الموضوع: وبعدين فى الهبل ده الناس دى زودتها قويأقباط منشأة ناصر يقطعون طريق الأتوستراد احتجاجا

انا بس ليا سؤال صغير . لو مندوب الشرطه ده كان مسيحى و الضحايا كلهم مسلمين ؟ و ده حصل بعد الحادثه الارهابيه بتاعه راس السنه فى الاسكندريه ؟ كان ردود افعال المسلمين هتبقى ايه ؟؟؟
يا جماعه انا مش مع المظاهرات خالص لانها عشوائيه و بتنتهى الى تخريب الممتكات و الكلام ده . و طبعا اللى يكسر املاك غيره لازم يتعاقب .

بس حد يقوللى : اللى كسرو ممتلكات المسيحيين فى العياط لما كانو بيصلو فى بيت لانهم ما كانوش لاقيين كنيسه اتعاقبو ؟؟؟ و و الا كاعاده الموضوع انتهى بقسيس بيبوس شيخ و بطرس و محمد بيسلمو على بعض و خلاص ؟

الموضوع كبير و لاوزم نعترف ان فيه تهييج من القاده الدينيين من الطرفين فى الفضائيات و فيه كره و عدم احترام بسبب مفاهيم خاطئه بين الطرفين .

مش ممكن برضه ان الراجل بتاع الشرطه ضرب النار على السته دول بالصدفه برضه . يعنى هوا و الراجل اللى قتل الراجل بتاع اسكندريه و هما خارجين من كنيسه يوم الجمعه الصبح من سنتين مختل عقليا ؟ يعنى عايزين تفهمونى ان المختلين عقليا مسلمين بس ؟

بلاش تغطيه على المشاكل لغايه ما تكبر و ما نعرفش نحلها .

فيه مشكله طائفيه بالتاكيد . من 40 سنه موجوده و بدات تزيد و كبرت دلوقت لان المسيحيين كانو بيسكتو لغايه فتره قريبه ابتدو يتظاهرو و يعملو غاغه عشان الناس تسمعهم و ابتدا يظهر لهم متطرفين زى اللى ظهرو فى الجانب الاسلامى من 40 سنه فى مصر ( الجماعات اللى جابها السادات عشان يسكتو الناصريين و الشيوعيين )

لو قعدنا نلوم بعض كمسيحيين و مسلمين الموضوع هيتقلب الى لبنان و العراق او فتح و حماس او جنوب و شمال السودان و مش هنخلص ( بس هتخلص ارواحنا و هتخلص مصر )
انا شخصيا مسيحى و غاضب من اللى بيحصل من زمان . من اول حادثه الزاويه الحمراء ايام السادات الى قتل الجواهرجيه المسيحيين و الاستيلاء على مالهم لانه حلال الى قتل الكاتب المستنير فرج فوده الى محاوله قتل وزير الداخليه الالفى و مكرم احمد نقيب الصحفيين حاليا الى اغتيال المحجوب رئيس مجلس الشعب فى اواخر التمانينات . الى حادثه الاقصر اللى اتقتل فيها 70 يابانى سنه 1997 الى حادثه الارزهر الى حادثه الكشح سنه 2000 الى حادثه اسكندريه من 3 سنين الى نجع حمادى يناير 2010 الى راس السنه السنه دى فى اسكندريه الى حادثه القطار من 3 ايام . و الله اعلم اللى جاى ايه

انا غاضب مش عشان انا مسيحى لكن عشان مصرى . انا غاضب لانى شايف البلد كلها بترجع للخلف و بسرعه .

و انتو عارفين . الفتنه اشد من القتل .

و ربنا يستر على البلد كلها . يعدى الايام اللى جايه على خير لغايه انتخابات الرئاسه اللى جايه فى نوفمبر .

انا مش باقول كلمه قبطى لان كل المصريين اقباط . مش المسيحيين بس .