لانسر كرستالة

**batros** · 06-01-2011 09:20 PM

السلام عليكم :

بعد اذن كل ركيبة الكرستالة ممكن تساعدونى بسررررررررعة

معروض عليه كرستالة موديل 2000 فابريقة جوة وبره ماعدا باب ورفرف عاملة 110000 كم كاملة مانيوال

ممكن اعرف نظام استهلاك الوقود حلو ولا وحش عشان انا مشاويرى كتيييير وممكن تفرق معايا .... وبعدين انا مركبتش كرباتير قبل كده فيا ترى ايه النظام

وكمان لو ينفع اعرف اخدها على كام عشان عايز اخلص فيها احتمال بكره او بعده بالكتييير ... بس صاحبها بيقولى ان عيب الكرستاله الوحيد انها وطيه على الارض شويتين

معلش مطول عليكو بس انتوا الناس الوحيده اللى مش هتدحكوا عليا مش زى الميكانيكية والناس دول

واسف على الاطالة مره اخرى

**FunnyMickey** · 07-01-2011 01:54 AM

ياريت تفاصيل اكتر

والكريستاله واطيه زي اي عربيه ملاكي
وانا شخصيا مش فارق معايا الواطي ده

لان شوارعنا الجميله الجيب فيها بتحك
استهلاك البنزين فيها رائع طبعا

يعيبها سعه موتورها اللتريه 1300 سي سي
بالمقارنه بقوه البادي
وده بيخليها تحس انها مخنوقه شويه او مش بتسحب

اما بالنسبه لعربيتك المعروضه عليك
فانا اشك لعده اسباب

عربيه فبريقه بره وجوه عدا اجزاء وعامله 110 الف
يبقي دي اكيد كانت مرفوعه

او مبتمشيش
ودي طبعا تبقي لقطه
ومش حتقل عن 55 الف باي حال
خصوصا كمان لو كانت كامله

اكشف عليها كويس
وارفعها
واطمن علي كبس الموتور والعفشه والقوايم والصاج

ولتاني مره بقولك
حرص ولا تخونش
لان قليل اوي لما تلاقي كريستاله بالحاله اللي انتا بتتكلم عليها دي

ولو طلعت بالكلام اللي بتقول عليه يبقي اتوكل علي الله كأنك بتاخد هديه

**sonystar** · 07-01-2011 03:15 AM

المشاركة الأصلية كتبت بواسطة funnymickey

ياريت تفاصيل اكتر

والكريستاله واطيه زي اي عربيه ملاكي
وانا شخصيا مش فارق معايا الواطي ده

لان شوارعنا الجميله الجيب فيها بتحك
استهلاك البنزين فيها رائع طبعا

يعيبها سعه موتورها اللتريه 1300 سي سي
بالمقارنه بقوه البادي
وده بيخليها تحس انها مخنوقه شويه او مش بتسحب

اما بالنسبه لعربيتك المعروضه عليك
فانا اشك لعده اسباب

عربيه فبريقه بره وجوه عدا اجزاء وعامله 110 الف
يبقي دي اكيد كانت مرفوعه

او مبتمشيش
ودي طبعا تبقي لقطه
ومش حتقل عن 55 الف باي حال
خصوصا كمان لو كانت كامله

اكشف عليها كويس
وارفعها
واطمن علي كبس الموتور والعفشه والقوايم والصاج

ولتاني مره بقولك
حرص ولا تخونش
لان قليل اوي لما تلاقي كريستاله بالحاله اللي انتا بتتكلم عليها دي

ولو طلعت بالكلام اللي بتقول عليه يبقي اتوكل علي الله كأنك بتاخد هديه

انا متفق مع ميكى فى كل الكلام اللى قالة

ميكى دا معاة احلى لانسر فى المنتدى ربنا يحفضهالوا

**FunnyMickey** · 07-01-2011 10:31 AM

ايه ده
الحاج علي بذات نفسه

مبروك ياباشا علي رجوع الاكونت
اخيرا ياراجل

هههههههههه
قال احلي لانسر قال

**FunnyMickey** · 07-01-2011 11:07 AM

المشاركة الأصلية كتبت بواسطة batros

شكرا funny على ردك :

بس فعلا العربية دى بتاعت جارى وهو راكنها من ساعة ما جابها عشان هو طيار ومعاه عربية تانية فمش بيستخدمها كتيير .. وقرر يبيع اليومين دول
بس المشكله انى سمعت ان الوطى بتاعها رخم ومش زى اى عربية ملاكى واستهلاكها للبنزين عالى مع انها 1300
وفعلا هو عارضها على 55 ولما كلمته قالى لو نويت هظبتلك السعر ...

بس انا عارف ان سحبها حلو مش زى ما انت بتقول

هو انت معاك كرستاله ولا ايه

وشكرا تانى على ردك

جميييييل اوي
يعني العربيه مش بتاعت حد غريب وانتا عارف تاريخها

ليا ملحوظه فقط
العربيه زي ما اتفقنا مش حتقل عن 55

يعني لو السعر اتظبط يبقي مصلحه ليك فعلا

بالنسبه للوطي
والله فعلا مش واطيه خالص
انا بركب ياباني طول عمري
وجربته في الهوندا والمازدا والميتسوبيشي

انا من وجهه نظري مش شايف انها مش واطيه اوي زي ما الناس بتقول
ممكن عشان انا مش بركب حد معايا طول الوقت
بس حتي لما جيت اسافر وحملتها شنط ومعايا 4 في العربيه
كنت بطلع المطبات بورب كالعاده ومكنتش بتحك

اما عن استهلاك البنزين
فانا حقولك علي استهلاكي وانتا تشوف بقي عالي ولا لا

انا بروح رمسيس من مدينه نصر كل يوم وارجع
بفول يوم السبت
تفضي يوم السبت
ظبطت عداد الرحلات كذا مره
العربيه جوه البلد تعمل 310 - 330

لما سافرت بيها رحت راس سدر ورجعت بتفويله
يعني حوالي 400 كيلو واكتر لاني كنت بتمشي كمان جوه البلد
يعني بحطلها ب200 جنيه بنزين في الشهر
ده كده الاستهلاك بالبلدي من غير ولا صفيحه ولا بتاع
اكتر من كده يبقي العربيه فيها حاجه بتاكل بنزين

بالنسبه للسحب فتفرق حسب الشخص
انا بس عشان كنت راكب قبلها هوندا 2000 سي سي
وبعدها مازدا 1600 سي سي
فطبعا اما تركب بعدهم 1300
كانك نزلت من حصان ركبت حمار

الكريستاله اما بيتسقطلها اي موتور تاني
1600 1800 2000
بتلاقي عربيه تانيه خالص
خصوصا انها مريحه في سواقتها
مش عربيه ماشيه كده وخلاص

لا دي سواقتها متعه
ومش بقول كده عشان عربيتي
لا بقولك عشان سقت قبلها كذا عربيه

اول ما اشتريتها ودفعت فلوسها وخدت المفتاح ومروح
بركب العربيه
ولسه بدي نقله وطالع
لقيت العربيه ناعمه نعوميه مستفزه

حتي انا وقفت كده استغربت
وبعدين رحت طالع تاني وقعدت الف بيها شويه
والواد اللي كنت واخدها منه كان حاطط ريحه معطر كده
جوز هند
غريبه

انا اتصطلت جوه العربيه
وفضلت قاعد جوه
:)

قياسا بقي علي اني قعدت اسأل هنا في المنتدي قبل ما اجيبها
وقالولي فيها شعر
وانا بحبها اصلا من زمان

فانتا ربنا يوفقك ان شاء الله
بس اهم حاجه
ارفعها ولو عرفت تروح بيها التوكيل روح
مفيش حاجه تزعل في كده

لو ليك سمكري ميكانيكي عفشجي معرفه تثق في رأيه روحله يقولك عاللي في العربيه

ممكن الركنه بردو تكون اثرت علي حاجه

يعني اللي عاوز اقولهولك راجع علي كل حاجه كويس
عشان دول مش 55 جنيه
دول 55 الف
ومتتسرعش
متتسرعش
متتسرعش

**batros** · 07-01-2011 04:49 PM

شكرا ياكرستالويه ... وربنا يوفق للى فيه الخير

**FunnyMickey** · 07-01-2011 05:35 PM

المشاركة الأصلية كتبت بواسطة puyol

متهيألي كدا يا ميكي عربيتك بتاكل بنزين إلا إذا كنت بتقرص عليه

والله ياابو زياد مش عارف
90% انا اللي غشيم
لان بقالي سنه علي نفس الاستهلاك
هوا هوا

احط 90 احط 80
احط ميه معدنيه
هوا هوا نفس الاستهلاك

رحت التوكيل وظبطت كل حاجه ونضفوا الكربراتير بسبراي
وبردو هوا هوا نفس الاستهلاك

فخلاص بقي
ايش تعمل الماشطه في الوش العكر
:)

هوا الطبيعي التفويله تمشي اد ايه في وسط البلد
التفويله مش الصفيحه