استفسار عن الجيب الرانجلر التمانينات .. ارجوا الافاده

**mxz911** · 12-12-2010 06:02 PM

السلام عليكم ..
هيه العربيات الجيب الرانجلر القديم دى ايه نظامها يعنى لو عربيه موديل التمانينات مثلا وشكلها حلو ومكيفه وموتور 4000 سى سى المفروض تعمل كام والضريبه هتبقى كام كده ؟؟؟

واخبار قطع الغيار ايه وهل هيه حلوه للمدينه القاهره يعنى .. لانى بعشق العربيه دى بس عمرى ما سقتها بس اما اشوفها ف الشارع بتبهر

وكمان هيه استهلاكها عامل ازاى ف البنزين ؟؟

ارجوا الافاده لانى معنديش اى معلومات عنها وبفكر اجيبها لو عرفت

انا بتكلم على اللى شبه دى

**ALMAGICO** · 13-12-2010 09:28 PM

والله اللى اعرفة ان استهلاك البنزين عالى لانك بتكلم فى موتور 4000 سى سى 6سلندر

اما الضريبة فهى تخضع لفئة اللى فوق 2000 سى سى وفات عليها 10 سنين
فهتكون 1060 او 1160 مش فاكر اوى بس مش هتزيد عن كدة

بس تقريبا هتبقى نادرة لو زى اللى فى الصورة لان معظم العربيات دية بيبقى متسقطلها مواتير
بالنسبة لقطع الغيار انا مقدرش افيدك
والله اعلم فيما قلت
وشوف راى باقى الاعضاء

**mxz911** · 14-12-2010 05:14 AM

ايوه هيه فعلا متسقطلها موتور شيروكى وكمان معدلة 1997...فيها فتيس غرز 4*4 و بها تكييف وجنوط سبور وباور وزجاج كهرباء

دى من احدى الاعلانات اللى على النت ومطلوب فيها 31 الف وهيه اصلا موديل 84 بس شكلها حلو

واستهلاك البنزين هيكون كام مثلا؟ وهل هيه عربيه حلوه ؟؟

**ALMAGICO** · 14-12-2010 03:47 PM

اولا عايز اقول لحضرتك اوعى تحكم على عربية بان شكلها حلو لان ممكن تكون من برة هاللة هاللة ومن جوة يعلم اللة
ثانيا بالنسبة لاستهلاك البنزين لازم حضرتك تحدد هى كام سلندر
ثالثا انا عايز اعرف اية احتياجك للعربية

**mxz911** · 16-12-2010 03:03 PM

هو بصراحه انا عاوز عربيه عزمها عالى وشكلها حلو .. وانا شكل الجيب الموديل ده بعشقه جدا .. بس ناس كتير قالولى ان اسهل حاجه ف العربيه دى شكلها يبقى حلو من بره ومن جوه ممكن تلاقيها طالع عين اهلها ومش عربيه اصلا !!

ف انا عاوز اعرف العربيات دى ايه نظامها لانى بشوفها كتير شكلها حلو وبتتباع بسعر كويس وبصراحه عمرى ما سوقتها ولا ركبتها .. وهيه المفروض احتياجى ليها انها عربيتى الخاصه مش هيبقى فيه غيرها

**ALMAGICO** · 17-12-2010 05:08 AM

انا هقول لحضرتك على حاجة طالما حضرتك عايز عربية عزمها عالى وخلى بالك العزم العالى والقوة فى الجيب دة مش ببلاش دة ادامة استهلاك بنزين عالى شوية المهم اية رايك فى الشيروكى موديل التسعينات عربية عزم عالى شكل بردة جميل ومنها سيارة عائلية شوفلك حاجة موديل 92 او 93

وابعد عن اى عربية متسقطلها موتور وريح دماغك ومشكلة العربية اللى انت عازها ان نادرا لما تلاقيها بموتورها ومعززة و مكرمة

الموجود كلة متهان اوى وحتى لو لقيتها ونضيفة اكيد هتلاقى السعر عالى شوية وهتلاقى الفرق بينة وبين الشيروكى 92 و93 مش كبير والقرار فى الاخر لحضرتك

الرانجلر عربية محترمة جدا بس لو حالتها حلوة برة وجوة وموتور نضيف فى الحالة دية توكل على اللة

بس لو ناوى رانجلر فعلا اكشف عليها جامد اوى اوى وميغركش الشكل الخارجى

واللة اعلى واعلم فيما قلت

واى استفسار انا تحت امرك

**monzer_500** · 31-12-2010 05:09 PM

انا كمان بحب الشكل ده من العربيات وكنت شفت عربيه موديل 79 بصراحه الراجل عامل فيها شغل تحس انها موديل 2000 وكنت سالته بكام قالي حوالي 29 الف او حاجه زي كده وكانت بالظبط نفس الشكل اللي انت حاطه

**Adham** · 31-12-2010 06:23 PM

العربيات دي موديلات التمانينات بتبقى لوطات جيش و مشدودة و كبيرها 20 الف جنية

الرانجلر الاوريجينال موديلات التسعينات مش غالية و حاتبقى ازيد حاجة بسيطة حسب حالتها (ممكن حوالين ال 40)

و بلاش عربيات لوطات

لانها بتبقى كهنة و راكب فيها شوية حاجات استيراد (تابلوة و موتور و عفشة ) وسقف اي كلام و مشدودة بوية و سروجي) و لما تركبها حاتلاقيها من جوة مشنة غالبا"