فرغلى
-------------

لى صديق شكاك بيشك فى كل حاجة حواليه حتى اقرب الناس ليه
فى يوم قاللى امى دى بتعاملنى معاملة غريبة قوى تفتكر ليه؟قاعدين عالفطار ونازلة دلع فى الواد حمادة اخويا وعمالة تاكله بايديها وانا مصدرة لى الطرشة

قلت له:حمادة اخر العنقود

برضه كمل:وابويا قاعد وشايف بعينه كل حاجة ومتكلمش
ده اضطهاد بقى ولا ايه ولا انا مش ابنهم


واه بقى لو ضحكت بسبب او من غير سبب قدام فرغلى لأ خللى بالك
هيقولك ايه بتضحك على ايه يا جدع انت انا فاهمك كويس الضحكة الصفرا دى انا عارفها ايه اراجوز انا قدامك!
الكلام ده كله قاله لواحد صاحبنا كان بيخرج شوكة انحشرت بين سنانه فاضطر يفتح بقه ومكانش بيضحك اصلا


ولا لما رحنا نخطبله
قال الست امها دى غريبة متطمنش تبقى بتكلمك انت وعينيها على انا مراقبانى طول القعدة
قلت له الست مظلومة انت ملاحظتش ان عندها حول!
وفى فترة الخطوبة لاحظت انه بينزل كل يوم من 7 ص ويرجع وينزل ويرجع ولما سألته عرفت انه بيراقب خطيبته
قلت ليه يا فرغلى انت شفت عليها حاجة؟

قال لأ لكن مش هيغمض لى جفن لحد ما الاقى الدليل
قلت الدليل على ايه

انها بريئة زى ما بتحاول تبين لى

وفى يوم جالى محطم قال متثقش فى حد بعد كده تعال اوريك بعينيك
رحنا النادى لقينا جنبها شاب وسيم وبيضحكوا فى سعادة
قعدت اضحك
قال بتضحك على ايه دلوقت

مش ملاحظ الشبه ياعم ده اخوها التوءم

طب وايه اللى يجيبها معاه مكان زى ده تقصد ايه جاية تشتكى له منى ولا عاوزة تفسخ الخطوبة هه



ومنساش فى ليلة ما كنا مسافرين رحلة وصحانى من عز النوم وهو متعصب وشعره منكوش وبيلف فى الأوضة بغيظ
فى ايه
نعم هتعمل مش سامع قوم

انا مش سامع حاجة
يعنى انا مجنون بيتهيألى حاجات

وفعلا بتركيز جامد سمعت صوت شخير زميلنا من الأوضة اللى جنبنا

يقصد ايه بيشخر وهو نايم عشان ما نامش مش كده مش عايزنى اطلع الرحلة او عاوزنى اروح مش نايم ولا عاوز يبوظ اعصابى
اه ماهو طول عمره مبيحبنيش انا احس الحاجات دى

الشك مرض
وانا اشتغلت فرغلى فى يوم خليت صاحبنا يعدى عليه ويقول مساء الخير مش اكتر ورحت قايل هو يقصد ايه يعنى؟
بيهزر ولا بيتريق ولا فايق عليك يعدى مخصوص عشان يقول مساء الخير

وفعلا بدأت الحالة
صحيح يقصد ايه مناسبتها ايه يعنى عاملنى تريقة يعنى لما اروح اضربه دلوقت يبقى كويس
انت سمعته قال مساء الخير يا فرغلى ومقالش يا جو

ايوه
يعنى جاى قاصدنى انا بقى يبقى حاططنى فى دماغه انا هعرفه شغله
وجريت وراه احاول انقذ صاحبنا



ياترى قابلت كام فرغلى ؟