الموضوع: كده كتير - البلد بقت لعبة

المشاركة الأصلية كتبت بواسطة mahmoudysf

يا اخي الفاضل اديك قولتها بنفسك
الغاء قانون الطواريئ هل ده تم
رفع الحد الادنى للاجور هل ده تم
حل مجلس الشعب هل ده تم
يبقى لازم مع الاسفزاز ده سقف المطالب يعى
معلش يا جماعة اللي كان داخل المظاهرة ومعندوش استعداد يتحمل العواقب او يدفع جزء من التمن ما كانش دخل من الاول
لان فيه ناس كتير كانت فى اول يوم وببتطالب بعد كدة بالعودة
وبنظرة عادلة المكاسب اللي اتاخدت بالقطارة حتى الان دة لو فيه مكاسب حقيقية ما جتش الا بالاستمرار في التحرير
مفيش عملية بتم بدون الم

يا سيدي الفاضل
1- انت الان في حالة حظر تجول و دي اسوا مليون مرة من الطوارئ ولو الجيش طبقها كان هايقبض على اي حد برة بيته في اوقات الحظربما فيهم متظاهري ميدان التحرير
ثم اعتبر يا سيدي ان من ضمن التعديلات التشريعية الغاء حالة الطوارئ ايه المشكلة ؟
2- رفع الحد الادني للاجور تمام معاك لكن هل ده ممكن يتم النهاردة ؟
طيب الحكومة هاتطبع ورق وترفع لك الحد الادني للاجور ويحصل تضخم لان الانتاج مش هيزيد بنفس المعدل والحاجة ام جنيه تبقي بعشرة وخللي الزيادة الفورية تنفعك ؟
يعني ضرر الرفع الفوري للاجور بدون زيادة الانتاج كارثة اسوا
والحمد لله الانتاج عندنا زي الزفت واصبح اسوا بعد الاوضاع الاخيرة وشركات كتير هاتصفي اعمالها وبدل ما كريم قلقان ان الشركة واقفة العمل هيقلق هو والاف وملايين غيره لان الشركات اغلقت العمل
3- حل مجلس الشعب
طب التعديلات التشريعية والدستورية اللى مطلوب تتعمل مين اللى هيعملها ؟
علشان منلفش كتير المجلس الحالي هايتم تعديل عضويته وفعلا مش هيوصل غير اللى يستاهل

ومكاسب ايه بالقطارة اللى اتاخدت ؟
اي مكسب من اللى حصل سواء القضاء عل ىالتوريث او تعيين نائب او تشكيل وزارة نصها على الاقل محترم او ابعاد احمد عز من الصورة كل دي كانت احلام مش طلبات

المشاركة الأصلية كتبت بواسطة wael17

و ماله يا استاذ كريم لما شركتك تخسر 5 مليون كل يوم و انت ماتقبضش مرتبك...ايه يعني...كله يهون عشان خاطر شباب التحرير اللي في الميدان يحس برجولته و يفرض ارادته علي الحكومة و الشعب
كان يوم اسود يوم ما عملت حساب علي فيسبوك

هو ده المقلب انهم واخدينها بلطجة وفرد دراع وفرض راي واستبداد بالدولة وكل المواطنين اكتر مما كان يفعل النظام السابق

المشاركة الأصلية كتبت بواسطة wael17

و مفيش عملية تتعمل من غير موافقة المريض
يا تري انت شايف ان ال 85 مليون مصري موافقين علي اللي بيحصل في ميدان التحرير دلوقتي
وبعدين ماحدش بيتكلم عن قانون طوارئ ولا حد ادني للاجور...دي اسمها جمعة الرحيل مش جمعة الطوارئ ولا جمعة الاجور

محدش بيتكلم دلوقت غير على رحيل الرئيس لانهم عارفين انه صعب جدا
ومفيش غير مطالب الاخوان بدون ان يكون باسم الاخوان

المشاركة الأصلية كتبت بواسطة heshamzaky

و الله الناس حا تثور على شوية العيال و الناس الى فى التحرير مش فارقة بقى دة حزب زيد و لا عبيد الناس حالها وقف و كلة بيدور على مصلحتة على حس الشباب الى للأسف مش فاهمين حاجة و شوية عيال بتطلع فى التيليفزيون تتكلم و الله العظيم أى عيل فى دول لو كان دخل الجيش كان عرف يعنى أية يبقى راجل و يسترجل مش فالكر نفسة قاعد قعدة مع شوية شباب قعدة عرب بيصفو خناقة حاجة تقرف و دول بيتحركو زى اليويو و هما مش فاهمين فين اهاليهم دول الى مسرحينهم و سايبينهم كدة

يا باشا كفاية انهم مش بيحترموا اي حد سواء لسن او منصب او غيره
ممكن تلاقي عيل من العيال دي معاك في الشغل بيقولك عايز ايه يا فلان ولو طلبت منه يناديك بلقبك يقولك انا مديتكش اللقب ده ومش معترف بيه

المشاركة الأصلية كتبت بواسطة tyler_durden

هو الشباب في التحرير دول معاهم مفاتيح البنوك مثلا.. أو فلوس المرتبات في جيب واحد منهم ?
إيه المشكلة إن ناس تتظاهر بشكل حضاري في ميدان ? هل ده يعني إن البلد حالها يقف ?
ده عناد من النظام مع الشعب كله ..
نظام إيه ده اللي مش عارف يدير البلد علشان ناس واقفين في ميدان ?
الحل مش عند الشباب الحل عند النظام هو اللي في إيده تسيير البلد مع بقاء المظاهرات قائمة
الرجاء نتوجه كلنا بطلباتنا للنظام إنه يفتح البنوك و غيرها من المصالح و بلاش إبتزاز للشعب .. احنا ناس عندنا بيوت مش معنى إن فيه ناس بتتظاهر سلميا إن حالنا يقف كده
هو إبتزاز يعني ? يا الشباب يوقف المظاهرات يا نجوع كشعب ?

لا يا سيدي بس اضمن ان البنوك تشتغل من غير ما يحصل مشاكل سواء البلطجة او الخوف من السحب الرهيب اللى هايحصل خاصة اول يوم واللى ممكن فعلا يعملك انهيار اقتصادي لو الاموال السائلة في البنوك لم تكف لسداد طلبات السحب النقدي واتفضل على انهيار العملة لان ناس كتير جدا هتحاول تغير العملة المصرية لدولار خوفا من انهيار العملة مما سيؤدي الي انهيارها اكثر واكثر
والناس اللى حضرتك بتقول بيتظاهروا في ميدان بيهددوا ان لو الدولة استمرت في العمل وترك لهم ميدان التحرير للتظاهر هينقلوا التظاهر لكل ميادين مصر ويوقفوا البلد كلها
والنظام كان يقدر يدير الدولة ببساطة انه يلم كل اللى في التحرير دلوقت عن طريق الجيش لكن اتفرج على النتيجة هاتبقي كارثة

المشاركة الأصلية كتبت بواسطة ahmed_su

انت ما سمعتش انهم اتقال لهم خليكو فى التحرير وخلو الناس
ترجع اشغلهم والبلد تدور
رد على المذيع بكل صفاقة لاء ... هنبلغ كل اصحبنا وهنخلى كل الشباب تنزل فى كل الميادين
وقعد يعدد اسماء الميادين فى كل المدن اللى فى مصر ...!!!!!!!!!!!

يا احمد والله او اتجاب لهم لبن العصفور بالطريقة دي مش هيروحوا
العيال دي عاملة زي الطفل الصغير اللى استجبت لطلبه فطلب طلب تاني ولما استجبت له بقة عمال يطلب ويطلب مش مهم تقدر تجيب له الطلب بتاعه ولا لا مش مهم ينفع ولا لا المهم ياخد اللى هو عايزه وخلص حتي لو اضطريت تستلف وتشحت علشان تنفذ له طلباته

المشاركة الأصلية كتبت بواسطة baskota

ده على اساس ان المظاهرات هى السبب فى وقف حال البلد
ما المظاهرات كانت شغالة من يوم 25 ل يوم 28 والبلد ماشية والناس بتروح شغلها وكله تمام وساعتها كانت المظاهرات حلوة والشباب دول رجالة مادام بتاكلوا وبتشربوا
ولما الحكومة طلقت بلطجيتها عالشعب عشان تلاقى ذريعو تعمل حظر تجول وتوقف مصالحكم وتخوفكم وترعبكم
بقا الشباب بتاع الفيس بوك ده وحش وهو اللى خرب بيوتكم
لا حول ولا قوة الا بالله
لما تكونوا عارفين كويس مين المذنب وتعاقبه اللى بيقف قصاده وتدعو عليه
يبقا فعلا خسارة الشباب اللى مات فى مظاهرة زى دى
ويمكن لو واحد فيكم اخوه ولا ابنه كان مات فى التحرير مكنش هيبقا ده موقفكم

بلد ايه اللى كانت ماشية يا بسكوتة ؟ يمكن علشان مش بتنزلي كتير مش واخدة بالك ان نص البلد عطلان من يوم 28 وكلها من يوم السبت اللي فات
وحظر التجول كان لازم يتفرض لان الشرطة لم تعد قادرة على القيام بعملها لخيانة داخلية او لضغط اللصوص والحرامية وجماعات مسلحة بمعني الكلمة هجمت على السجون كل دي اسباب لكن الواقع ان الجيش كان لازن ينزل البلد وحظر التجول على فكرة اتعمل من قبل ما تبدا السرقات لو تفتكري كان الجمعة الساعة 6 مساء ومكانش حصلت الفوضي دي كلها
ودلوقت بيترفع ساعات حظر التجول لكن المشكلة ان البهوات اللى قاعدين في التحرير بيهددوا بمظاهرات مليونية يوم الاحد والثلاثاء والخميس طب الشركات والمصانع والمحلات هاتشتغل ازاي ؟ وبيهددوا انهم هايعملوا تظاهرات في كل الميادين طيب البلد هاتشتغل ازاي ؟
والمذنب النهاردة الجميع بما فيهم الموجودين في التحرير وشوفي كويس التعليقات بتاعة الاعضاء وهتلاقي ان الاغلبية بتلومهم على استمرار الوضع الحالي
وعلى فكرة فيه ناس كتير من اللى بيقولوا كدة نزلوا المظاهرات لكن لما اتحولت لعناد بدون داعي وسيطرة من الاخوان انسحبوا
ومتهيالي محدش من قريب حضرتك مات او اصيب علشان تاخدي الموقف ده وبالمقابل الناس اللى رافضاها مالهاش مصلحة غير ان الحال يستقر ويتم اعطاء الفرصة لتحريك حال البلد وعمل الاصلاحات فان لم تتم وقتها تعود البلد كلها وتنزل الشوارع ونقفل البلد كلها