هــل يمكــن تحويـــل أوبتـــرا مانيــوال 2006 إلى أتوماتيـــك ؟

**rami** · 01-03-2008 11:15 AM

عندي سؤال غريب بعض الشيئ . وارجو الافادة من اصحاب الخبرة

عندي سيارة اوبترا 2006م مانوال .. هي يمكن تحويلها الي اوتوماتيك ؟؟

ارجو الرد والافادة ولكم مني جزيل الشكر

**mega911** · 19-03-2008 04:39 PM

ازاي يا فندم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

**rami** · 20-03-2008 12:43 PM

المشاركة الأصلية كتبت بواسطة mega911

ازاي يا فندم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

اقولك ازاي

اقصد ينفع استبدال صندوق نقل السرعات من العادي الى الاوتوماتيك؟

**eng_mkhalaf** · 20-03-2008 01:24 PM

على ما أعتقد لازم تغير الأنجين بواحد أتوماتيك أستيراد

**rami** · 22-03-2008 09:35 AM

معقولة عشان اغير الفتيس من عادي الى اوتوماتيك اغير الموتور كله !!

**aif** · 25-03-2008 04:34 PM

التجارب اللي مكتوبة في المنتدي بتبين ان تحويل السيارة الي اتوماتك فاشلة وبتؤدي الي مشاكل كتير
يعني احسنلك تبيعها وتشتري اوتوماتك
كان فيه لسة زميل عامل الموضوع دة في عربية زلموكة وكانت النتيجة مش كويسة

**Adham** · 11-04-2008 11:33 AM

مع كل احترامي لكل الآراء

تحويل السيارة من مانيوال الي اوتوماتيك ممكن و لا معنى لتغيير الموتور كلة لأن الموتور واحد في الحالتين طالما بتجيب الفتيس الاوتوماتيك الخاص بنفس السيارة يعني نفس النوع و نفس الموديل و مش شرط نفس سنة الصنع يعني لو العربية شكلها و موتورها واحد سنة 2006 و 2005 و 2007 مثلا و الموتور واحد يبقى الفتيس المانيوال و الاوتوماتيك واحد على نفس الموتور

و الطريقة المثلى للقيام باستبدال الفتيس المانيوال باوتوماتيك او العكس انك تدور عند بتوع العربيات المتقطعه الاستيراد في الحرفيين او الوكالة او بورسعيد او جسر البحر على عربية اوتوماتيك نفس نوع و موديل عربيتك و تعمل معاه اتفاق انك تستبدل مع التاجر الاجزاء و تدفع لة بدل نقدي و يقوم هو بفحص السيارة و يتطمن ان الفتيس المانيوال تمام مافيهوش مشاكل و انة حايقدر يبعه عادي جدا و انك مش بتديلة فتيس بايظ

و يتم استبدال الاجزاء التالية:

1- الفتيس الاوتوماتيك (الجير بوكس ) بالقربة و ياخد المانيوال بالفلام ( ترس الفلام المتثبت في الموتور) بتاعه من الموتور
2- الكونسول بعصاية الفتيس (بالآخر اللي فية سيليكتور الاوتوماتيك بدل العصاية المانيوال و معاة الكابل السلك الواصل بين السليكتور و الترباس بتاع الفتيس بدل بارات عصاية الفتيس)
3- طقم البدالات (اللي فية دبرياج بالآخر بتاع الاوتوماتيك مافيهوش و بيبقى بدال الفرامل عريض)
4- طقم العدادات بتاع التابلوة (بيبقى فية مؤشرات للفتيس الاوتوماتيك توضح النقلة اللي انت عليها P R N D 3 2 في العدادات و المانيوال بالطبع مافيهوش)
5- الردياتير أيضا يتم استبدالة (حيث ان الفتيس الاوتوماتيك بيبقى لة سربنتينة او ماسورة تبريد داخل الردياتير من اسفل تقوم بتبريد زيت الفتيس و الحفاظ على حرارة التشغيل للزيت باختلاف الطقس بين البلاد التي بها حرارة استوائية او جليد) و برضة تاخد الوصلات او الخراطيم و امواسير بين الفتيس و الردياتير
6- و لو الفتيس لة كونترول يونيت يعني فية فيش كهرباء مش نازلة في كمبيوتر السيارة يبقى كمان لازم استبدال كمبيوتر السيارة بالضفيرة بتاعتة بالفيشة اللي بتركب في الفتيس لو كانت مش موجودة في كمبيوتر السيارة المانيوال

يعني الموضوع برضة مش سهل وبالذات لو العربية فيها كمبيوتر و لو حاتشتري كل القطع اللازمة دي جديدة او من التوكيل حاتصرف عشرات الألوف و في المقابل انت بترمي قطع غيار كتير تساوي ألوف

لذا انا قلت في الأول ان الحل الأمثل هو القيام بالاستبدال مع تاجر عندة عربية متقطعه علشان تجمع او تاخد منها كل القطع دي و ياخد فرق و يكون الاتفاق ان الفتيس الاوتوماتيك عالتجربة كذلك الردياتير والكمبيوتر و كل ما يتم تغييرة

تحياتي

**ahmed1981** · 12-04-2008 12:27 AM

أرى أن أفضل حل هو بيع السيارة وشراء أخرى مثلها ولكن أوتوماتيك

مسمعناش صوتك من زمان يا أدهم باشا نورت المنتدى

**Adham** · 14-04-2008 03:20 PM

الله يسلمك أحمد باشا, الحمد لله, انا فعلا بقالي كتير مابدخلش علشان مشغول قوي و كمان الدي اس ال مش شغال بقالة كذا شهر فاباخش دايل اب و غالبا الجمعه بس من البيت

هو طبعا الاسهل و الارخص والأسهل و الاضمن انة يبيع العربية و يشتري واحدة تانية اوتوماتيك زي ما قلت يابوحميد,

تحياتي