فاكرين الايام دي؟

**nonetta** · 12-01-2011 10:17 AM

المشاركة الأصلية كتبت بواسطة shaddadfalcon1

انا فاكر وانا صغير كان يبقي الناس كلها في عز الصيف الظهريه كده قعده في بيوتها وانا اللي عمال الف في السكك زي اللي ملوش اهل
وكل ماابويا يقولي تعالي نام شويه زي كل البني ادميم اقوله لا واخد اللي فيه النصيب

دلوقتي اخويا الصغير 9 سنين بيعمل كل اللي انا كنت بعمله وكتيير اضربه وازعقله عشان يقعد في البيت بس لما بفتكر نفسي بضحك واسيبه

دة علشان الاطفال كلهم زمان كانوا بيلعبوا في الشارع
وكان اللي ربنا فاتحها عليه بيلعب في مركز شباب
دلوقتي نسبة اللعب في الشارع قلت ( على ما اعتقد)
لان الاغلبية بيودي ولاده نوادي
عن نفسي مش ممكن انزل ولادي يلعبوا في الشارع

**heshamzaky** · 12-01-2011 10:39 AM

المشاركة الأصلية كتبت بواسطة pro_samir

ماهو كان في منها مسدس .. وبتاع السهام البلاستيك ده كنت بخلع منه الكاوتشه علشان يسخدم في الأغراض المؤذيه .. والدبوس برضو كنا ساعات بنعمله ونرسم دواير علي لوح فوم وننشن عليه .. مكانوش لسه اخترعو المسدسات الخرز

ولا الكاميرا السودا برضو اللي بترش ميه .. نظام تعالي اما اصورك فسس فسسس تطلع ميه .. مع ان العيال كلها عارفه انها بترش ميه بس كانو بيقفو برضو هههههه

هههههههههه فاكرها طبعا الكاميرا الى بتطلع مية و كان فية كاميرا شبهة النظارة المعظمة كبيرة كدة تبص فيها و ترفعها فى الضوء و بتقلب صور جواها

**heshamzaky** · 12-01-2011 10:44 AM

المشاركة الأصلية كتبت بواسطة no comment

وكان فيه كمان المسدس الرول ( البكرة ) ده الأسود اللى كان بيتحطله دائرة بلاستك فيها بارود لونها أحمر كدة .... وكنا احنا بنخترع بفى ونسد الفتحة بتاعت الفوهة بتاعته علشان لما يفرقع الشريط يضرب معاه كل السدة والحاجات اللى حطيناها قبل السدة أو الفلة دى .
بعدها أخترعوا المسدس الخرز.

فاكرو طبعا و لما كنت فى أعدادى اشتريت مسدس صوت و بندقية رش و مسدس الصوت دة مرة ضرب غصب عنى فى صباعى و عورنى و روحت المستشفى علشان يشيلو البارود الاسود من تحت الجلد و البندقية كانت طبعا رمسيس نمرة 1 فاكرها مكنتش فية وقتها نمرة 2 الا فى الانواع المستوردة

**abogogo** · 12-01-2011 07:11 PM

المشاركة الأصلية كتبت بواسطة pro_samir

فكرتوني بحاجه ..

كان في مسدس زمان اسود وشكله معفن كده وفيه حتت حديده من الجنب تشدها علشان تعمره ، ومن قدام حتة فله أو بلاستيكه مربوطه فيه بفتله علشان متضيعش تعمره وتحط البتاعه دي وتضرب تطير علي حسب طول الفتله ! ..

كان دايما في العيد اتنين قرايبي بيشتروه وكنت بتغاظ منه جدا علشان كان شكله غبي ومقرف والسوسته بتاعته تقيله جدا علينا كأطفال (المفروض) وغير كده ملوش أي لازمه من وجهة نظري كطفل يعني علشان اضرب واحد لازم اروح اقف جنبه هههه .. الحمد لله إنه انقرض

حد فاكره ؟

هو كان الميزه فيه انك تحط ظلطه صغيره في الماسوره و زوووو

لعبتي بتاعة العيد كنت بعمره بأني بحط الزناد اللى في الجنب في طرف الباب وبكل جسمي اضغط عشان يتعمر وكانت الفله مربوطة بخيط كنا بنقطعها عشان نحط الزلط .... بما انك كنت في نفس المرحلة تتفتكر كان في عربيات صغيرة مصنوعة من الصاج وكان ليها عجل بلاستيك ودايما تعور الاصوابع لما تلعب بيها كانت بقرشين صاغ والمسدس الي بيضرب بشريط حرب اطاليا

**abogogo** · 12-01-2011 07:27 PM

المشاركة الأصلية كتبت بواسطة misoalex

كنت بعملها بورقه واقطعها والفها حته صغيره بدل الدبابس
والعيال المتشرده بتاعه الشارع كانو بيعملوها بالسبارس بتاعه السجاير
وكنا بنجيب حته عصايه وندق فيها مسمار ونربط فيه الاستك ونحط من الناحيه التانيه دبوس غسيل (الخشب) وتبقى نبله او بندقيه حسب خيالنا ساعتها

وحوار الانبوبه بتاع القلم البك والبرتقال دى ياااااااااما عملتها

هههههههههه الله يسامحك ده كان تخصصي افضي طفيات السجائر اللى في البيت والدي الله يرحمه كان من المدخنين والسبارس دي كانت الذخيرة المفضلة لي وقشر البرتقال وسلك الكابلات بتاع الكهرباء الالومنيوم .... وطبعا النبلة اللى كنت بصنعها من شماعات الهدوم الخشب والاسهم من عصيان الاقفاص ودي كانت بعد عرض فيلم عنتر ابن شداد

... القلم البيك وبرتقال وقشر اليوسفي مع المسطرة ونعمل غزل بنات .. والكازوز وبكرة الخيط البلاستيك وسلكه حديد كنا بنعملها عجله .... والنحل كنت بصتاد النحلة واربط رجليها بخيط وامسك الطرف التاني والعب بيها