الكورى ... هل فعلا مظلوم ... مناقشة موضوعية من واقع تجربة
إزيكم يا شباب
كنت عاوز النهاردة نتكلم فى موضوع ثقافة الشعب المصرى فى التفريق بين العربيات .... والمقولة الشهيرة ( ده عربية كورى يا بيه )
أولا اللى خلانى اعمل الموضوع ده .. انى كان معايا عربية هوينداى اكسيل مو 97 .... عربية كورى تقفيل مصرى كمان
العربية ده كانت اصيلة جدا واعطالها قليلة (بإستثناء التكيف) ودايما كانت بتعطل يا قدام الميكانيكا يا قدام البيت
وانا بصراحة كنت مبهدلها غرز وحرق وسرعات والكلام ده .... بس دايما كنت بقول فى عقل بالى العربية ده لو عملت بيها حادثة مش هطلع منها ... لان صاجها كان ورق بمعنى الكلمة ... وكمان ده فى الاول والاخر .... عربية كورى
المهم من كام شهر كده ماشى انا والحاج على الاوتوستراد بالليل ماشى على الشمال عادى خالص سرعتى طبيعية فى حدود 100-110 ... وفجأة الاقى تريلا طلعت من اليمين وعاملة كروس بعرض الطريق بسرعة جدا ... لسة بدوس فرامل وبحود الدركسيون دخلت فيها بسرعتى تقريبا
المهم انا قبل الاصطدام مباشرة كان فى بالى انى ما اكبسش فرامل جامد علشان اعرف احود ... بس ملحقتش لان التريلا كانت سريعة
أثناء الاصطدام بقى انا كان فى بالى انى هلاقى المقطورة ده عندى فى كابينة ... لان طبعا السرعة كانت عالية
بس المفاجأة بقى (والحمد لله ) انى طلعت سليم الحمد لله ماعدا بعض الكدمات من اثار الحزام ... صحيح العربية اتدمرت ووش العربية اتشحور خالص .... بس فى الاخر الحمد لله كابينة القيادة كانت سليمة بالرغم ان الاصطدام كان عنيف
فهنا بقى انا بدأت اسال نفسى .... العربية الكورى ده قالتلى لأه فى ايه
غرز وشد وعمرها ماكسفتنى ... ده ياما خدت بيها غرز كنت بطلع بيها من اجدعها عربية فى الزحمة
اعتمادية واعطال .... بصراحة معدل الاعطال كان بيقترب من الزيرو طول ما الواحد كان بيحافظ على الصيانة الدورية
عفشة ونعومة .... العربية ده عفشتها كانت ناعمة جدا
توافر قطع الغيار واسعارها ... اسعار قطع الغيار زى ال 128 كده ومتوفرة جدااا
وفى الاخر (بعد ستر ربنا ) العربية شالتنى فى حادثة بشعة وطلعت سليم (بعد ستر ربنا والحزام ).... وده لا فيها ABS ولا AirBag ولا الكلام ده
العربية بعد لما بعتها .... عرفت من اللى اشتراها انه جابلها نص امامى روحت بصيت عليها لاقيتها ما شاء الله كأنها ما اتخبطتش
طب إحنا عاوزين ايه تانى من عربية غير كل ده ..... ويجى فى الاخر يقولك يا بيه ده عربية كورى
بجد عاوز اعرف ارائكم فى الموضوع ده
ايه الفرق الجوهرى بين الكورى والعربيات التانية اللى مخللى الشعب المصرى بيعامله معاملة العبيد ومطلع عليه اشاعات الدنيا كلها