زفة العربيات والموتوسيكلات ومشاكلها عالمرور

**NoRmAl** · 15-01-2011 11:20 PM

السلام عليكم

الصراحه بقالى فتره عايز اتكلم فى الموضوع دا
لكن كنت بقول يمكن هوجه وهتخلص لكن مخلصتش

بتكلم على أحتفالات الافراح فى شوارع المحروسه
كان زمان العريس يروح يجيب العروسه من الكوافير وفى طريقهم للقاعه الى فيها الفرح هما زمارتين على كام تسقيفه وزغروته وشكرا على كدا
أما الان وصلت البجاحه لأفعال بجد مبتحصلش غير فى شوارعنا
دلوقتى الطرق بتتقفل علشان فى زفة
وطبعا مع كم المدعويين دى لازم يبقى فيه همجيه فى الفرحه
أولا محتاجين بتاع 50 موتوسيكل راكبه 100 بلطجى لزوم قفل الشارع
كمان عربيه نص نقل على صندوقها كاميرا مان بمساعد علشان ينقل العرس
وطبعا أى معزوم لازم يوجب بكام تخميسه على تعويمتين وأهو ممكن يخبطله واحد بيعدى أو عربيه ملهاش علاقه بالزفة دى وتبقى كملت
يا ريت كمان الكلام دا بيتعمل فى شوارع تحتمل التصرفات البربريه دى أنما كمان علشان نعرف قدر الناس دى لازم بقى نقفل عباس أو مكرم أو أى شارع نعبر فيه عن عقولنا الجوفاء

أى كان الناس دى أنتمائتها أيه وبتفكر أزاى
أزاى أوقف طريق فيه كم من الناس كل واحد فيهم سايب بيته ونازل علشان غرض معين مهما أختلف الاغراض
واحد معاه مريض ومحتاج يوصل لمستشفى فى أقرب وقت
واحد عنده معاد مهم ولازم يوصل فى معاده
واحد بيتعب من السواقه ومبيصدق يروح يتخمد
واحد بيجرى على أكل عيشه
واحد حتى نازل يشم هوا ويمشى بعربيته فى الشارع حتى دا من حقه يلاقى شارع ماشى على فكره
كل دول أصطدموا بالناس دى وهى قافله الشارع علشان تحتفل!!!

وكل دول بلا أستثناء هيدعوا دعوه من القلب "وإن شاء الله مستجابه" على العريس بعروسته بالمعازيم
والله ... دى جوازه من بدايتها ولا يباركلكم فيها ويعطلكم ويقرفكم زى معطلتونا وقرفتونا

شوارعنا واقفه ومخنوقه بدون أفراح ولا يحزنون فتصوروا كمان لو أتقفلت عشلن أيه...بالنسبالى ولا شىء!!

طبعا مفيش شىء بأيدي ولا بأيد حد ويكفينى أنى بتحسبن عليهم كل ميعطلونى
وبدعى من قلبى الله يلعن مبتكرها ومروجوها...آمين

**amz2011** · 15-01-2011 11:32 PM

انا معاك فى كل كلمة انت قولتها

**Ashraf_Ibrahim** · 15-01-2011 11:33 PM

كل كلمة قلتها صح

**zidaneelwaly** · 15-01-2011 11:43 PM

و الله الكلام و الوصف ده عشره علي عشره

مره واحد صاحبي كان رايح المطار و كان نازل كبري الجلاء بالعربيه
انا عاوز افولك انو اعد نص ساعه لغايت ما وصل لتمثال رمسيس
يعني حوالي 1 كيلو
و فوجئ بشويه حيوانات بيهللو و بيلعبو في نص الشارع بالعربيات ادام التمثال و بيتصورو جمبيه كأنهم هياخدو البركه منه
بعدين من حظه ان العروسه كانت بتعدي راح دايسلها علي الفستان و جري

**Amrrr** · 19-01-2011 02:48 PM

المشاركة الأصلية كتبت بواسطة zidaneelwaly

و الله الكلام و الوصف ده عشره علي عشره

مره واحد صاحبي كان رايح المطار و كان نازل كبري الجلاء بالعربيه
انا عاوز افولك انو اعد نص ساعه لغايت ما وصل لتمثال رمسيس
يعني حوالي 1 كيلو
و فوجئ بشويه حيوانات بيهللو و بيلعبو في نص الشارع بالعربيات ادام التمثال و بيتصورو جمبيه كأنهم هياخدو البركه منه
بعدين من حظه ان العروسه كانت بتعدي راح دايسلها علي الفستان و جري

انا عملت كدة مرة وخليت العريس سابها ونط عالرصيف وجري واخدت الفستان بطرف الكبوت

الحركة دي غلط عشان ممكن تتشد تحت العربية من الفستان بتاعها والموضوع يخرج عن السيطرة

**MASERATI** · 15-01-2011 11:43 PM

السلام عليكم و رحمة الله و بركاته

لو فكرت فى سبب الموضوع ده , هتلاقيه غياب الأمن و النظام من الشارع المصرى, اللى المفروض أنه من مهام رجال الشرطة و المرور اللى احنا مستحملين قرفهم و تطاولهم على الشعب عشان يعملوا شغلهم بشكل مرضى للشعب المصرى, مش مرضى للحاشية اللى ماسكة البلد و برضه مابيعملهوش لا بشكل مرضى و لا غير مرضى, لكن ان شاء الله, الحاشية القذرة دى , هيكونها مصيرها زى مصير الكلاteeeeeeeeeeeeeet بتوع تونس و هنلاقى البلطجية بتوع الشرطة دول و هما بيتسحلوا فى الشارع المصرى .

هى يعنى , اللى كان ييجى من شهر واحد بس و يقول ل ( زين العابدين بن على ) أنه مش هيقعد على الكرسى تانى أكتر من شهر , كان هيصدق و سبحان المعز المذل , فى خلال أسبوع , بعد ما كان رئيس دولة و كان ملأ السمع و البصر , بقى بيلف على البلاد اللى كان عامل خده مداس ليهم, و كلهم طردوه زى اللى عنده جرب . سبحان الله .