اقتباس:
المشاركة الأصلية كتبت بواسطة qazqaz123
للاسف انا متعاطف مع بتاع الجيش
لية -الناس دول غلابا وبيتحطوا فى ظروف عمل نفسية غير طبيعية لاقصى حد
فياريت الناس هنا تحاول تفكر شوية الراجل كان مستعجل وفى حالة نفسية سيئة وهياج
اكيد ماكنش رايح يقابل خطيبتة على الكورنيش -وحظك كدة جة فوشة
هو اكيد غلطان
بس انا متاكد انة فى ظرف او وقت تانى كان ممكن هو اللى يعتذرلك
السلام عليكم و رحمة الله و بركاته
اسمحلى و بكل احترام و اجلال لرأى سيادتك, أنى أختلف مع سعادتك فى الرأى!!!! , لأن كل واحد ظروف عمله تبقى صعبة عليه , يروح يلطش فى خلق الله, النهاردة كل واحد من أفراد الشعب المصرى بيبقى ماشى فى الشارع و هو عنده مشاكل لا حصر لها و هو أكيد ماكانشى رايح يقابل خطيبته عالكورنيش, بس برضه ماكانشى فيه معركة بين مصر و اسرائيل فى طريق صلاح سالم رايح يلحقها عشان يدافع فيها عن تراب مصر, لأن أكيد الظابط ده ماكانشى رجل المستحيل ( أدهم صبرى ) :colsmil: و لا حاجة .
و بعدين هو ايه اللى جابره على كده , مش هو اللى لما جاب 67.75% فى الثانوية العامة زيه زى البلطجية بتوع الشرطة و زى بتوع القضاء, راح جاب وسايط الدنيا و الآخرة و دفع فلوووووووووووووووووس ياما , عشان يدخل الكليات دى , أكيد مابيعملش الكلام ده كله حبا فى تراب مصر الطاهر و لا بيعمل الكلام ده عشان يرفع اسم مصر عاليا و خفاقا و لا بيعمل الكلام ده ابتغاء مرضات الله , ده بيعمل الكلام ده عشان يحصل على وظيفة براتب كويس و امتيازات حلوة من سكن و عربية و معاش و خلافه و كمان برستيج و ممكن بتوع الجيش يتلزقوا فى البلطجية بتوع الشرطة و يبلطجوا زيهم و آهى كلها بدل و كلها نجوم على الأكتاف و خلاص .
هو لو شايف أن الشغل ده ظروفه قاسية عليه أوى كده و فوق احتمال البشر و أنا بشك فى كده, ممكن يسيب الشغلانة المقرفة الصعبة جدا جدا جدا دى و يشوف شغلانة تانية أريحله و أسهله و كمان هو مابيشتغلش ببلاش , ده بيشتغل بامتيازات كبيرة جدا بالمقارنة بأى فرد عادى من المجتمع المصرى, ده كفاية المستشفيات اللى معموله ليهم مخصوص دونا عن أفراد الشعب المصرى, يعنى الحكومة الذكية بتاعتنا عامله برنامج رعاية صحية للناس دول هما و أسرهم و مش عاملة الكلام ده للمواطن المصرى العادى, كما لو أن المواطن العادى مش من حقه يمرض و يتعالج و لو مرض و ممعاهوش فلوس , يرموه فى أى حته لحد مايموت و خلاص.
مفيش هناك أى تعليل و لا عذر و لا تفسير لأن واحد عنده مركب نقص و عقد , أنه يستخدم السلطة اللى معاه فى البلطجة و استعراض العضلات على أفراد الشعب المصرى .
و بعدين هى الظابط ده, اللى بيعانى من الظروف القاسية أوى دى فى شغله, لما بلطج على راجل مصرى محترم و متفوق بدليل أنه هيبقى طبيب و استعرض عضلاته على الراجل و أسرته , كده بقى الضغط الرهيب اللى عنده راح و نفسيته ارتاحت .
أنا ليا خالى لواء جيش عالمعاش , كان المفروض بأه أنه يمشى فى الشارع يتف عالناس و يضربهم بالجزمة بأه و لا ايه !!!!!!!!
العيب مش عليه , العيب على الكلاب اللى ماعرفهوش هو دوره ايه بالظبط فى المجتمع و أنه ايه المطلوب منه بالظبط للبلد دى و ده فى حد ذاته عادى , و يعتبر سبب من الأسباب الكتييييييييييييييير أوى للحال المهين و المذل اللى احنا وصلناله كمصريين , جوه مصر و بره مصر , و العيب كمان على الأخ المحترم الفاضل اللى معاه جنسيتين و ماعملش حاجة عشان يحفظ كرامته هو و أهل بيته, لكن معلش, تتعوض المرة الجاية ان شاء الله و اللى جاى أكتر من الرايح.