ماذا لو انهارت الأهرامات؟

**mohamed ali** · 26-03-2008 11:15 PM

همه اكيد بيقولوا الكلام دا علشان يعرفوا الناس ان الاهرام مصيرها مش مامون حاليا ولذلك ستقرر
الحكومه بيعها وخصخصتها علشان بتخسر ومش جايبه تكاليف الصيانة
وبعدين انتوا زعلانين ليه اذا كانت الاهرام عاشت 5000سنه فيه عندتا الي هايعيش25000سنة

**mohamed ibiza** · 26-03-2008 11:22 PM

لو الاهرامات زاهي حواس هيطلع يفبركلنا كلمتين و يقولك لعنة الفراعنة هي السبب يا جماعة الفراعنة هدوا الاهرامات علي دماغنا عشان بس الملك خوفو كان اعد مع مراته بيقولها عايز اتغدي بامية قالتله اخلع من نفوخي اخرك ترمس عشان كده الملك زعل و هو بيفش غله الهرم وقع هي دي كل الحكاية يا جماعة شوية كده بس الملك هيهدي و يرجع الهرم تاني...........

Ibiiiiiiiiiiiiiiiiiiiiiiiiiiiiiiiiizzzzzzzzzzzzzzz zzzzzzzaaaaaaaaaaaaaaaaaaaaa For Ever

**ayman_elkholy** · 26-03-2008 11:31 PM

اعتقد انة لو انهارت الاهرامات لن يتحرك ساكنا لاحد
وإلا لما لم يتحرك ساكنا عندما انهارت مصر بأكملها

طيب تخيلو لو فى الفترة القادمة سمعنا عن بيع قناة السويس هل يظهر جمال عبد الناصر مرة اخرى

**Dr Ahmed** · 27-03-2008 12:28 AM

نشرة أخبار التاسعة:

فى الثانية من ظهر اليوم وفى فاجعة لم يسبق لها مثيل إنهار هرم خوفو التليد ، وذكر شهود عيان أن الأحجار المتساقطة كانت كالشلالات التى جرفت فى طريقها أفواج السياح والمصريين المتواجدين حول الهرم وقت الانهيار ووصلت الأحجار لشارع الهرم لتهدم بعض الكباريهات الخالية من الرواد صباحا..
وقد أعلنت القيادة الأمريكية عن عزمها التدخل لإنقاذ عشرات الأمريكيين تحت الأنقاض حيث كان داخل الهرم فريق بحث أمريكى لكشف أسرار الهرم قبل إنهياره بعدة ساعات ..وأعلنت أن هذه المهمة قد تستغرق عدة سنوات..
وأعلنت وزارة الداخلية عن حملة واسعة لتعقب الإرهابيين الذين يشتبه فى تورطهم فى إنهيار الهرم وتفجيرات شرم الشيخ حيث اعتقلت المئات من البدو والإخوان وطلبة الجامعات لإستجوابهم..
وبدأت وزارة إنعدام الثقافة فى إحاطة باقى الأهرامات بأسياخ حديد عز وأسمنت السويس لمنع إنهيارات محتملة مع إعتراض حركة كفاية أن هذا التدخل سيعجل بإنهيار باقى الأهرامات..
وننتقل إلى أهم الأخبار حيث فاز الفريق القومى بكأس الأمم للمرة ال........

**Noha.M** · 27-03-2008 01:54 AM

المشاركة الأصلية كتبت بواسطة aif

قبل ما تنهار ح يكون فية ارهاصات
مثلا :
وزير الثقافة ح يعمل مؤتمر صحفي عالمي يؤكد فية سلامة الاهرامات من كل ردي
وتطلع اخبار في الجرايد انه لاصحه للاشاعات المغرضة اللي بتنقال علي الاهرامات وبتهدد بحبس مروجي الاشاعات زي ما عملو مع مصطفي بكري ( خلي بالك يا علا .. الكلام لك يا جاره )
ح تطلع اعلانات في الجرايد مؤداها انه لا علاقة بين اشاعة انهيار الاهرام وشركة الاهرام للمشروبات والخمره و جريدة الاهرام
وح يطلع زاهي افندي حواس يطمن العالم ان اهرامات الفراعنة لن تنهار وستبقي ما بقي الزمان وطبعا ح يكون لابس برنيطة جيمس بندق اللي بيلبسها دي
ورئيس الوزراء ح يطلع يقول لامساس بالاهرامات
واخيرا وزير الداخلية ح يصدر بيان ان اصل هذا الموضوع الذي لا اساس له من الصحة أحد الاشخاص المختلين عقليا وان الوزارة تسيطر تماما علي الوضع والامن مستتب

وبعدين طااااااااااااخ
الاهرام وقعت يا رجالة

وكل الكلام اللي فات يلف 180 درجة والكلام يبقي بالعكس
والشرطة تعتقل 3000000 عضو نشط في جماعة الاخوان المسلمين المحظورة بتهمة هدم الاهرامات
تصبحو علي خير

ههههههههههههههههههههههههه ه

مسخرة ياابراهيم بجد وقتني من الضحك بس عندك حق

و لعلمك باة احنا شخصيا هنقابلها بلا مبالاة

اذا كان قتلو البنت على الحدود و موتو الصياد الغابان اللى فى مركب و احنا ساكتين و معلش برضه عمر شوية حجارة ما كانت اهم من روح البني ادم !! .. و سكتنا يبقي هنيجي عند الهرم و هنتحرك

الناس مش هتبقي فاضية اصلا هيبقو واقفين فى طابور العيشّّّّّّّّّّّ!!!!!!!

**Hassan Khalil** · 27-03-2008 02:00 AM

المشاركة الأصلية كتبت بواسطة aif

وبعدين طااااااااااااخ
الاهرام وقعت يا رجالة

وكل الكلام اللي فات يلف 180 درجة والكلام يبقي بالعكس
والشرطة تعتقل 3000000 عضو نشط في جماعة الاخوان المسلمين المحظورة بتهمة هدم الاهرامات
تصبحو علي خير

:p :p :p :p :p :p :p
سيناريو تحفة يا استاذ احمد .. واضح ان نفسك مفتوحة الايام دي للكتابة ..
و انت من اهل الخير

**Chicco** · 27-03-2008 04:08 AM

ليه بس يا علا ....ده واحد من الهواجس إلي بيؤرقني و حاسس إنه حيحصل قريب كمان
السيناريو المتوقع : ولا حاجة...... لا مبالاه متناهية .... أسف على نضوب الابداع

طيب بص فوق كده حتة صغيرة على سيناريو أخوك aif و شوف الإبداعات
طيب نتكلم جد شوية.. انت ليه الموضوع ده من الهواجس اللي بتؤرقك؟ و يا ترى هاتحس بإيه لو ده - لاقدر الله - حصل؟

بصي يا ستي حارد برضه في نقط
-أعراض الشيخوخة باينة على الاهرام بقالها شوية حلوين حتى لو قارينتي صور متاخدة قريب بصور قديمة (مش لازم قديمة قوي زي الصور التحفة اللي كانت في موضوعك :) ) حتلاقي الفرق واضح

-مافيش أي اعتناء حقيقي بالكنز ده كله همبكة من أراجوزات من طراز حواس و غيره ده غير البعثات الاجنبية اللي نازلة تنخور في داخل الاهرامات بترخيص من الحكومة الرشيدة

-سبب من أسباب صمود الاهرام وقوعهم في منطقة صحراوية جافة انما نمو القاهرة العشوائي احاط الاهرام بمجتمعات سكنية و عشوائية ده غير الدائري بقوسيه و الطرق التانية اللي شايلة نقل تقيل و تريلات و بلاوي

-أبو الهول المسكين حالته أسوأ و المياه الجوفية حتبوشه قريب

-الحكومة و الشعب بايعين القضية ......الحكومة تيت تيت تربتت تيت و الشعب فيه اللي مكفيه

بالنسبة ليا الاهرام هي رمز مصر و لو بيدي أحطها على العلم بدل النسر أو الصقر و انهيارها حيبقى كناية عن فقد الامل في وقف إنهيار البلد كلها

**noon_eg** · 27-03-2008 04:27 AM

فى الحقيقه انا فكرت فى الموضوع ودرسته جيدا ونظرا لان درست جيولوجيا وهندسه انشائيه اقدر اقول ان الاهرامات من اكثر الابنيه ثباتا فى العالم ومن الصعب للغايه ان تنهار حتى مع وجود منسوب عالى للمياه الجوفيه لانها مكونه من صخور عاليه الصلابه

ولكن المهم اننا فى مصر المحروسه ولله الحمد عندنا خطه استراتيجيه بديله لو حصل لا قدر الله نهيار للاهرامات الا وهى اننا نجيب رمز كبير جدا من رموز مصر قادر على الصمود فى وجه الزمن ويمكن ان يكون عامل جذب للسياح لانه عجيب فى تكوينه ومتفرد ونحطه فوق اطلال الاهرامات وانا متاكد انه بحق حيكون الهرم الرابع لمصر وده لازم يكون مضمون ويكون امضى 25 سنه على الاقل فى خدمه الوطن ويكون تاريخ صلاحيته هو او ذريته ممتد اى اى اقصى وقت ممكن وده طبعا حيكون بالاتنخاب لاننا بلد ديموقراطى وعجبى

**OlaOsman** · 27-03-2008 05:58 AM

المشاركة الأصلية كتبت بواسطة karim_monir

طالما حلاوة بحلاوة هاقول وامري لله
اتخيل تدخل امريكي اسرائيلي في المنطقة ووجود قوات من الامم المتحدة وقوات حفظ السلام
عشان احنا مش عارفين نحافظ على الاهرامات والاهرام دي اثر عالمي ملك لكل العالم والمصريين مش عارفين يحافظوا علية زي عوايدهم المهملة في كل شيء
وتكون دي خطوة البداية
قوات
مدرعات
سياج امني حوالين الاهرام
تدخل سياسي بسبب الاهرامات والاثار
وحماية السياح من خطر المياه الجوفية اللي ممكن تجيبلهم انشلاح في البرنتاح
دي البداية فقط

صح يا كريم.. سيناريو مؤكد.. و ما تنساش ان الاحتلال الأجنبي لمصر تسرب بطريقة مشابهة لما كان الخديوي اسماعيل بيستلف من انجلترا و فرنسا و لما لقوه بيصرف بسفه قاموا عينوا قيم على الخزانة المصرية عشان يحمي مصالحهم في مصر.. و هكذا كان أول التدخل لحد ما دخلوا مصر و احتلوها.

**OlaOsman** · 27-03-2008 06:08 AM

المشاركة الأصلية كتبت بواسطة amr mokhtar

مصر حاليآ مش هى الأهرامات .. مصر حاليآ هى مصر ....(من خمس حروف)

و بعدين هما خلاص زهقوا من الأهرامات .. لما ييجوا يبقى يروحوا الأقصر أو أسوان أو بورتو سخنة

طيب واحنا؟ و مسؤوليتنا اننا نحافظ على أثر زي ده سواء الأهرامات او ابو الهول؟ بس اللي انا متأكدة منه انه ساعتها مش هاتسمع حد في الإعلام بيقول لك احنا ولاد الفراعنة