الموضوع: أيه رأيكم فى الفيات بونتو كلاسيك يا رجاااله

المشاركة الأصلية كتبت بواسطة ainshouka

بس ياجماعة بالنسبة لقطع الغيار

لانى قريت هنا من فترة اراء الاعضاء ان اسعار قطع الغيار غالية بالنسبة لعربية فى الفئة السعرية دى

فمعنى كده انها عمرها ما حتبقى اغلى من قطع الفيرنا ب 50 جنية زى مبتاع المعرض قال والا مكانتش حتبقى مشكلة

العربيه دى انتشرت انتشار فظييييييييييييييع انا نزلت النهارده وعندنا فى منطقه المنشيه شوفت تقريبا 7 راكنين وغير اللى شوفتهم فى الشارع ...... الانتشار بدأ والفيات شكلها هتضرب اللوجان داتشيا فى الانتشار وبما ان العربيه منتشره يبقى اكيد قطع غيارها معقوله

المشاركة الأصلية كتبت بواسطة m_wahba

انا كنت عاوز اضيف رأيى
انا جبت قيات بونتو كلاسيك موديل 2011 تقفيل صربى
و كنت يوم السبت الفات فى التوكيل بعمل صيانة ال 5000 على فكرة انا فى اسكندرية و رجت التوكيل العند الطارق
انا كنت عاوز اقول رأيى بصراحة فى العربية و التقفيل
بصراحة يا جماعة انا قبل ما اشترى كنت متردد جدا و فى ناس كمان كانت مقلقانى من الفيات و قطع الغيار و الكلام الكلنا عارفينة
بس انا توكلت على الله و اشتريتها
بصراحة بعد 5000 كم العربية ممتازة و مناسبة احتياجاتى جدا
العربية درجة ثباتها عالية بجد انا مشيت بيها لحد 155 كانت معايا كويسة و ثابتى على الأرض و دة ما كنتش حسيتة لما ركبت مرة الفيرنا مثلا بتاعت واحد صاحبى
نظام السيتى باور فوق الروعة مخلى العربية ادائها فى الزحمة و الركنات ممتاز
سحب العربية ممتاز او فوق الممتاز لحد 100 بعد ال 100 السحب بيقل تدريجى وانا بحس ان العربية بتتقل كمان بعد ما اعدى ال 100
يعنى ثبات اكتر
الصالون من جوة جميل وواسع تشيل 2 مرتاح جدا ورا حتى لو مرجع الكرسى أخر حاجة و ممكن 3 لو فيهم حد رفيع شوية
الشنطة حجمها بجد جميل بالنسبة لعربية هاتش باك على فكرة انا متجوز و عندى طفل عمرها ما زعلتنى فى سفر من الشنط و الكلام دة بتشيل مرتاح
ومرة واحدة بس اتزنقت ففتحت الكنبة الورا كان عندى مساحة بجد كبيرة جدا
بالنسبة للفخامة بجد تابلوة العربية شكلة غنى و الخامات جميلة و غنية تحس بالفخامة غير الكورى و الكلام الإحنا عارفينة الأوروبى طبعا يكسب فى الرفاهية
الكراسى مريحة جدا و كمان كرسة السواق بيطلع و ينزل فيها كمان الإضائة الأمامية 4 مستويات و دى بجد حاجة جميلة
أخر حاجة عاوز اقولها التوكيل الطارق كويس انا رحت قعدت حوالى ساعة فى صيانة ال 5000 كم بس التوكيل دة اصلا زحمة علشان هو معاة كيا و فيات و بريليانز و هايما
بس فى نايل موتورز كنت قريت خبر ان اوماترا حتفتح توكيل لقيات فى الصحراوى تقريبا يوم 9 يناير و دة اكيد حيفرق كتير
انا اسف انى طولت بس انا حبيت اقول رأيى

كلامك مشجع جدااااااااا ... ربنا يديك خيرها ويكفيك شرها والعربيه دى انا احترمتها فعلا

وانا برضو من مؤيدين انك تعمل موضوع متكامل عن العربيه دى عشان الكل يستفيد من الناس اللى محتاره زى حالاتى
واوماترا فعلا هتفتح توكيل جديد فى اسكندريه لانهم هيسحبوا التوكيل من الطارق تقريبا والله اعلم

المشاركة الأصلية كتبت بواسطة ainshouka

ازاى بس انتشرت انتشار فظيع الفيات مبيعاته قليلة بالمقارنة بالماركات التانية

البونتو نازلة من قبل اللانوس وانتشار اللانوس هو اللى يتقال عليه فظيع

السيراتو برضه يتقال عليها انتشار فظيع

التيوتا واللوجان برضه نفس الكلام

على فكرة انا ميال جدا للبونتو كلاسيك وعجبانى جدا ونفسى اشتريها

بس لما الاقى ان توكيل اوماترا سئ كده ومش موفر قطع الغيار دا غير انه مستخسر يعمل اعلانات على عربياته يبقى الناس حتعرفها ازاى من اساسه

وفى اخبار السيارات من فترة كانوا جايبين نسب المبيعات طبعا كيا وبعدين الهيونداى

ولو قولنا ان الناس مبتفهمش وكورى ايه اللى يتقارن بالاوروبى

حنلاقى برضه ان الاوكتافيا منتشرة وكانت واخدة ترتيب متقدم من المبيعات لكن فيات كانت فى ذيل القائمة

والموضوع دا كان فيه الكلام عن ان قطع الغيار غالية
http://www.nilemotors.net/nile/188642-a.html

ممكن الواحد ميكونش نزل السوق وسال عن قطع الغيار

بس اللى بقراه هنا من المواضيع بيقول كده

يعنى كل كلامى دا مبنى على كلام الاعضاء هنا

واكترهم بيقول نفس الكلام

فى عضو معانا مشكور قدم رأيه فى البونتو 2011 الصربى وعلى حد كلامه انه مواجهش منها اى مشكله والعربيه ماشيه معاه تمام ( ربنا يكفيه شرها ويديله خيرها )
لما تروح لاى حد بتاع قطع غيار هتلاقى ان الفيات رخيصه مش غاليه والبونتو نزل منها موديلات قديمه يعنى حاجتها موجوده بره التوكيل
والاخ صاحب البونتو 2011 تفضل مشكورا بتقييم توكيلها فى الاسكندريه وبرضو على حسب كلامه انه كويس
على الاقل احسن من توكيلات كتير حرام فيها كلمه توكيل
انا فى كلامى اشرت للبونتو 2011 ودى فعلا انا شوفت منها كتير جدا برغم ان انا كان مشوارى مش طويل

معظم الناس اللى بتحاول تشترى عربيه فى الفئه السعريه مابين 60 ل 70 الف جنيه اغلبهم بيدور ان العربيه دى فيها موتور قوى وده اولا فى الترتيب وبعدين بيبص على كمالياتها
وده سبب انتشار الفيرنا مثلا .. بس بيغفلو عن ان الصاج ورق والموتور اكبر من العربيه والفرامل بتزحف لان الموتور اقوى ولو حاولت تجنط زى ما بيقولو هتلاقى العربيه تقلت على حساب انك بتهلك الموتور

اللانوس انا شوفتها وكانت من ضمن اختياراتى ورأيى الشخصى - لانووووس ايام داايو مش ايام شيفروليه وفعلا عن تجربه ناس كتير وناس اعرفها معرفه وثيقه فرق شااااااااااااااااسع بين دايو وشيفروليه

وحضرتك نسب المبيعات مبتعبرش عن العربيه لان انت لو خيرت اى حد بين الاوكتافيا وفيات مثلا هيقولك لا الاوكتافيا طبعا والسبب ( الماااااااااااااااانى ) بس تعالى بقى للالمانى روح التوكيل واصرف دم قلبك انا بتكلم عن الاوكتافيا عشان انا عانيت من اوكتافيا موديل 99 والله والله والله مصاريف عربيه تانيه والتوكيل غاااااااااااااااالى جدااااااااا وده ليه ؟ عشان المانى

احنا كده بندور على الصيت تقول سكودا الدماغ تروح لاوكتافيا تقول فيات تروح لل 128
فيات شركه محترمه ومبيعاتها فى اوروبا لا يستهان بها ومتنساش ان فيات اللى عملت الفا روميو وفيرارى

وحضرتك ممكن تنزل عند محلات قطع الغيار وأسأل على قطع غيارها وأسأل ناس اتعاملت مع التوكيل
وعلى فكره مع احترامى للجميع فى المنتدى وده مش تجريح بس نقد فى ناس ممكن تقولك معلومات عن عربيه لمجرد انها سمعت عنها بس حتى مسألتش ولا نزلت ولا دورت وده لاحظته لما كنت محتار بين اللوجان والبروتون ساجا و الهيونداى الفيرنا بس عن تجربه لف وكعب داير زى ما بنقول الفياااااااات احسنهم

عايز أصحح كلام الأفندى الضايع اللى فى المعرض, العربية 60 حصان و عزم 102 نيوتن, الموتور مش قوى ولكن مناسب جدا لوزن العربية و كمان موفر جدا فى البنزين
بالنسبة لقطع الغيار لو قارناها بالفيرنا مش هاتبقى أغلى ب50 جنية!! لأ هاتبقى الضعف فى أغلب الأحيان لو برة التوكيل و لو فى التوكيل بتبقى 3 أضعاف السعر, بس الفكرة ان القطع الايطالى طبيعى تبقى أغلى علشان أنظف و كمان الواحد مش بيعمل حادثة كل يوم يعنى

انشاء الله حعل قريب تقرير مصور عن العربية

و بالنسبة لتوكيل الطارق موجود فى شارع السكة الجديدة دة فى المنشية
وانا عرفت برضة من المنتدى ان اوماترا حتفتح توكيل على الصحرواى و عرفت انة بوم 9/1
انشاء الله
و لو فى اى استفسارات انا تحت امركم