محتـــاج مســـاعدة فى شــراء سيــــارة جديـــدة

**wildeagle** · 29-03-2008 05:56 PM

أرجو المساعدة من اهل الخبرة، عايز أجيب عربية و مش عارف أجيب إيه ، محدش يقوللي معاك كام ، انا مشكلتي أني بحب عربيتي اللي بشتريها جداً بأبقى موسوس جداً بيها ، بس بصراحة مصر و اللي بيحصل فيها مش مخليني أتخد قرار ، الشوارع بقت غير محتملة و الناس بتخبط في بعض و قطع الغيار نار ، ده غير أن الحكومة ناوية ترفع الدعم عن البنزين و ده من مصادر موثوق منها (التر ال 92 ب 3 جنيه و ال 95 بخمسة جنيه أمتى الله أعلم ، منقول من جريدة الفجر) ، يبقى ببساطة المطلوب عربية مواصفتها كالاتي :-
1. سعر معقول متزعلش عليها لما ميكروباص يفكر يعاكسها
2. قطع غيار متوفرة برة و جوة التوكيل و بأسعار معقولة
3. أستهلاك بنزين منخفض (و ياريت تكون هيبريد hybrid ) هاهاها بهزر طبعاً :D
4. كماليات متوفرة مع تسارع جيد .
مش عارف شكلي كده ياما بحلم او طماع شوية عامة ، أنا اخر عربية كانت معايا هيونداي ألنترا موديل 2006 خليجي لكن أول ما لقيت الشكل الجديد نازل على النت رحت بايعها على طول علشان عارف ان سعرها حينزل جداً و انا دلوقتي بره مصر و راجع بعد شهرين انشاء الله و عايز أجيب عربية كويسة إيه رأيكم يا جماعة
أخوكم حيران ،،،،،
أرجو المعذرة على الإطالة

د / محمد

............................
تم النقل إلى القســــم المختـــص
الإدارة - 3

**bassam nagy** · 29-03-2008 10:20 PM

طب ماتفكر فى الانترا 2008 برضوا عربية حلوة وانت اكيد عارف
او ماتريكس
عربية عائلية من الدرجة الاولى ومنتشرة وقطع غيارها برة وجوة التوكيل استهلاك بنزين حلو

**SEATLOVER** · 29-03-2008 10:26 PM

بعد النقطة الرابعة فى موضوعك كنت هاقولك
ألنترا موديل 2006
لو معاك نمرة اللى انت بعتهالو كلمة فيها تانى هههههه :d:d:d

غير كدة و من الاخر
مستعمل : لانسر جامبو 99 (فكر بس شوية ماتقولش لا كدة على طول ) :d
جديد : نيسان صنى

**وحش التجارة** · 29-03-2008 10:52 PM

ممكن تتجه للعربيات القديمة زى التويوتا قبل سنة 2000 او او انا بنصحك ومتضحكش عليا بـ 131 عربية 1600سى سى ميتستهلكش بنزين وعربية من الاخر عربية متيية عفشة ممكن تتدخل بيها فى امتن مطب موجود فى مصر وممكن تتحك ولا تزعل عليها من الاخر كلبة فى الشارع الناس كلها بتخاف منها وممكن تتظبط وتبى اسبور وتعمل فيها اللى انت عايزة

**SEATLOVER** · 29-03-2008 10:55 PM

المشاركة الأصلية كتبت بواسطة وحش التجارة

او او انا بنصحك ومتضحكش عليا بـ 131 عربية 1600سى سى

مية مية يا وحش اقتراح جميل جداً ... بس الراجل عايز كماليات .. و حاجة ناعمة عشان كان معاة النترا

**momomania22** · 30-03-2008 03:20 AM

ماتريكس او الانترا او ياريس اوتوماتيك
ده كلو في حدود ال 85 - 95 الف
ومجرب التلاتة

**fahd_628** · 30-03-2008 03:55 AM

انصحك بياريس او هوندا سيتى بس المشكلة حتزعل عليهم لو اتخبطو و قطع الغيار مش متوفرة خارج التوكيل

**wildeagle** · 31-03-2008 02:16 AM

متشكر جداً أخوتي الكرام على أهتمامكم و ردودكم السريعة، و أعتقد كدة كفة الماتريكس أو الانترا "تاني مرة" هية الراجحة، لأن اولاً أنا ما بحبش المستعمل لأن الوقفة عند الميكانيكي اليومين دول مذلة " وربنا ما يذل أحد أنشاء الله" أما بالنسبة للياريس و الهوندا سيتي ففعلاً قطع غيارهم نار و موش موجودة غير في التوكيل و بصراحة اليلريس تقيمها نص نص في مواقع السيارات، و أنا أعتقد اللي عايز يركب هوندا يبقى سيفيك وبس، و طبعاً الخبطة منها تجيب أرتجاج في المخ " لا قدر الله" ، ثانياً أنا بشكر وحش التجرة على أختياره لل 131 ، ودي كانت أول سيارة ركبتها وبصراحة فعلاً وحش إيطالي ميرافيوري معتبر، على العموم انا بشكركم تاني مرة و لسه الموضوع مفتوح للأقتراحات و الأستفادة من خبراتكم لأنه قدامي شهرين لغاية ما انزل إن شاء الله ، و جزاكم الله كل خير

أخوكم

د / محمد

**wildeagle** · 01-04-2008 05:25 PM

معلش سؤال تاني مع ان المكان ده بتاع الهيونداوية ، هل تتساوي الاوبترا (علماً بانها أيضاً كوري و ليست أمريكية كما يعلم الجميع) مع الماتريكس أو الالنترا أصل في ناس بتشجعها جداً و محتاج رأي الخبرا هنا ولا إيه رأيكم ؟ و أسف انا أسئلتي كتير
مع الشكر