اقتباس المشاركة الأصلية كتبت بواسطة keko مشاهدة المشاركة

طيب من موضوع المزادات ده ممكن اوصى ناس ف الميناء وساعة المزاد اروح اشوف العربيات اللى معروضة للبيع واشترى واحدة ولا ايه ؟؟

طيب كده فيه اقتراح على السيرة اسمع ان مزادات الشركات والحكومة والسفارات بيكون فيها عربيات لقطة ينفع اروح واسال عادى ولا الموضوع ليه مافيا تجار مسيطرين عليه ؟؟

السلام عليكم و رحمة الله و بركاته





بالنسبة لموضوع المزادات, مفيش سيطرة تجار و لا حاجة ساعة المزاد,المزاد بيتعلن عنه فى الأهرام و بيكون فى القاهرة فى المطار أو فى الاسكندرية فى الميناء أو فى بورسعيد فى الميناء و على ما أعتقد أن كراسة الشروط كانت بتبقى ب 50 جنيه و التأمين كان بيبقى 2000 جنيه, ممكن المعلومات دى تكون قديمة لأنها كانت من حوالى 5 سنين و لا حاجة.

كل اللى أنت بتعمله , أنه لما بيتعلن عن المزاد فى الأهرام أو الأخبار, أو لو أنت ليك حد قريب أو معرفة فى الهيئة العامة للخدمات الحكومية , بتعرف أن فيه مزاد و أن البضاعة بتكون فى المكان الفلانى , بتشترى كراسة الشروط و بتروح تعاين البضاعة و أنت بتقدر أن العربية الفلانية حالتها كذا و أنها محتاجة كذا و كذا عشان تتشد و بالتالى هتصرف معايا كذا و بالتالى يبقى أنا لازم ماتزيدش معايا عن كذا, عشان مابقاش خسران فيها و هكذا يعنى .....

أنت بتدفع التأمين الصبح على باب قاعة المزاد و بتاخد وصل و بتدخل القاعة و بتدخل تزايد و زى أى حاجة فى مصر هتلاقى فيه تربيطات و هتلاقى اللى بيديروا المزاد أحيانا بيهجصوا علشان يرفعوا سعر العربية لأن بيقى عندهم تعليمات أن سعر العربية الفلانية ماينفعش تخلص بأقل من كذا, يعنى مثلا, مفيش عربية شبح s320 مو1996, هتخلص مثلا ب 50000 جنيه زى ما كنا بنشوف فى الأفلام و المسلسلات و حتى لو كان الكلام ده بيحصل زماااااااااااااااان , أيام ماكانت الناس مش عارفة حاجة و ماكانشى بيحضر المزادات الا التجار و الناس اللى عارفة و فاهمة يعنى ايه مزاد, لكن اليومين دول , ممكن تلاقى واحد مش تاجر و بيدور على عربية يركبها و تلاقيه داخل المزاد عشان فيه عربيات تنفعله و عاوز يزايد عليها عشان ياخد واحدة منها و لازم يكون جاهز معاك فلوس عشان أى عربية من دول لو رسيت عليك , أعتقد أنك لازم تدفع بتاع 30% من تمنها أثناء الجلسة . .

لكن لأن هناك عنصر الفساد منتشر فى البلد , فممكن تلاقى فيه مزادات بتتعمل و مابيتعلنش عنها و بالتالى بيقى اللى بيعرف بيها ناس محدودين, اللى هما ليهم واسطة فى الجمارك و المينا و الهيئة العامة للخدمات الحكومية .

أما بالنسبة للسفارات و الهيئات الأجنبية و الهيئات الدولية , فالعربيات بتاعتها ماتتباعش فى مزادات الهيئة العامة للخدمات الحكومية لأنها مالهاش علاقة بيها , لكن السفارة اللى عاوزه تبيع, هى اللى بتعمل اعلان بنفسها و تبيع .

و العربيات بتاع السفارات و الهيئات الأجنبية أكيد بتكون حالتها أفضل من بتاع الهيئة اللى مرمية فى الميناء و كل يوم بيتسرق منها حاجات ياما و عالعموم , مفيش عربية فى كووووووووووووووووول المزادات دى بتخلص أقل من توبها , لأن اذا كنت أنت عاوز تاخدها رخيصة عشان تبيعها و تكسب , فيه غيرك, مستعد ياخدها بتوبها و لا يمكن أغلى شوية على أساس أنها عربيات بتبقى على الأقل أساسياتها سليمة و مش هتكون مقلوبة و لا مغيرة سقف و لا نص و هو مش عارف .

بالتوفيق ان شاء الله .