثة انهردة

الكلمات الدلالية لهذا الموضوع

المفضلات

المفضلات

ضوابط المشاركة