الموضوع: سؤال للمهندسين المدنيين؟

بص يا سيدي الفاضل
بما اني مهندس مدني و متخصص في الاعمال المساحية و امتلك شركة للاعمال المساحية بفضل الله
و اواجه كثيرا مواقف مثل هذه مع الملاك و مع مهندس الموقع او المقاول و سأشرح لك من وجهة نظري المتواضعة السر الخفي
طبعا مع احترامي لكل المشاركات من السادة الافاضل قبلي
لم يتطرق احد منهم لمشاكل مهندس الموقع
و سأتحدث بالبلدي كده علشان الناس اللي بتقول الموضوع مش هندسة دي اشتغالات
نحط نفسنا مكان مهندس الموقع او مقاول التنفيذ اللي بيبقي معندوش سوي اربع نقاط لقطعة الارض 600 م مثل حالة حضرتك ودي حالة صغيرة جدا انما هناك مساحات اكثر من 1500م مثلا
و عنده منسوب حفر مثلا 1,5 تخيل بقي لما يبقي النقاط الرئيسية له منسوبها مرتفع عن باقي الارض فالموضوع بيبوظ منه و ممكن النجار يكبس بالنجارة و تصل في بعض الاحيان لعشرة و عشرين سم
انما لما بتكون الارض امامه كلها منسوب واحد و بيعمل العادية (( فرشة نظافه )) فبيستطيع ساعتها انه يعمل رسم عليها لاماكن المسلحة بدون احتياج لخنزيرة علي اجناب الحفر و اسقاط نقاط و خلافه فبمجرد انه يثبت كام سيخ بيشد منهم كل ما يحتاجه في انجاز القواعد و رقابي الاعمده
طب لو هوه معندوش مشكلة في النقاط يعني مثلا محصور بين مبنيين في حالة بناء ففي هذه الحالة بيكون الافضل لمقاول الحفر انه يحفر كل المساحة هربا من انه يخل بجزء في جانب من الجناب فيعاقبه المالك بأنه يرجعه يكمله و لكن لما بيكون الحفر متكامل و بيكون في اغلب الاحيان ال 200 او 300 متر اللي حضرتك بتقول عليهم ليه نحفرهم هتجد انهم عبارة عن ردود في كامل حدود الارض يعني لازم (( تجير )) له الارض حتي يمشي عليها و هوه زي ما زميل قال قبلي ان هناك نوعيات من التربة بتحتاج سنادات و خلافة فبيكون الافضل الخروج من حيز الرسم علي الارض و الخوف من عدم تحقيق المساحة المطلوبة للفرشة العادية و الخوف من (( تهييل )) التربة علي اجناب الارض و من ثم التضييق علي النجاريين و هما بيشتغلو تحت في القواعد و نجد في الاخر بعد كل ذلك ان اللي هيفضل في كل جنب من الجناب بعد اقامة السور و وش القواعد الداخلية للمبني (( يا دوب متر او متر ونصف )) و عليه بيكون القرار الاسلم الحفر لكل الارض (( حقنا للدماء ))
و هذا مجرد رأي من واقع خبرة (( 13 )) سنة مرمطة مواقع
و لا انا (( مقاول حفر عاوز اهلب و لا انا مهندس تنفيذ خايب عاوز اريح نفسي و لا انا مالك خايف ادفع فلوس كتير
و انا اسف للاطالة و لكن اكيد الكلام ده بالتفصيل ممكن يفيد ولو اخ واحد معنا هنا في المنتدي


م.حاتم السباعي