جمعه رحيل الفساد بدل رحيل مبارك

**nabaster** · 02-02-2011 01:57 PM

الحمد لله شباب مصر اثبتوا انهم رجاله

شباب مثقف واعي مسمحش لحد يركب او يتسلق علي اكتافه

في اسبوع واحد عملنا الي مكناش نحلم بربعه

احنا لسا باقيلنا يومين علي يوم الجمعه الجايه

ومش عايزين ننسي دم الشهداء الي راحوا ضحايا في تغيير مصر

اكتر من 380 شهيد راحوا فداكي يا مصر

الجمعه الجايه ننزل الشارع بس المره دي مش علشان نطالب برحيل مبارك

المره دي علشان نطالب القصاص لهؤلاء الشهداء

نطالب بمحاكمة الناس الي قتلتهم بدم بارد

نطالب بادراج الماده 88 ضمن التعديلات الدستوريه لضمان نزاهة الانتخابات

ونحاول نقول فيها ونثبت ان شبابك يا مصر متحضر

وبيمارس حقوقه بدون تخريب او دمار

سلميه .. سلميه

A.Yakout

**mfarag** · 02-02-2011 02:11 PM

طبعا مطالب مشروعة جدا

بس حاسب هتلاقى ميت واحد من المنتدى هاجمك دلوقتى عشان الخراب و الفوضى و الامان

و نجح اعلام مبارك و انس الفقى فى الربط بين المظاهرات و الاحتجاجات و انعدام الامن

مع ان السبب الاساسى فى الخراب مش المظاهرات اللى كان ممكن استيعابها سلميا

لكن اطلاق البلطجية و المساجين على الشارع

انا شايف ان يا ريت نوصل لحل تفاوضى قبل الجمعة

خصوصا فى ظل محاولة النظام عمل احتكاكات بين مظاهرات المعارضة والتاييد

**Hany A Fattah** · 02-02-2011 02:17 PM

مهما قلنا مش هانلاقى استجابه تانى خلاص هو وصل للعالم الرساله اللى عايزها توصل
واى حاجه بعد كده هاتلاقى بتوع الحزب الواطى بيطلبوا بعكسها وهاتبقى فوضى وخلاص

**shok** · 02-02-2011 02:24 PM

كل الى حصل دة ملوش اى لازمة بدون تعدييل المادة 88
االخاصة باشراف القضاء على الانتخابات
ومحاكمة الخونة من رجال الشرطة الى قاموا بقتل المتظاهريين ودهسهم بالعربات
وحل مجلس الشعب والشورى

**cayman69300** · 02-02-2011 02:26 PM

طبعا ربنا يكرمنا بالشهادة
و ان شاء الله هنجيب للناس حقهم و لاهليهم كمان

**zaza_lanos** · 02-02-2011 02:29 PM

جاء الوقت لكى يعترف باخطائه فى حق الوطن
مبارك ليس الاله الفرعونى والحاشية هى الفاسده
النظام كاكل
ومتلموش على الناس فضلوا مكبوتين وخايفين لفترات طويلة

المهم الان الحفاظ على البلد وعدم السماح للمخربين بالتزايد

**Tarek Gen 2** · 02-02-2011 02:30 PM

معلومة صغيرة

رحيل الفساد = رحيل مبارك

**ahmed-moga** · 02-02-2011 02:38 PM

ولابد من عزل الوزراء الجدد المتبقي عليهم من وزارة الفساد السابقه ابواق السلطه عملاء الموساد امثال مفيد شهاب وسامح فهمي وعائشة عبد الهادي ومصيلحي ووانس الفقي وصفوت الشريف وزكريا عزمي وحل مجلس الشعب والشوري واعاده الأنتخابات مره آخري لكي يكون أختبار ودليل علي حسن النوايا بعدم اللجوء الي التزوير مره آخري