الموضوع: حالتي النفسية سئية جدا جدا بعد وفاة والدي

المشاركة الأصلية كتبت بواسطة hemalotfy

السلام عليكم

اولا انا لله وانا اليه راجعون

فات تقريبا شهر على وفاة والدي الله يرحمه لكن كل ما الوقت يعدي بزداد حزن عليه اكتر ومش ببطل تفكير فيه
بصراحة عمره ما حرمنا من حاجة وعمره مازعلنا ولاضربنا واحنا صغير , ربنا تربية كويسه حفظنا القران كان بيصحينا لصلاة الفجر كنا بنخاف منه و بنتكسف منه جامد ما نتكلمش الا اذا سالنا على حاجة (مش ديكتاتورية ) لكن كان احترام ليه
كان بيحبني جدا جدا جدا وكان بيحب مراتي وبنتي يمكن اكتر مني وكل ما يكون قدامي فرصة سفر هو يرفض مكنش بيحب ابعد عنه على رأي ووالدتي ربنا يحفظها (ابوك روحه فيك)

والدي سافر السعوديه وكان مدرس قران في مدارس تحفيظ القران الكريم هناك, كون مستقبلنا بنى لينا وعلمنا وجوزنا كلنا والحمد لله ده فضل الله ثم فضله

ووالدتي الله يكون في عونها زعلانه زعل شديد وبقالها اسبوع عيانه وعندها قرحه في المعده والتهاب رئوي وحالتها النفسية سيئة جدا ومتبطبلش بكاء عليه
كان محبوبا جدا في السعودية حتى لم كتب استقالته وجه ينزل والله العظيم في ناس بكت هناك وقالو يهون علينا حد من اولادنا يموت وانت متسافرش

سبحان الله والدي توفى بسبب جلطة في جذع المخ ولكن كل يوم بسأل نفسي عدة اسئلة وبتندم اشد الندم
وبقول ياليتني وديته لدكتور فلان يارتني كنت عمل ياريتني كنت سويت ( اعتقد اني محتاج اجدد ديني)
يوم ما مرض كان يوم السبت كان بيتكلم وكان كويس عملنا اشعة مقطعية وضهرت انها بوادر جلطة في جذع المخ
الدكتور سئله عدة اسئله واجاب عليه وكتبله العلاج التالي
1- سيربولايزن 5 ملجرام حقنة يوميا
2- كليكزان 8000 حقنه يوميا تحت الجلد
3 - بلافكس (تقريبا) حبه قبل العشاء
وسالت الدكتور يومها قلتله هيحتاج يدخل مستشفى قال لا حالته كويسه وميستدعيش وعلى يوم الاربعاء هيكون كويس
بدا يدخل في غيبوبة يوم الاثنين ساعتها اتصلت عليه قالي هاته وتعالى ندخله العناية المركزة
لكن قدر الله جه يوم الخميس المغرب وتوفى

بسال نفسي اساله كتير

العلاج والحقن اللي اخدها دي معملتش اي نتيجة نهائيا ليه او حتى فضل الوضع كما هو عليه ؟!!
لو كان دخل العناية من اول يوم كان ممكن يعيش ؟!! (دي فيها اعتراض وكفر ولا ايه مبقتش عارف من كتر الوسوسة)
لو كنا رحنا لدكتور فلان كان ممكن الحال يكون احسن ؟!
لو .. لو .. لو .. لو .. !!!!!!!!

استغفر الله العظيم

انا حالتي زفت وبقيت امشي اكلم نفسي

__________________________________

صديقي العزيز ،،،

اسئل الله ان يهون عليك و علي أمك و علي اسرتك اجمعين .

بس في نقطة مهمة ارجوك تسمعني بصدر رحب هيا ما تختلفش عن باقي الأعضاء المحترمين اللي شاركو معانا

سئوالك عن إذا كنت مقصر إتجاه والدك ام لا ؟

بتأكيد كل اللي في دماغك ده من الشيطان و انت لم تقصر في شي علي الإطلاق و الشيطان يحاول يطلعك بره طوع الله و يخليك تسأل سئوال زي ده ، الأعمار بيد الله و لازم تعرف إن الله عز و جل يجعل للموت سبب لكي يهون علي الإنسان الصدمة و المصيبة فيجب ان تركز في قران الكريم و تهدئ و تتمالك أعصابك و لا تجعل للشيطان مدخلا لك و يبدء دخول الشيطان من كلمة كان يجب اعمل كذا ، او لو كان المفروض .... أرجوك تمالك نفسك من أجل أمك فأنت السند لها في الدنيا حاليا ، يجب ان تراك متماسكا .
انا أعلم إن الكلام إلي انا بقوله مش سهل خالص و يكاد ان يكون مستحيلا لأن لوعة الفراق صعبة ، حارقة في القلب و لكن إذا كنت تحبه فعلا فجعل له صدقة جارية - و داوم علي الدعاء له و ود أصدقائه إذا كنت تعلمهم و صل رحمه الذي كان يصله تسعد به و يسعد بك و تحس إنك الإنسان الوحيد الذي لم تبتعد عنه و يجازيك الله كل خير و يجعله في فسيح جناته بإذن الله . و الله أعلي و أعلم

و إن الله و إن إليه راجعون.

فكر في كلامي و لو لضع دقائق لإني حاسس بيك أوي .