الموضوع: عايز اروح الأهرامات

جزاك الله خير يااستاذ محمد
الولد كويس الحمد لله ومش بيشتكي منها خالص دلوقتي وبصراحه لسه مفيش وقت اروح بيه خالص بس انا لقيت دكتور اسنان في العماره اللي قاعد فيها عايز احجز بكره ان شاء الله

بالنسبه للوصفه اعتقد ممكن انزل بتاعة المريوطيه دي لان فعلا اخر 2 كيلو في الدئري بيبقو زحمه قوي عشان الأصلاحات والطريق بيضيق من قدام

يا جماعة مش معقول يبقى معاكوا مرشد سياحى فى المنتدى ومتروحوش الاماكن ديه خالص.لازم نعمل مقابلة للمنتدى هناك ولا ايه :)

بالنسبة للعضو الفاضل ياريت رقم تيلفونك او ابعتلك رقمى على الخاص .

المشاركة الأصلية كتبت بواسطة ayman-ahmed

يا جماعة مش معقول يبقى معاكوا مرشد سياحى فى المنتدى ومتروحوش الاماكن ديه خالص.لازم نعمل مقابلة للمنتدى هناك ولا ايه :)

بالنسبة للعضو الفاضل ياريت رقم تيلفونك او ابعتلك رقمى على الخاص .

استاذ ايمن جزاك الله كل خير
ممكن تفيدنا هنا عشان كل الأعضاء تستفاد؟

المشاركة الأصلية كتبت بواسطة shaddadfalcon1

استاذ ايمن جزاك الله كل خير
ممكن تفيدنا هنا عشان كل الأعضاء تستفاد؟

جزانا الله واياكم.

الموضوع شرحه طويللللللللللللللل.

بسم الله الرحمن الرحيم :

-بصوا يا جماعة اللى يروح منطقة الاهرام يبعد عن الاعياد والمناسبات لانها بتبقى زحمة جدا ويفضل الجمعة او السبت.

-مدخل الهرم الرئيسى عند فندق المينا هاوس واول ما تقرب من اخر شارع الهرم يعنى من عند جاد وهتلف هتلاقى ناس واقفة وبتحاول توقفك وواللى ممكن ينط على شنطة العربية واللى ينط على الكبوت ويقعد اودامك ودول انسب حل ليهم تقفل ازاز عربيتك ومن جوة العربية شكرا او تطنشهم خالص وتكمل طريقك وهما مدربين كويس وبيعرفوا يقدروا الموقف واذا كان اللى جاى هيقف ولا فاهم حركاتهم.بما معناه لو كملت مشى مش هيقطعوا الطريق عليك.

-بمجرد ما تطلع المطلع هتخش يمين عشان توصل لشباك التذاكر.هتركن العربية على الشمال وامين الشرطة هيشوف الرخص ويبص بصة فى العربية وتنزل اللى معاك يخشوا من البوابة ويشتروا التذاكر.هنا بقى اللعب كله بمعنى انه لو ستات لوحدهم هيضايقوا ولكن انصح بالاتى :

بعد الامين ما يشوف التذاكر قوله هسيب العربية 5 دقايق اروح اجيبلهم التذاكر واجى.تركن العربية اودام شوية و تروح جايب التذاكر ( 2 جنيه للافراد-و2 جنيه للعربية) والاطفال اقل من 5-6 سنين ببلاش.

تجيبلهم التذاكر ويعدوا من على البوابة وتاكد عليهم اول ما يعدوا البوابة ولا يروحوا يمين ولا شمال يقفوا يستنوك لحد ما تطلع العربية من البوابة وتورى الامين هناك تذكرتك وتذكرة العربية.تعدى وبرده تطنش اللى واقفين واللى يقولك اوريك المتحف .طب جمل للعائلة.طب كارتة.طنش كله وكمل علطول هتلاقى على شمالك بارك الملاكى والعربيات الصغيرة(مفيش يفط).اركن العربية وبص على يمينك هتلاقى البوابة اللى واقفين عندها الاولاد انزلهم من على السلم وهاتهم وبرده طنشوا كل الكلام وواحد يقولك اشوف التذاكر ده بالذات تقوله لا بخش ببلاش وتمشى وتسيبه وابدا بقى اتمشى لحد الهرم الكبير وصور زى ما انت عاوز وبعد كده اتمشى لحد ورا الهرم من شماله هتلاقى 3 اهرامات صغيرة(اهرامات الملكات) دخولهم ببلاش ولكن مش سهلين لو (الضهر بيوجع-فوبيا الاماكن المغلقة) .

-خلصت المنطقة ديه ولو مش عاوز تخش متحف مركب الشمس ارجع للعربية واطلع على الهرم التالت لو غاوى تصوير ولكن لو عاوز تذكرة ليه يبقى تشتريها من اول مكان وقفت عنده خالص وانت داخل المنطقة.

-خلصت الهرم التالت يبقى تكمل سواقة والهرم التالت على شمالك هتلاقى هضبة عالية (البانوراما).اركن على الشمال مع العربيات الصغيرة برده بس خلى بالك من حافة الهضبة. تاخد صور للتلات اهرامات من هناك ولو حابب تركب جمل او حصان يبقى من هناك ب 5-10 جنيه تمشية بسيطة وكام صورة وخلاص ويستحسن تتفق الاول.

-الجمالة فيهم ناس كويسة ولكن لما تتفق متدفعش الا لما تخلص الركوبة وتنزل وتدفع الفلوس وتمشى ولو اللى اتفق معاك غير اللى جر الجمل او اللى ساعد الاولاد وحابب تديله حاجة اديله.

-ارجع على عربيتك وكمل سواقة علطول لحد الهرم التانى على يمينك والاول على شمالك وانزل لحد ابو الهول على يمينك وكمل مع الطريق وابو الهول على يمينك لسة كمل مشى لحد البارك فى وشك اركن العربية والتذكرة بجنيه وارجع لابو الهول وصور زى ما انت عاوز برده واوصل لحد مدخل المعبد(الدخول بنفس تذكرة المنطقة) اللى هيوصلك لابو الهول واتفرج على الروعة الهندسية(لو غاوى) فى حجم الاحجار وتقطيعها.وصور وقضى الوقت اللى عاوزه وبعد كدة ترجع على العربية وتخرج من البارك واول ما تخرج تكسر يمين فى شمال هيبقى الصوت والضوء على شمالك وعلطول لحد ما توصل للرئيسى برا وهنا بقى الاختيار ليك عاوز شارع الهرم تانى يبقى تخش شمال.لو عاوز الدائري يبقى تخش يمين لحد اخر الطريق وعند نقطة الشرطة العسكرية شمال هيبقى فى وشك مطلع الدائرى وبالسلامة بامر الله.

نقاط مهمة :

-تذكرة دخول المنطقة تخليها معاك عشان هتستخدمها فى اهرامات الملكات والدخول لابو الهول.

-اللى هتحتاجه (مياه مش اقل من 3 ازايز لو الجو حر-اكل عشان لو فى اطفال وجاعوا-بلاستر عشان لو حد من الاطفال لا قدر الله وقع وهو بيلعب)

-الحمامات (انضف اتنين : اللى عند بوابة الدخول وده الرجوع ليه صعب لو بعدت عن الهرم الاول والتانى عند ابو الهول وده الدخول بتذكرة بجنيه على ما افتكر)

-لو ناوى تاكلهم بعد اليوم ولا حاجة وناوى على كنتاكى او بيتزا يبقى اول ما تخرج يمين فى شمال من البوابة هتلاقى الاتنين على يمينك.اركن بعدهم فى بارك(عبارة عن ساحة واسعة شوية واوعى تركن على الشارع برة)

بس خلاص ولو افتكرت حاجة تانى هكتبها بامر الله.