اشتري الفلوانس ولا استنى التخفيضات الجمركيه

**rompo10** · 31-12-2010 12:13 AM

مااعتقدتش ان في حاجه هاتنزل احنا في مصر ولو نزلت الجمارك هايرفه تمن العربيه تاني تحت اي بند

**tamagogo** · 01-01-2011 11:00 PM

في اهرام الجمعه الصفحه الاولي خبر ان تركيا عملت اتفاقيه ي بتاعت اوروبا وهتنزل الجمارك 10 سنويا كل سنه وابتدي التطبيق النهارده

**Boory** · 01-01-2011 11:22 PM

المشاركة الأصلية كتبت بواسطة tamagogo

في اهرام الجمعه الصفحه الاولي خبر ان تركيا عملت اتفاقيه ي بتاعت اوروبا وهتنزل الجمارك 10 سنويا كل سنه وابتدي التطبيق النهارده

أوببااااااااااااا لحظة واحدة بقى حد يفهمنا الموضوع ده معناه إيه و تأثيره إيه على سعر الرينو

**M.Elwan** · 02-01-2011 01:24 AM

المشاركة الأصلية كتبت بواسطة boory

أوببااااااااااااا لحظة واحدة بقى حد يفهمنا الموضوع ده معناه إيه و تأثيره إيه على سعر الرينو

هو مكتوب ان جمارك الاوروبى تم تخفيضها من 36 الى 32 %
والعربيات التركى المتوافقة مع نظام ُeuro 1 تم تخفيضها من 40 الى 36 %

**mummy_47** · 09-01-2011 12:01 PM

هو المقصود بالعربية الاوربي انها تكون مستورده من اوربا...يعني لو الفلونس المجمعة في السعودية مثلا(مجازي طبعا للتوضيح) هتدخل مصر فده لا يعتبر سيارة اوربية بل انها تجميع محلي ولا تدخل في الاتفاقية العبرة ببلد المنشأ..والا بالمنطق ده كانت مصانع تجميع السيارات عندنا ارخص من المستورده ..وده ما لا يحصل الا في مصر..يعني لازم تكون العربية الفلونس مستوردة من فرنسا...الخلاصة وحسب جريدة الاهرام الجمعة الماضية وبتصريح مسؤل البافارية للسيارات...ان مصانع التجميع ممكن تقفل وتتجه للاستيراد بحلول عام 2012-2014 اذا ما الحكومة اعطت لتلك المصانع المزيد من الحوافز..

نصيحة..انتظر قليلا حتى شهر ابريل بيكون الموديلات الجديدة نزلت والسوق بان تاثير ال 20% تخفيض الجمركي..(الموديلات الحالية ما هي الا بقايا 2010 ) وخلي بالك ان الشاري دلوقتي ولحد 2019 خسارن لو تقدر تنتظر لحد 2013 هيكون التخفيض وصل 40% هتكون الخسارة قليلة..والاسعار في انهيار .....يعني البي ام اللي جماركها 200%(فوق 2000 سي سي) هتكون الجمارك 120% لينزل سعر السيارة حوالي 160 الف ج(يعني لو هي ب 520 الف حاليا..بعد التخفيض توصل360 ) فما بالك بقى بالموديلات الاصغر يعني ممكن الب ام الفئة الثالثة والمرسيدس الفئة c اللي هي بتبدا من 298 الف هتبدا في سنة 2013 بحوالي 160:180 يعني بثمن الاوكتافيا او الجيتا
...
بالنسبة للاتفاقية التركية ففعلا بدأ تنفيد التطبيق من 1-1-2011 105 تخفيض لحد 2020 بينما الاوربية تنتهي في 2019

**MASERATI** · 09-01-2011 12:40 PM

السلام عليكم و رحمة الله و بركاته

أنا شايف أن أسلم حل عشان الواحد يجيب الحاجة بتمنها , لا أكتر و لا أقل , أنه يروح يجيبها من بلدها و ييجى و يدفع جماركها و يرخصها , بس ينتهز الوقت اللى بيكون فيه تخفيضات عالعربيات هناك عشان يخلصوا عربيات موديل السنة القديمة قبل ما التوكيلات و المعارض تنزل بتاع السنة الجديدة لأن التخفيضات دى بتبقى حاجة تجنن فعلا و بعد كده , ربنا يعينه على الجمارك اللى مابيبقاش ليها أى علاقة بالسعر اللى هو شارى بيه لكن بيبقى مرتبط بالسعر اللى الحكومة المصرية الذكية شايفاه , أن ده هو سعر العربية العادل اللى بتضرب فيه بعد كده و تحسب الجمارك .

اللى أنا عاير أعرفه و عاوزين حد عارف الموضوع ده يقولنا عليه, هى الباسات مثلا من ألمانيا , تبقى جاية من الاتحاد الأوروبى و بيقى عليها التخفيضات بتاع الجمارك و طاب اللى جايه من السعودية( مثلا ) , تعتبر برضه عربية أوروبى و عليها التخفيضات و لا لأ و هل أصلا اللى جايب عربية أوروبى من السعودية ( مثلا ) بيقدر يجيب شهادة ال eur1 عشان ياخد التخفيضات الجمركية و لا لأ ؟؟؟

هى فعلا تركيا, قالت لما ألحق نفسى و أعمل أنا كمان اتفاقية زى بتاع الاتحاد الأوروبى عشان العربيات بتاعتها تقدر تدخل مصر و بالفعل فى 2020 , هيكون ماعاليهاش جمارك خالص زى العربيات الأوروبى , أما العربيات الآسيوى و الأميركى, هى اللى هيبقى موقفها صعب لو مالحقتش نفسها هى كمان و عملت اتفاقية لأن هيبقى أسعار الأوروبى بالنسبة ليها منافس جدا و الناس هترجع تميل تانى ناحية الأوروبى و تبعد عن اليابانى و الكورى زى ما كان حاصل فى السبعينات و التمانينات .

**elghrory** · 09-01-2011 06:58 PM

الناس مش هترجع تميل أوى ناحية الأوروبى و تبعد عن اليابانى و الكورى زى ما إنت متوقع لأن أغلب الشركات ليها مصانع فى الأتحاد الأوربى زى هيونداى

**MASERATI** · 09-01-2011 07:15 PM

المشاركة الأصلية كتبت بواسطة elghrory

الناس مش هترجع تميل أوى ناحية الأوروبى و تبعد عن اليابانى و الكورى زى ما إنت متوقع لأن أغلب الشركات ليها مصانع فى الأتحاد الأوربى زى هيونداى

السلام عليكم و رحمة الله و بركاته

قصد حصرتك , أن العربيات اليابانى زى التويوتا و الهوندا و الميتسوبيشى و الكورى زى الهيونداى و الدايو , ليها مصانع فى أوروبا و العربيات الكورى و اليابانى ممكن تطلع من أوروبا و معاها شهادة الeur1 و بالتالى ممكن تاخد التخفيضات بتاع الجمارك ?????

**houseiny** · 12-01-2011 05:38 PM

على فكرة يا جماعة انا كنت في المصرية من حوالي أسبوعين ، فرع كارفور البوابات ، وكنت بستبدل عربيتي من عندهم ، أنا عربيتي هيونداي جيتس وكنت ببدلها برينو فلوانس هاي لاين ، بس الراجل بتاع المبيعات قالي حاجة غريبة أوي ، قالي هاحسبلك الهاي لاين على 150 الف ، انا طبعاً صعقت ، لأن صاحبي شاري من شهرين 167 الف ، مارضتيش أقوله عشان ما يحصلوش حاجة ، حتى اكدت على الولد وبقوله هي العربية ممكن تنزل 17 الف من تمنها مرة واحده ، قالي أنت مستغرب ليه ، المازدا نزلت 10الاف من تمنها ، وعلى فكرة لكل الفئات بتاعت مازدا ، الكلام ده يا جماعة فعلاً حصل ، انا اللي خلاني اني مكملش الإجراء بتاع الأستبدال إني حصلي مشكلة مادية تاني يوم وبالتالي تراجعت عن موضوع التغيير دلوقتي ، يا ريت حد يحاول يتأكد من المعلومة من أي فرع تاني للمصرية بس يكون وجهاً لوجه عشان التليفون أكيد مش هينفع