الموضوع: نصائحكم بالنسبه للc-180الخليجى

أنا كان ليا موضوع قبل ما المنتدى يقع اني حجزت c-250 avangardبيضاء وهستلمها على يناير او فبراير المهم اتصلت من كام يوم على التوكيل أسألهم هستلم امتى قالولى للأسف مفيش قدامنا اى عربيه لون ابيض على الجهاز لغايه شهر7!!ازاي ياجماعه وانا حاجز ودافع مقدم الحجز وواخد وصل فيه مواصفات العربيه وموعد الاستلام!!؟؟المهم كنسلت الحجز وقررت أشترى c-180 amg خليجى أعلى فئه عايز اعرف هل فيه أكتر من amg في السوق ولاهو نوع واحد وفيه كل الأوبشنز والكماليات وايه أحسن وأضمن مكان أشترى منه وعنوانه وتليفونه لو وجد وسعرها على حسب ما سألت 410 هل السعر ده كويس ولا فيه اختلاف من تاجر خليجي للتانى..ياريت اى معلومات عن الموضوع ده مشكورين

اولا عايز اقول لحضرتك ان الfacelift نازل كمان كام شهر يعنى قبل اخر السنة فانا مستحرم ان حضرتك تشترى العربية دلوقتى و تتغير فيها حاجات كتير كمان 6 أشهر

بالنسبة لدلوقتى مش هقدر أفيد حضرتك اوى لان الوضع اتغير الفترة اللى فاتت , المرسيدس الخليجى زاد سعره جدا , كان فى avantgarde بسقف بانوراما و زينون بفرش قماش و منغير memory فى الكراسى كانت ب 365-370 دلوقتى بقت ب 392 عبط يعنى.

التوكيل نزل c180 Elegance فيها كل حاجة خالص (زينون - parking sensors - memory - فرش جلد artico (جلد صناعى) - فتحة سقف عادية مش بانوراما ) كل دا ب 358 الف و فى رايى دى ممتازة الا لو كنت عايز زيادة زى الavantgarde و السقف البانوراما و الحاجات دى و كدا هتضطر تلجا للخليجى.

بره مصر فى المانيا او الخليج الElegance نفس تمن الAvantgarde بالظبط مفيش مليم زيادة اختيارات يعنى بس الفرق ان الelegance لو عايز ممكن فرش جلد صناعى (لو مش عايز قماش) انما الAvantgarde يا قماش يأما جلد طبيعى و دا ب 7000 جنيه بره قول 10000 بعد الجمرك , يعنى من الاخر فرق التمن بين الElegance و الAvantgarde مش مفروض باى حال من الاحوال يزيد عن 10000 جنيه و دا فى نوعية الفرش !!!!

الc180 الخليجى فى فئات معينة بينزل فيها حاجة اسمها Command APS و دى شاشة كبيرة (مش الصغيرة اللى موجودة فى كل العربات المصرى و معظم الخليجى) , الشاشة دى فيها DVD و فيها GPS و voice control و ممكن يركبلها كاميرا رؤية خلفية (من الاخر زى الidrive فى الbmw بالظبط ) و دى مبتنزلش فى مرسيدس الوكيل و بتعرفها بانك بتلاقى الشاشة بتخرج لبره كدا مش زى المصرى تفتح تلاقى الشاشة.
دى صورة الcommand APS



و دى صورة الAudio 20 العادى اللى بينزل فى العربيات المصرى و معظم الخليجى



الخليجى كمان بتلاقى معظمه بسقف بانوراما حسب طلبك ( تمنه زيادة 5000 جنيه عن العادى قول 8000 بعد الجمرك الكلام دا فى الخليج , فمحدش يقول دا البانوراما ب 40 الف و كلام البياعين البوابين دول) , الخليجى كمان ممكن يكون فيه ال Daylight LEDS و دى مش موجودة فى الوكيل برده

و برده دى صورة لل LEDs




الخليجى كمان ممكن ينزل ب smart key و اللذيذ فى الموضوع انك لو عايز تشيل الزرار اللى بيدور العربية و تدور بالمفتاح ممكن عادى , الزرار بيتشال

انا فى رايى لو c-180 avantgarde و فيها سقف بانوراما و Command aps و parking sensors و زينون و فرش جلد طبيعى و مرايات كهرباء و memory كراسى و LEDS و كل حاجة كاملة من الاخر مفروض فى رايى الشخصى تعمل فى حدود 400 الف بالكتير اوى اوى و يبقى زيادة كمان.
الاسعار ايه دلوقتى مش عارف بس انا اتخديت لما عرفت ان العربية الحقيرة الىل كانوا بيبيعوها ب 365 بقوا يبيعوها ب 392!!!

مش عارف ايه احسن اماكن ممكن تشترى منها للاسف بس تجار الخليجى فى المرسيدس اعتقد معروفين , Gear one و Motor one و فى واحد فى شارع محمد فريد قبل جامع الفتح علطول و فى كام واحد كمان بيعملوا اعلانات فى اهرام الجمعة.

بس تقريبا كلهم بيستوردوها مع بعض نفس المواصفات و بيوزعوها على بعض , انصحك تنزل تشوف ايه المواصفات الموجودة و ايه الاسعار و تقارن لان الصراحة انا زمان كنت بقول الوكيل هبل بس الوكيل نزل حوالى 40 الف فى عربيات زى الc250 ال avantgarde كانت ب 448 زمان دلوقتى اخر رقم سمعته اخر 2010 كان 398 مش عارف زود و لا نقص و ثبته فى 2011.
ال250 الوكيل فيها ميزة ان الموتور اقوى 204 حصان بدل 156 حصان و دا بيفرق حوالى اقل من ثانيتين فى التسارع لل100 بس مفيش بانوراما و لا Command APS و لا LEDS و لو عايز AMG يبقى لازم الc300 اللى عليها ضريبة حوالى 9500 جنيه فى السنة و الموتور تقريبا نفس قوة ال250 بيفرق فى التسارع بدل 7.3 ل 7.2 ثانية يعنى جزء من الثانية و دا هبل طبعا (بس فيها سقف بانوراما ) و الفتيس 7 نقلات بدل 5 نقلات و فيها تكييف خلفى (تحكم مش فتحات بس) و سعرها 448 الف منصحكش بيها خالص.

زمان الخليجى اللى كان فيها كل حاجة بما فيهم الLEDS و الCommand APS و الAMG و ال Smart key و السقف البانوراما و بقية الحاجات كلها كانت ب 410 او 420 على ما افتكر و انا رايى دا سعر عادل مش مفروض يزيد عن كدا ابدا بس الفكرة فى الضمان , مش عارف نظام الضمان ايه , اللى اعرفه ان توكيل مرسيدس بيدخلهم صيانة عادى بس مش ضمان مش عارف النظام ايه دلوقتى .

من ناحية المواصفات هتلاقيها عند شوية تجار مختلفة شوية عن بقية التجار , يعنى مثلا ممكن تلاقى الخليجى العادية اللى ب 392 عند كل التجار بس تلاقى عند gear one واحدة فيها زيادة smart key و ناقصحة حاجة
فنصيحة اكتب كل المواصفات اللى انا لسه قايلها فى ورقة و اسال عنهم واحدة واحدة و شوف ايه اللى فيها اللى يناسبك و ممكن تكتب الاسعار هنا و انا و الناس هنقول لحضرتك دى غالية مثلا و لا السعر كويس

الله يبارك فيك

شكرا أستاذsom3aa على ردك وتوضيحك الشامل وعلى فكره حضرتك اول واحد لفت نظري في المنتدى للخليجي..
دلوقتى انا خلاص اشتريت العربيه واستلمتها يوم الثلاثاء وفعلا سألت في أكتر من مكان وبعد المناقشات والفصال مع أكتر من تاجر لأنى عرفتهم انى بشترى كاش وصلت لأفضل سعر لc180 amg خليجي كامله بسعر 394 واستلمتها يوم التلات والعربيه ماشاء الله عليها تحفه وانا بحمد ربنا انى ملقيتش اللون الابيض في التوكيل لإن البودي كيت الamg حكايه ومخلى شكل العربيه رائع جدا ومخليها رياضيه اكتر بكتير من الكيت العادى وانا حاليا برخصها وان شاء الله هكتب تقرير وافى عنها بالصور كمان ولكن خلال أسبوع لانى اليومين دول مطحون في امتحانات .. دعواتكم وشكرا لكل من ساعدنى وشارك في الرد على استفساراتى

الف الف مبروووووووووووووك
ربنا يبركلك بالعربية ويكفييك شرها ويكون وشها حلو عليك

بانتظار التقرير
ومبرووك مرة تانية

شكرا أستاذsom3aa على ردك وتوضيحك الشامل وعلى فكره حضرتك اول واحد لفت نظري في المنتدى للخليجي..
دلوقتى انا خلاص اشتريت العربيه واستلمتها يوم الثلاثاء وفعلا سألت في أكتر من مكان وبعد المناقشات والفصال مع أكتر من تاجر لأنى عرفتهم انى بشترى كاش وصلت لأفضل سعر لc180 amg خليجي كامله بسعر 394 واستلمتها يوم التلات والعربيه ماشاء الله عليها تحفه وانا بحمد ربنا انى ملقيتش اللون الابيض في التوكيل لإن البودي كيت الamg حكايه ومخلى شكل العربيه رائع جدا ومخليها رياضيه اكتر بكتير من الكيت العادى وانا حاليا برخصها وان شاء الله هكتب تقرير وافى عنها بالصور كمان ولكن خلال أسبوع لانى اليومين دول مطحون في امتحانات .. دعواتكم وشكرا لكل من ساعدنى وشارك في الرد على استفساراتى

طب الف الف مبروك
amg و ب394 دا سعر ممتاز جداااااا الصراحة , انا لما شوفت العادية فاضية ب 392 قولت ايه الهبل دا بس 180 ب amg كاملة الصراحة مفيش كلام يتقال بعد كدا

مبروك مرة تانية و ربنا يباركلك فيها ان شاء الله

الف الف مبروك
ربنا يبارك لك بالعربية ويكفييك شرها