عايز معلومات عن هندسة طيران

**shaddadfalcon1** · 09-01-2011 09:39 PM

السلام عليكم ورحمة الله وبركاته
دلوقتي انا اخو المدام في هندسة طنطا اعدادي وكان داخلها من معهد فني من بنها ونفسه يدخل هندسة طيران بس قالولوه ان لازم يبقي ساكن في القاهره او علي الأقل معاه عقد ايجار من قبل التقديم ب 6 شهور - بس بصراحه انا مش مقتنع باللكلام

انا دلوقتي عايز اعرف مدي صحة الكلام ده وعايز اعرف برده نظام الكليه ايه او القسم نفسه ايه التقدير اللي المفروض يجيبه في اعدادي ونظام الشغل بعد مايتخرج ايه وكده

متشكر جدا مقدما

**shaddadfalcon1** · 10-01-2011 10:43 AM

ايه يا رجاله انتو فين
مفيش اي حد يعرف حاجه عن الموضوع ده؟

**Ralliart** · 10-01-2011 12:39 PM

بص هو لازم يكون فعلاً عنده محل اقامه او اهله مغتربين او يعملها كوسه لو جايب تقدير كويس ممكن يوافقوله عادي
من ناحية التقدير فهو بيختلف من سنه لسنه بس عامة السنادي سنة الفراغ يعني اعتقد الاقسام هتكون مفتوحه وهما تقديرهم مبيبقاش عالي لضعف الاقبال
بالنسبة للشغل ففرصة شغله في مصر قليله جداً جداً وكلهم بيطلعو يشتغلو زي ميكانيكا باور بعد ما اتحرق دمهم لانه من اصعب الاقسام اللي في الكليه يا اما بيسافرو برره لو معاهم تقدير وكورسات او واسطه في مصر للطيران
*الكلام ده على قسم طيران هندسة القاهره

ممكن يروح هندسة طيران امبابه ودي حاجه زي جامعه خاصه بفلوس (مش فاكر كام بس مش كتير) ودول معتقدش انهم هيمانعو انتقاله

**shaddadfalcon1** · 10-01-2011 01:04 PM

المشاركة الأصلية كتبت بواسطة ralliart

بص هو لازم يكون فعلاً عنده محل اقامه او اهله مغتربين او يعملها كوسه لو جايب تقدير كويس ممكن يوافقوله عادي
من ناحية التقدير فهو بيختلف من سنه لسنه بس عامة السنادي سنة الفراغ يعني اعتقد الاقسام هتكون مفتوحه وهما تقديرهم مبيبقاش عالي لضعف الاقبال
بالنسبة للشغل ففرصة شغله في مصر قليله جداً جداً وكلهم بيطلعو يشتغلو زي ميكانيكا باور بعد ما اتحرق دمهم لانه من اصعب الاقسام اللي في الكليه يا اما بيسافرو برره لو معاهم تقدير وكورسات او واسطه في مصر للطيران
*الكلام ده على قسم طيران هندسة القاهره

ممكن يروح هندسة طيران امبابه ودي حاجه زي جامعه خاصه بفلوس (مش فاكر كام بس مش كتير) ودول معتقدش انهم هيمانعو انتقاله

الف شكر ليك ياباشا
ان شاء الله ابلغه بالموضوع ده

**hazemhany** · 10-01-2011 01:40 PM

ملهاش اي لازمة خليه في ميكانيكا باور وهو كده كده في الدراسة بيدرس حاجات كتير من طيران ..ولو اتيحت ليه الفرصة بعد كده انه يشتغل في الطيران هيشتغل من غير اي مشاكل لكن طيران بيزنق نفسه في حتة صغيرة اوي وصعبة زي بترول كده ....

**AhMeD EzZ** · 10-01-2011 02:59 PM

انا الي اعرفة معهد هندسة و تكنولوجيا الطيران امبابة و دة حكومي بس بمصاريف 11000 شاملة كل حاجة " كتب -مصاريف - تامين "
و دة مش لازملة محل اقامة و المعهد تابع لهندسة القاهرة " نفس المنهم و الدكاترة " و فيه جميع الاقسام و من ضمنهم طيران
تقدير طيران مختلف من سنة للتانية
السنة الي قبل الي فاتت كان امتياز و السنة الي فاتت ب مقبول وهو كمستوي كويس بس صعب شوية اي كان القسم
المعلومات دي من اتنين صحابي طلبة فيه لو عايز اي حاجة اسالك عليها مفيش مشاكل انا بروح هناك كتير

**shaddadfalcon1** · 10-01-2011 03:02 PM

الف شكر ليكم جميعا
الموضوع شكله كده مش هيبقي جايب همه

**esam_comm** · 10-01-2011 03:10 PM

هاقولك حاجه غريبه لازم لو هو خريج هندسه طيران جامعه القاهره ياخد كورس بعدها في هندسه طيران امبابه تقريبا دلوقتي بحوالي 30 الف وكده يبقي مهندس ميكانيكا طيران بدون طراز وبعد كده يدور علي واسطه يشتغل في اي شركه طيران مش لازم مصر للطيران في شركات تانيه كتير زي اير ممفيس او ايه ام سي او كورال بلو وبعدها ب6 شهور تقريبا بيقدم علي فرقه مثلا اير باص 320 اللي هي بفلوس كتير وبعدين ياخد امتحان في سلطه الطيران المدني بعد ماينجح يبقي مهندس طيران معاه طراز اللي هو نوع الطياره دي وبيفضل حوالي سمنين علي الارض وبعد كده بياخد شويه فرق ويطير مع الطياره ده لو في شركه غير مصر للطيران لان مش بيبقي عندهم مجطات صيانه في كل المطارات
اتمني اكون افدت وخاللي باللك لازم يبقي ليه حد قريبه في المجال علشان يشغله لان ده زي قطاع البترول كده ولو هايشتغل بره بيبقي فني الا لو خد شويه كورسات كمان

**shaddadfalcon1** · 10-01-2011 04:06 PM

طيب ماهو لو معاه الفلوس ده كلها ايه اللي هيدخله كليه من اساسه

**م.احمد زكريا** · 10-01-2011 04:42 PM

المشاركة الأصلية كتبت بواسطة shaddadfalcon1

طيب ماهو لو معاه الفلوس ده كلها ايه اللي هيدخله كليه من اساسه

تصدق وانا بقرا ردود الاخوة كنت باردد نفس جملتك دي

نصيحة قاوها الشباب فوق لو ليه واسطة مضمونة في المجال ده يتوكل على الله

مافيش .......... صدقني لو إيه ينسى

وبعدين ممكن بتعقد من البلد وهو لسة في اول المشوار

وبعدين ده فكر متأصل في مصر ما شافش فيلم اسف على الازعاج أحمد حلمي مهندس طيران ابوه طيار

بس خلاص