يوم الخميس و علي الطريق الدائري و انا ماشي في امان الله قبل كارفور المعادي بشوية و قدامي عربية.. و ابص في المراية الاقي واحد معاه فيرنا طاير مش سايق.. يمين شمال بعرض و ورب الطريق.. و لقيته جمبي كابس ورا ست سايقة لا حول ليها و لا قوة .. قلت عادي بقي فرحان بالموتور و العربية السودة و كمان مفيم و مجنط و ستاير و استيكرات... فجأة راح واخد غرزة من قدامي و لو انا كنت بس اسرع شوية صغيرين اوي كان زمانه خد رفرف العربية عندي.. بصراحة انا دمي شاط..! انا مش من النوع اللي بيستفز بسرعة و لا غاوي شد و حرق و اعرض نفسي و غيري للخطر.. بس محدش يئذيني!

المهم كبرت في دماغي اشد معاه.. كبست بنزين و فضلت وراه .. ييجيلي يمين.. اجيله يمين و العكس.. المهم هو حرق بعد ما الطريق هدي شوية عند Bavarian AutoGroup و انا حرقت وراه.. اني اجيبه مستحيل ..

السيراتو حلوة في طلعتها من20 الي 60 .. كنت انا و هو وقتها في تقارب.. ماعرفش من 60 لــ 80 ايه اللي حصل.. لقيته شرخ..

كبست بعد الـ 80.. انا نفسي اتخضيت.. العربية ما شاء الله سحب ايه و انطلاق و ثبات.. حصلته قبل مركز خدمة مرسيدس و انا علي 110-120 .. من وقتها حطيته في ضهري لحد مخرج الدائري للتجمع و الــ NA و لحد ما كمل هو في اتجاه Mirage .. و شايفه طبعا حايموت لاني كنت فارق اوي عنه.. و ما كنتش وقتها مزود عن 140 بأي حال من الاحوال..

نسيت اقول ان هو طبعا - المتربي ابن الناس - مانسيش يحييني بالكالاكس بتاعه لما اتفرقنا..

و طبعا عشان في قوي و في الاقوي مني.. واحد ذلني علي محور NA معاه لانسر .. بصراحة واد لعيب.. اي نعم هو سورني بالسرينة بتاعته و انا كبرت في دماغي ماخلوش يطلع مني.. بس ده مايمنعش انه طلع مني فعلا في اول الطريق و ماسبنيش اعدي غير عند المقابر