1- معايا سيدان 2011 ينفع اغير الاريال الاصلى باريال قصير و سعرة كام
2- بلاحظ زرار حديد صغير فى جنب الابواب بيبان لما تكون فاتح الباب بجوار ارقام ضغط الاطارات ، يا ريت حد يشرحو بالتفصيل لان فيه 3 تكات يمين و وسط و شمال .
مع الشكر
عرض للطباعة
1- معايا سيدان 2011 ينفع اغير الاريال الاصلى باريال قصير و سعرة كام
2- بلاحظ زرار حديد صغير فى جنب الابواب بيبان لما تكون فاتح الباب بجوار ارقام ضغط الاطارات ، يا ريت حد يشرحو بالتفصيل لان فيه 3 تكات يمين و وسط و شمال .
مع الشكر
child lock
اى اريال ممكن يركب وتمنه من 10 الى 20 جنيه بالكتير القاعده بتاعت الاريال زى ماهى حتفك الاصلى وتركب التانى وخلاص عن طريق ربطه
الزرار الحديد ده بيمنع فتح الابواب من جوه علشان الاطفال وهوتكتين بس على ما اعتقد
ياباشا المفتاح ده بيمنع فتح الباب من جوه حتى لو السنترلوك مفتوح وملهوش دعوه بان المسوجر نازل او طالع اما من بره بيفتح عادى وجرب بنفسك وشوف بس انت ولادك باين عليهم عفاريت :36_2_33:
مقولتليش جبت الاسبراى اللى كنت طلبت اسمه منى ولا لا
انا تحت امرك احنا هنا علشان مساعدة بعض
بس انت احلى حاجه انك قفلت الموضوع بتاع مشكله قابلتنى فى مطلع لان كان فيه ناس حيخلوك تكره العربيه ويلغبطولك الدنيا فى بعض وده بسبب ان كل واحد عامل فيها ابوالعريف والعربيه اساسا زى الفل ومفيهاش حاجه وربنا يخليلك ولادك ويطلعوا عينك اكتر من كده كمان لان الشقاوه فى الاطفال بيبقى دمها خفيف جدا
على فكرة انا خليت واحد يجرب سحب العربية و قالى ممتازة بس انا علشان المطلع فى ملف و بلاحظ ان فى عربيات بتعدينى قلقت شوية و عاوز اقولك انا بطلع المطلع على الثانى سرعة 40 ( ده ملف و مطلع ) ثم فى نهايته مطلع مفرود بطلعة على الثالث بسرعة 60 فاية رايك يا صديق ؟
سرعتك كده مظبوطه اهم حاجه فى المطالع انك تدى الغيار حقه يعنى لو انت معتاد تغير فى حدود 2500 ار بى ام ابقى غيرعلى المطلع فى حدود 3000 اربى ام ولو وصلت ل 3500 مفيش مشاكل مش عاوزك تقلق ابدا خصوصا لو العربيه محمله ناس وحاجات فى الشنطه فلازم كل غيار تحرق عليه شويه ومفيش اى ضرر على العربيه حتى لو صوت الماتورعلى كمان بس ده المفروض يبقى لفتره زمنيه بسيطه وبعدين تنقل الغياريعنى حاقولك بالتفصيل
انت تحرق على الغيار لحد 3500 اربى ام وممكن اكتر كمان بس ماتثبتشى على كده طبعا فحاتيجى ناقل بعد كده على طول على الغياراللى بعده حتى لو فوق المطلع نفسه لانك خلاص شبعت الغيار ومكن تنقل فوق المطالع عادى طالما مشبع الغيار
الكلام ده انا اتعلمته لما بدات اسوق واتعلم السواقه فى شركة مقاولات كنت شغال فيها وكان معايا سواقين درجه اولى وبصراحه علمونى السواقه على اصولها واتعلمت على عربيه نيسان نص نقل يابانى كانت تحفه بصراحه كانت انعم من اللوجان اللى معايا كباور دريكسيون ودبرياج انا كنت بلف الدريكسون بصوبع ايدى وعملت نفس غلطتك دية فى بداياتى والعربيه سوقتها وكانت محمله حاجات وطالع مطلع ونقلت الغيارات بدرى زيك كده ولاقيت صوت الماتور كركر وراح فى داهيه ودخان اسود رهيب طلع من الشكمان وساعيتها فهمونى غلطى واتعلمت منه
اما لو العربيه فيها مشكله يعنى الماتور ضعيف او اسطوانة الدرياج فيها حاجه او الحموله كبيره جدا على العربيه وهى سليمه كمان حيحصل الاتى انك طالع سليم ومدى الغيارات حقها ومثلا المطلع طويل زى على الطريق الصحراوى وانت رايح من القاهره للاسكندريه فى مطالع كبيره وطويله جدا حتلاقى العربيه بتنخع منك والار بى ام بيوطى وفى الحاله دية لازم تنزل بالغيار درجه اقل يعنى لو على الخامس تنزل الرابع وهكذا علشان ترجع للعربيه العزم بتاعها تانى بس الكلام ده مش حتلاقيه غيرفى العربيان النقل فقط لانهم بيحملوا حمولات فوق طاقة العربيه بالضعف
انا كنت راكب مره مع واحد من السواقين عندنا فى عربيه جامبوا وكانت شايله حوالى 6 طن يعنى ضعف حمولتها كان ماشى بسرعه وطالع صح جدا على الخامس ونخعت منه برده وسقط غيارات من الخامس لحد لما وصل للتانى تخيل عربيه طالعه بسرعة 100 كيلو وسرعتها نزلت لحوالى 30 كيلو بسبب الحمل الزياده والضغط على الماتور
انا عارف انى طولت عليك بس يارب المعلومه توصلك لانى اسلوبى فى الكتابه ملعبك شويه
يا باشا المعلومة دخلت النخاشيش بس ايه رايك آخر ار بى ام لنقل الغيار 2.5 و لا 3 و لا 3.5 فى ناس بتقول 3 و ناس بتقول 3.5 فايهما اصح للموتور ؟
فى تعقيب على ضغط الاطارات انتا رديت على سؤالى زى جميع الزملاء ما تفضلوا و قالو 29 قدام و 32 ورا و انا لسا قافل مع خدمة العملاء 16202 و افادنى المهندس 30 قدام و 30 ورا هذا للعلم
مع الشكر و اسلوبك ممتاز يا باشا
فى موضوع البطاقه الفنيه للوجان هنا
http://www.nilemotors.net/Nile/25545-a.html
مكتوب ان العزم الاقصى 128 نيوتن متر على 3000RPM
يبقى كده افضل رقم هو 3000 وده اللى بستخدمه جوه البلد لكن لما بكون مسافر وعاوز العربيه تسحب بسرعه بنقل على 3500rpm
وبالنسبه للكاوتش انا شايف على قايم الباب مكتوب 29 و32 علشان كده بظبط على الرقم ده لكن مش عارف خدمة العملاء دول بيبقوا صح وعارفين معلومات سليمه ولا لا
بمناسبة المطلع انا النهاردة كنت طالع على الغيار الثانى بسرعة 40 كم و ورايا ميكروباص ماشى بنفس سرعتى و مرضيتش اعديه و فجأة يا باشا لقيته طلع من على يمينى زى الصاروخ ، طب ازاى ؟ بالرغم من انه ماشى بسرعة 40 زيى انا ؟ هل نزل للاول و داس بنزين جامد ؟ و لا عمل ايه ؟ انا هتجنن و اعرف !!! ياريت تشرحلى بالتفصيل علشان انا بضايق لما حد يعدينى فى المطلع ده لانه ده طريقى اليومى من الشغل للبيت
اغلب العربيات التويوتا الجديدة بالذات الميكروباصات موجود في الموتور اتنين تربو يعني في السحب بتفرق جدا ( ده رايي المتواضع )
انت عرفت ازاى ان هو ماشى 40 زيك وماهو طاالما طلع منك يبقى اكيد مزود السرعه وبعدين مفيش عربيه جاز الاول فيها بيجيب 40 ده غالبا بيبداء حركه على التانى مش الاول كمان واذا كان البنزين فى معظم العربيات مش بيجيب 40 على الاول
هو اكيد بيحرق على الغيار وخلاص وبعدين متبقاش موسوس بالشكل ده ودايما شكاك وسيب الامور ماشيه ببساطه علشان نفسيتك ماتتعبشى انت ممكن تحرق غيارات جامد وساعتها مفيش حد حيقدريعديك بس نا انصحكشى بكده لانه فى ضرر على الماتوربتكراره دايما