ياريت ياجماعه اللى معاه جنسيه تانيه يقولنا هو اخدها ازاى او اللى بيفهم فى الموضوع ده يناقشنا شويه عنه
وايه اسهل جنسيه ممكن الواحد ياخدها وايه اللى يعمله
ياريت حد يفيدنى عشان الموضوع مهم بالنسبالى
عرض للطباعة
ياريت ياجماعه اللى معاه جنسيه تانيه يقولنا هو اخدها ازاى او اللى بيفهم فى الموضوع ده يناقشنا شويه عنه
وايه اسهل جنسيه ممكن الواحد ياخدها وايه اللى يعمله
ياريت حد يفيدنى عشان الموضوع مهم بالنسبالى
هذا طريق معقد ولا تضيع وقتك فيه - يمكنك ان تحصل على فرصه فى دول الهجرة -امريكا وكندا واسترليا اذا كان معك تخصص مطلوب عندهم - ولكن كما قلت طريق معقد - لو بذلت نفس المجهود فى مصر ربما يكون افضل - واذا حصلت فرصه عمل فى الخليج ربما يكون اسرع فى تحقيق طموحك وبالتوفيق
انا لما حسيت ان الموضوع ده مهم وفي نفس الوقت مستحيل عليا فكرت شوية وقلت اللي انا ملحقتش اعمله ابني يلحق والحمد لله الماديات سمحت لي باني اسافر انا والمدام الي امريكا وهي في شهرها ال6 ووضعت مولودها هناك وتلقائيا حصل علي الجنسية
ورجعت مصر وابني امريكاني
بس صدقني صرفت مبلغ مش عايز اذكره عشان محدش يشتم
كفاية ااقولك انه تمن بي ام موديل 2011
متااابع........وياريت اللي حصل عليها يقولنا بتفرق في ايه........هو معروف طبعا بس اللي واخدها يحكيلنا
أنا يا باشا معايا الجنسية الكندية .. والدي و والدتي هما اللي عملو هجرة و طبعاً العائلة كلها مع بعد .. لو عاوز تعرف المميزات أنا لما أنزل مصر بالباسبورت الكندي الراجل بتاع التفتيش مش بيفتح الشنطة بس طبعاً أنا بكون داخل عليه بكل ثقة و بتكلم إنجليزي و طبعاً مفيش كلمة عربي .. زمان أنا مرة كنت ماشي بليل في وسط البلد و أمين شرطة طلب البطايق طبعاً أنا ما كنش معايا بطاقة رقم قومي ساعتها أصحابي طلعوا البطاقة وانا لأ الأمين بيقولي و إنت طبعاً تنحت كالعادة و بقولو نو أرابيك يعني مفيش عربي طبعاً هو افتكر اني بحور عليه طلعتلو الباسبورت و قالي جو جو هههههة و صاحبي معاه الجنسية الأمريكية و كل لما ينزل مصر يتخانق مع توب الأرض و لما يروح القسم بيطلع على طول دايماً ماشي و معاه الباسبورت
الجنسية التانية حماية ليك على أرض المحروسة
لو حد بصلك بصة ماعجبتش من بتوع الأمن..إسحبه من قفاه على القسم ...وقوله هكلم السفارة
حد شاف فيلم عسل اسود لما احمد حلمى طلع الباسبور للكلب الشرس بتاع الامن والكلب قلب قطه بلدى.....
نفسى اشوف مصر احسن .......
انا شايف ان مش صح ان يبقي معايا جنسيه تانيه لمجرد اني اتنطط علي خلق ربنا - طيب كده سبت ايه للظباط الصغيرين اللي كلنا مخنوقين منهم؟
انا لو معايا جنسيه تانيه اكيد هبقي مبسوط بس استخدمها وقت اللزوم فقط لما الاقي اني هتظلم او حد هيتنطط عليا
لكن في مطار وانا ماشي واتكلم انجليزي وبتاع شايفها صعبه شويه
يا باشا ماهو لو أنا اتكلمت مصري هيعرف اني مصري سيبك إن هو هيعرف اني مصري من إسمي بس لو عرف صباح التلكيك و إفتح الشنطة و بتاع لاكن إنت داخل عليه بتتكلم إنجليزي هيقولك يا عم ده أجنبي و مش عاوز وجع دماغ .. طيب أنا هقولك موقف أنا كنت خلاص خلصت و خلاص طالع عند المنطقة اللي فيها مكاتب الليموزين و إنت عارف بقى الفيلم تاكسي يا باشا لموزين يا بيه كانت رحلة ايرفرانس واصلة مع نفس الرحلة بتاعتي المهم كان فيه واحدة فرنساوية جانبي ماشية و فيه واحد من بتوع الليموزين اصطادها طبعاً هما مش بتوع الحاجات ديه راحت الأخت زعقت بصوت عالي نووووو طبعاً أمة لا إله إلا الله إتلمت و بتوع شرطة السياحة طبعاً مسكو الواد و فضلو يعتذرو للست .. أنا طبعاً علشان باين اني مصري مفيش حد عبرني زي بظبط في فيلم عسل اسود لما لطفي لبيب قال لأحمد حلمي أنا مباركبش مصريين هههههههة
هي بتبقي حظوظ كده
انا كل مره في المطار الحمد لله مفيش حد بيتعرضلي ولا حتي بيشوفو الشنط - ده انا حتي ببقي ناسيهم خالص وابص الاقي اللي بيندهلي ايوه ياستاذ معاك حاجه عليها جمرك اقوله لا يقولي طيب اتفضل وشكرا
بتوع الليموزين بقي اللي لازقه- يقولي رايح فين هوديك الحته اللي انتا عايزهه ومعايا عربيه مش عارف ايه
بيبقو حاجه نفخ وبصراحه يسيئو لمنظر البلد من اول مااي حد غريب يشوفهم
الكوسه بقي ياباشا بتعمل احلي واجب
اول مره سافرت كان من برج العرب ويومها امين شرطي صاحبي يعرف مدير امن المطار وكلمه وقاله ابن خالتي مسافر وبتاع
لما رحت المطار لقيت امين شرطه مستنين علي الباب بره واخدني جوه وصاحبي دخل معايا ولقيت واحد اخد الشنطه وعملي Check In وواحد تاني خلص كل حاجه بالباسبور ونا واقف وفي الاخر اتفضل ياباشا علي المنطقه الحره علي طوول وصاحبي دخل معايا كمان
مفيش غير واحد اتلكك علي الفيزا عشان طالعه سياحه وانا قلتله طالع شغل ولما صاحبي قاله انت ساكن فين وقاله سيدي جابر قاله علي فكره انت دايرتي قالنا اتفضلو
بس بصراحه وانا راجع احتست في مطار Ontario لاني مكنتش عارف اعمل ايه
الموضوع الذى قتل بحثا ومازال لا يوجد له أى حل
انا يا جماعة حلم حياتى ان تتلغى من كل أوراقى انى مصرى انا واولادى - لكن وعد منى ليكم انى هافضل اشجع منتخب مصر
اللى عايز يهاجر من وجهة نظرى احسن مكان على الاطلاق مناسب للمصريين من حيث البيئة والمناخ والتعامل هيه استراليا
بس فعليا الموضوع بيكون شبة مستحيل لو هاتيدأ من الصفر
وهايكون مكلف بشكل مفزع
فعلا لو ليك اى شخص مقرب ليك فى اى مكان انت عايز تهاجر ليه - بالاضافة انك تكون صاحب مؤهل عالى - يفضل يكون تخصصك نادر - معاك فى حدود 100.000 جنيه أو فى حدود 20.000 دولار ممكن تضحى بيهم - سنك يكون صغير ولسه فى العشرينات
أعتقد فى الحالة ديه ممكن انك تحاول انك تتحول لبنى أدم
تحيه خالصة لكل من نجح فى الحصول على اى جنسية سواء بطرق مشروعة أو غير مشروعة
وأحب اهدى لكل المصريين اللى حتى لم ينولوا شرف محاولة التنازل عن الجنسية المصرية أغنية مصر هيه أمك
معلش بقى يا مان أنا مش معاك في اللي إنت بتقولو ده .. مش عشان أنا أو ب أو ت خدنا جنسية نحاول أو ننسه حاجة اسمها مصر يا مان لما تسافر كدة و تبقى قاعد في الغربة حتهس يعني إيه مصر على فكرة إنت لو معاك الباسبور الأمريكي الامريكان بردو شايفينك على انك مصري مش أمريكي و عمرك محتهس إن أمريكا ديه بلدك والله لو قعدت فيها طول عمرك بردو الناس هناك هيبسولك على انك مصري اوعى تبيع بلدك علشان باسبور أجنبي اوعى .. اه فيه مميزات لكن مش علشان المميزات ديه أبيع بلدي .. هو أنا ليه قلبت وطني كدة هههههههة
الله ينور عليك ،
كنت عايز أقول كدا بالظبط ، هو ليه كل واحد بيدور على حاجة يتنطط بيها على خلق الله ، والناسش دى بتنسى ان الكبرياء لله واحده والتواضع صفه جميلة يا ريت نتحلى بيها ، مش ننتقد الناس اللى بتتكبر بس فى نفس الوقت يبقى نفسنا نعمل زيهم!!!
يمكن يجى فرج ربنا ويكون المصرى ((محترم)) فى بلده عن أى حد تانى وهو ده الطبيعى ولحد ما يجى اليوم ده ، كل واحد عليه انه يحسن أخلاقه ويحسن تربية أولاده والله هتفرق كتير...
المسأله مش مسأله فلوس وكده لان لو فلوس يبقى الخليج موجود اهو
بس مسأله انك لما تتجوز تبقى مطمن على عيالك وانك تقدر تمشى من هنا بسهوله فى اى وقت
وحاجات كتير اوى مش اهمها الفلوس خالص
طب هو اللى يتولد فى امريكا حاليا ياخد الجنسيه علطول زى زمان ولا لا
بعدين هو ينفع واحده تسافر وهيا حامل كده انا اسمع ان شركه الطيران مش بترضى
وازاى تسافر هناك سياحه مثلا وبتبقى اد ايه وهل لو خلصت المده بتاعت التاشيره هناك ايه اللى يحصل
موضوع مهم جدا
تصحيح بسيط
كل من يولد في امريكا و لو حتى كان مولود في طائرة تعبر خلال المجال الجوي الأمريكي (لانها تعتبر ارض امريكية) هو مواطن امريكي (حتى لو ابوه و امه الاتنين داخلين امريكا غير قانوني و مهاجرين غير شرعيين !) .... باستثناء أبناء الدبلوماسيين العاملين في امريكا ....
و الاب و الام ما بياخدوش الجنسية و لا حاجة ...... مفيش طريقة لاخذ الجنسية عن طريق الابناء .... ممكن عن طريق الآباء و الأمهات, الزوجات و الأزواج, الأخوة و الأخوات فقط .... مفيش حد بياخد الجنسية من عياله ....
انا متاكد اكتر منك لاني مشيت في ال process من اولها لاخرها
الجنسية بتمشي من فوق لتحت بس او بالعرض (زوجات .... اخوات .....الخ) .. عمرها ما تطلع لفوق
و غير كده ان عشان حد يقدم لحد على الجنسية (هو بيقدم على جرين كارد الاول في الواقع) لازم سنة ما يقلش عن 18 سنة
انا متاكد لان اسرة اختي هناك بقالهم اكتر من 11 سنة
نسيت اضيف ان مش لازم الام يبقى بقالها 6 شهور و لا حاجة
بص ياباشا
م الاخر
هاتلك مثلا واحده المانيه واقعه من شارم
واكتب عليها هنا في بلدك هيكون تقريبا مقابل 5 الاف يورو
وسيبها تتكل علي الله
وبعد 3 سنين بالتمام هتحصل علي الاقامه
والباسبور الاحمر الرهيب بتاع المانيا
وطلقها هنا برضو في بلدك
ومبروك حصلت علي الجنسيه
الكلام ده لسه عارفه بقالي ساعه ونص بس
من واحد مهندس مصري عايش في المانيا 30 سنه
الطريق الاخر انك تروح تشتغل هناك لو مطلوب
وبعد فتره مش فاكر كام سنه تقدم وتاخد الجنسيه
بس في نقطه
لازم تتنازل عن الجنسيه المصريه !!!!!!!!!!!!!!!!!!!!!!!
بس طبعا مافيش مشكله بترجع قبل سنه من التنازل عن الجنسيه وتقدم طلب هنا في مصر وبيرجعهوهالك
بس طبعا ده غير قانوني بس ماحدش بيعرف ومفيش مشكله خالص
المهم محدش في المانيا يعرف
انا اتكلمت عن المانيا لأني بفكر في الموضوع بس
أنا سمعت إن الجنسية المصرية بتوقع لو إنت معاك جنسية تانية لو مصر عرفت علشان كدة في نموذج اسمو مزدوج الجنسية و موجود في المجمع و بيطلع قرار جمهوري .. أنا طلعت النموذج ده و فيه موحضر جالي البيت و معاه الورقة ديه علشان كنت محتاجها علشان أطلع الرقم القومي علشان هي مكتوب فيها طالب بالخارج
مش عارف ؟؟
انا هقولك علي اللي متأكد منه
في خلال سنه من التنازل عن جنسيتك
ممكن ترجعها بدون اي شيء
اما لو فات اكتر من سنه
بتدفع 55 جنيه
ومش عارف في نموذج معين بتملاه
وبعد كده بينزلك قرار رسمي في جريده رسميه
يبقي الافضل في خلال سنه
بصراحه الواحد مستحيل يتنازل عن جنسيته المصريه للابد
اذا كان الواحد مضطر مؤقتا مفيش مشكله
لكن للابد ده شيء مستحيل
هي مش بتقع و لا حاجة
فيه حاجة اسمها طلب التجنس بجنسية اجنبية مع الاحتفاظ بالمصرية
و طلب تجنس بجنسية اجنبية مع اسقاط المصرية
و لازم تعمل واحد من الاتنين عشان تعمل شهادة الجيش (اعفاء مؤقت لتعدد الجنسيات)
ايوة بيبقى مؤقت لحين "سقوط" الجنسية الاخرى او اتمام سن ال 30 !!!
غباء ما بعده غباء
السلام عليكم و رحمة الله و بركاته
اللى أنا أعرفه بالنسبة للجنسية الأميركية , أن اللى بيتولد فى أميركا -ان شالله يكون داخل قبل الولادة بساعة- بياخد الجنسية الأميركية و نفس الكلام فى كندا و أنا متأكد من الكلام ده لأنى قتلته بحثا أيام ماكنت مقدم على هجرة كندا .
بالنسبة للحصول على جنسية تانية فهى مش عشان التنطيط على خلق الله و لا حاجة , بس عشان تدفع ظلم ممكن جدا يقع عليك, أو على الأقل عشان تاخد حقك فى البلد دى اللى ماحدش بياخد حقه فيها الا بالواسطة و الكوسة و المحسوبية .
أنا عمرى ماكنت بفكر فى الهجرة , أنا طول عمرى بهدف أنى أكون مبسوط ماديا و أعيش فى بلدى , فى مستوى عالى و خلاص و أنى ماكونش محروم من حاجة و لا ناقصنى شئ, لكن لما سافرت السعودية و شوفت العنصرية هناك على أصولها من أول ماتوصل مطار الملك عبد العزيز فى جدة و فى كل تعاملاتك هناك و بتضطر أنك تبلعها و تطنش عشان أنت مش ابن البلد و أنك أكيد هتبقى الغلطان عالطول -مش لأنك أجنبى, لكن لأنك مصرى و الحكومة بتاعتك عمرها ماهتدور عليك هناك و لا عمرها هتحللك مشاكلك اللى أنت أكيد مش السبب فيها- و كمان لأن ببساطة جواز سفرك مش معاك و مع الكفيل بتاعك رغم أنك ماتقدرش تغادر السعودية الا لو معاك تأشيرة خروج, و بعد ماشفت المستشفى اللى كنت شغال فيها بتتقلب ازاى لو جالنا مصاب أو مريض أجنبى معاه جنسية تقيلة, قررت أنى آخد جنسية غير المصرية, مهما كلفنى الموضوع ده, و بالفعل كنت بقدم على الهجرة العشوائية بتاع أميركا كل سنة و ماكانتش بتجيلى , لحد ماربنا يسر و قدمت على هجرة كندا فى 6-2008 و من ساعتها حسيت أن الدنيا فعلا ضحكتلى أخيرا بعد سنوات طويلة من اليأس و أيام سودة كتير عدت عليا لأنى كنت ببقى مش عارف أروح فين , فى السعودية , ماليش تمن و فى مصر انسان متهان و ماليش سعر , طاب أروح فين .
الموضوع مش مستحيل و لاحاجة و فيه أكتر من أسلوب و طريقة , زى أنك تكسب فى الهجرة العشوائية بتاع أميركا أو أنك تكون معاك فلوس و تروح تدرس على حسابك هناك و تستغل الفرصة دى أنك توفق أوضاعك , أو أنك تقدم لبلد زى كندا و لا استراليا و دى بتحتاج أن وظيفتك تكون مطلوبة عندهم , الموضوع مش مستحيل لكنه محتاج نفس طويل و استعداد لتحمل المشاق .
الأخ الفاضل اللى راح أميركا عشان ابنه يتولد هناك و ياخد الجنسية , ده اتصرف تصرف سليم جدا و عين العقل و ربنا يباركله فى ذريته و يحافظله عليهم و ان شاء الله هتلاقى ثمرة الموضوع ده لما ابنك يكبر و يلاقى بلد زى أميركا بتديله فرص ممتازة للتعليم و الرعاية الصحية الفائقة و العمل, غير أنه انسان محترم على مستوى العالم كله و كرامته محفوظة على مستوى العالم كله .
أنا هقولكم حكاية بسيطة عشان نعرف قيمة الجنسية التانية , عندنا هنا فى مساكن الجامعة فى المنصورة , فيه أستاذ دكتور اسمه ا د / يحيى عزب , فى كلية العلوم , المهم الراجل ده ابنه كان بيساعد فى جمع مساعدات أيام حرب غزة و ده طالب برئ جدا -أنا بقول كده لأنى جاره من 20 سنة و عارف كويس أوى- فى كلية الصيدلة, المهم, أمن الدولة مسكه و رماه من حوالى سنتين و نص فى المعتقل لحد اليوم و كمان بدأ يلم معاه شوية من أصحابه و يرميهم فى المعتقل هما كمان و من ضمن أصحابه , واحد شاب كان من حسن حظه أنه اتولد فى أميركا لما كانت والدته الأستاذة الدكتورة بكلية تجارة المنصورة بتاخد الدكتوراة من أميركا , طبعا و لا لمسوا شعرة منه و هو الوحيد اللى نفد و الباقى شباب زى الورد كان أمامهم مستقبل مبهر لأنهم كلهم كانوا ملتزمين و متفوقين و لكن للأسف مستقبلهم ضاع , هى دى احدى المزايا الكتييييييييييييير أوى بتاع الجنسية التانية .
شكرا و آسف جدا للاطالة .
السلام عليكم و رحمة الله و بركاته
أنا حاليا فى مصر , بس كنت سافرت كندا فى شهر 7-2010 اللى فات عشان أعمل Landing و الحمد لله ربنا ييسر الأمور و خلصت الPRC و رخصة السواقة الHealth Insurance Card و الأوراق التانية دى و رجعت مصر تانى عشان عندى امتحان فى 3-2011 و ان شاء الله, بعد الامتحان بأه هسافر عالطول بأه و الى الأبد .
أنا لما كنت فى كندا , كنت فى Saskatoon - SK عند أختى لأنها مقيمة هناك .
كويس و الله أنك فى Ontario لأنى كنت مقرر أنى لما أسافر أنى أستقر فى Ontario لأنها مقاطعة كبيرة و أكيد فيها فرص و جامعات أكتر .
ربنا ييسر الأمور .
البنت بس الى بتاخد الجنسيه ازاى؟.. يعنى لو المولود ذكر مينفعش ولا انا فاهم غلط
وكمان الموضوع دا انا كنت سمعت انهم الغوه لانها مفقوسه اوى الحامل تروح تولد هناك وترجع يبقى معروف الغرض الجنسيه فقط
لا .... بنت او ولد .... قصدهم الطفل معلش
الموضوع ما اتلغاش ولا حاجة هي اللعبة انها تقدم عالفيزا بدري و هي في التالت او الرابع و الحمل مش باين عليها و تروح متاخر ..... المشكلة ان شركة الطيران ممكن ما تركبهاش الطيارة
قانونا لو الطفل اتولد جوة هياخد الجنسية بغض النظر الام داخلة ازاي ... المهم بس ان الام تعرف تخش .... لو طبعا واحدة في السابع و رايحة لهم بطنها متر لقدام هتبقى مفقوسة أوي ......
السلام عليكم و رحمة الله و بركاته
بالظبط كده , رفضوا يدولها الفيزا , لكن مادخلتش أميركا و ولدت هناك و رفضوا يدوا ابنها الجنسية؟؟؟!!!! لأن الولادة هناك فى أميركا أو كندا بتمنح الجنسية عالطول , زى سلاموا عليكوا بالظبط .
أصلا و أنا فى السعودية , كان فيه سعوديات كتير بيروحوا يولدوا مخصوص فى أميركا عشان أولادهم ياخدوا الجنسية الأميركية و أكيد السعوديين أسهل مننا فى أنهم ياخدوا تأشيرة أميركا و يسافروا هناك .
أصل هما الجماعة دول بيلعبوها صح, هما الأميركان هيرفضوا يدوا المولود الجنسية ليه , حتى اذا كانت أمه راحت هناك مخصوص عشان ابنها يتولد هناك و ياخد الجنسية , لأن أكيد لما أمه عملت كده, كانت بتعمل كده عشان معاها فلوس بالعبيط و بالتالى هما ده اللى هما عاوزينه ياخد الجنسية و يبقى مواطن عندهم,ده اذا كانوا بيعطوا الجنسية لأبناء المهاجرين غير الشرعيين اللى من المكسيك و أميركا الجنوبية, اللى بيتولدوا هناك فى أميركا لأبوين مقيمين اقامة غير شرعية .
و حكاية أن الابن أو البنت تعطى أبوها الجنسية دى , ممكن , بس لازم يكون الابن أو الابنة مقيمة هناك فى أميركا و عدت سن ال18 و تقدم لأبويها و أخواتها كمان و يمشوا فى اجراءات لحااااااااااااااد ماياخدوا الجرين كارد و بعدها ب5 سنين , ياخدوا الجنسية لو اتطبقت عليهم الشروط و هما معاهم الجرين كارد .
شكرا يا أحمد على توضيحك ..الكلام دة أصح كلام ..
أولا السفاره مش بتدي عامه أي فيز بسهوله..حتى لو عمر دياب نفسه ...لو ملهومش مزاج بيترفض.حاجه عادية. ناس رجال أعمال سمعت أنهم معاهم ملايين ومخدوهاش
الجديد اللي من 3 شهور وبيتناقش في الكونجرس إن مفيش أي طفل يحصل على الجنسية الامريكية علشان بس مولود في أمريكا ..لازم الأب أو الأم يكون معه اقامه دائمه على الاقل ويكون بيدفع ضرايب وحاجات
تانية روتينية. الكلام داه مفروض يتصدق عليه قريب ..ساعتها الولاده هنا هتكون ملهاش أي فايده.هم مبيحبوش حد يكون زكي ويلف حولين القوانين بتاعتهم .
.بيسموهم هنا anchor baby أو الطفل الهلب ..يعني يرمو خطاف ليهم في أمريكا وبعدين في سن 21 العيل ممكن يجيب مراته وولاده ..طبعا بحذر هنا أي حد إنه يجي أمريكا سياحه ويكسر يوم واحد ..FBI هيجبوه من بيته ويتحط في السجن تحريات فتره ..طبعا السجون هنا ادمية بس بتتحط مع سود واسبان .حاجه زباله..وبعد كده ترحيل على أمن دوله في مصر ..وعدم دخول أمريكا مره أخري
الكلام دة مافيهوش فرق بين راجل،ست،شاب ،عجوز،طفل. ..كله عندهم واحد من ساعه 11 سبتمبر
شكرا يا استاذ احمد على توضيحك..... بمناسبه الموضوع الجامد دا بقى
فيه ناس هنا ليها تجارب فى القصه دى وماشاء الله عندهم معلومات تفيد...السؤال بقى الى كله بيدور عليه
ازاى اقدم على جنسيه لكندا مثلا بس طريق غير الدراسه على حسابك او من الاخر طريق ميكونش عايز فلوس كتير و من غير الجواز من اجنبيه كمان....
هل في حاجه تنفع غير الحاجتين دول ان اى شخص يقدر ياخد جنسيه ومش هتفرق بقى محتاجه وقت وصبر والكلام دا اكيد الى مقدم عارف كدا مسبقا؟؟
متابع باهتمام
موضوع مهم جداااااا