الحقوني يا رجالة انا اتجمد خلاص !

**Egyzizo** · 14-12-2010 03:02 PM

كتر خيرك يا د. أميــــر ..
تم تجربة موضوع الجرايد بالأمس ونجحت نجاح منقطع النظير بس للأسف الشباك خشب مش ألوميتال ومكان التسريب هو فى التقاء الضلفة مع الحلق ، يعنى بتتفتح ، فهيبقى حل مؤقت ، فجــارى البحث عن السفنجة ربنا يسهل وأعرف الاقيها فى البلد الصغيرة اللى أنا عايش فيها.

**amir** · 14-12-2010 05:08 PM

المشاركة الأصلية كتبت بواسطة egyzizo

كتر خيرك يا د. أميــــر ..
تم تجربة موضوع الجرايد بالأمس ونجحت نجاح منقطع النظير بس للأسف الشباك خشب مش ألوميتال ومكان التسريب هو فى التقاء الضلفة مع الحلق ، يعنى بتتفتح ، فهيبقى حل مؤقت ، فجــارى البحث عن السفنجة ربنا يسهل وأعرف الاقيها فى البلد الصغيرة اللى أنا عايش فيها.

يا سيدي العفو
عموما مدام الشباك خشب عادي يبقي عليك و علي التالي
هات قماشه قديمه و كام مسمار بتاع خشب بس يكون رفيع و صغير
دق في نهايه كل ضلفه (مكان التقائها بالحلق لما تتقفل) دق المسمار علي القماشه و اسحبها لتحت و دق و هكذا بحيث انك تبطن مكان الالتقاء ده
و طبعا هينتج عن كده ان الضلفه لما تيجي تقفلها هتكون صعبه شويه لأنها هتضطر تضغط علي القماشه و بكده هتاخد عزل 100% و مش هيقع لما تفتح الشباك

**ganash** · 14-12-2010 09:18 PM

هيه الدفايه الزيت دى بكام واشمعنى زيت يعنى ؟؟ ونوعها ايه ؟؟

**Deshahcoka** · 15-12-2010 12:28 AM

رجالة والله معلش اني اتأخرت عليكم بس والله انا في دوامات من اول ما الحوارات ديه حصلت و الدنيا بقيت فلم هندي بجد !

عموماً انتوا ايه رايكم في الدفايات ؟ انا شفت في فتحالله دفاية بالرموت كنترول و كبيرة ب 150 جنيه ! الواحد لو جابله 2 واحدة للشقة وواحدة للمطبخ و الطرقة !

دلوقتي ناس بتقلي الدفاية حل الشتاء و ناس بتقلي تجبلك برد و تقعد الشتاؤ في البيت !

يعني انا دلوقتي لو دفيت الاوضة و الطرقة و المطبخ الي مفتوح على الطرقة ! لما اصحى الصبح و امشي فيهم مش الجو هيبقى متعادل ؟ يعني ميجيليش برد ؟ و البس براحتي و اتقل و اثوم نازل من الشقة للبرد ؟

و ايه المشكلة لما اسيب الدفاية شغالة و انا نايم ؟ انا مقلتش اني حنام جمبيها بس الفكرة مثلاً لو الواحد يسبها 2 متر ابعد عنها و ينام و يحاول يدفي البيت ككل ؟

ان ان شاء الله السقف هيتعمل يتمحر و كمان كام يوم يروح حاطط البلاك عليه ! بالنسبة لسقوعية الحيطان و الاوضة و الشقة هيا ديه الي انا مش لاقيلها فكرة غير الدفاية و الناس بتقلي هتمرض !

ياريت افكار يا جماعة !

بالنسبة للشباك يا دكتور :) في فكرة واحد قالها انوا اجيب مشمع زي الكياس كدة بس تقيل و دبابيس صبورة و اقوم مدبسها على ريس الشباك و كدة اكون عزلت الريح الي داخلة على الاوضة مسقعاها ! ايه رأي حضرتك ؟

**ganash** · 15-12-2010 07:20 PM

المشاركة الأصلية كتبت بواسطة ganash

هيه الدفايه الزيت دى بكام واشمعنى زيت يعنى ؟؟ ونوعها ايه ؟؟

ممكن رد ؟؟

**mbx4e** · 15-12-2010 08:40 PM

العزل هايرحك جدا بجد لو الشقه بتاعتك او ملكك او ايجار قديم لما تيجي توضب ممكن تحط طبقة عزل هاتفرق معاك في الصيف والشتا وممكن تستخدم خامات عاليه في الدهان مثال اللاكيه وفي انواع منه السانيتال ( ودا للفنش الفخم والخارجي ومابيقبلش غير الدهانات الزيتيه ) السانيتون ودا منسب جدا لانه بيتبطن بيه تحت اللاكيه او فوقه لو كنت هاتدهن بلاستك على دهان زيت (عازل للمياه والرطوبه والحراره جيد جدا ) صدقني كل دا هايوفر معاك جامد خصوصا في استهلاك الدفايات والتكييف
بالنسبه للسقف جرب البيوتامين والبلاك مع انك ممكن تبلط مطرح التسريب بلاط نظيف او سيرامك جيد ايهم ارخص عشان تلم التكاليف انا بقلك بلط لان اسكندريه فيها مطر ومع تراكم المياة الاسمنت هايتفكك ومش هايحمي العزل
يعني حاول تعمل حاجه وسط تادي العرض وماتبقاش مكلفه
بالنسبه للشباك في حاجه شبه السفنج كدا بتتباع عند بتوع التكييفات روول كبير بي حوالي 20 او 15 جنيه سفنج اسود مظغوط طري كدا في ناحيه منه بتلزق وفي ناحية لا جربه كدا ( بس طبعا مش هايديك شكل) قطع منه شرايط وسد بيه الفتحات