الموضوع: كده كتير - البلد بقت لعبة

المشاركة الأصلية كتبت بواسطة wael17

و مفيش عملية تتعمل من غير موافقة المريض
يا تري انت شايف ان ال 85 مليون مصري موافقين علي اللي بيحصل في ميدان التحرير دلوقتي
وبعدين ماحدش بيتكلم عن قانون طوارئ ولا حد ادني للاجور...دي اسمها جمعة الرحيل مش جمعة الطوارئ ولا جمعة الاجور

يا اخي هما اللي في التحرير هما اللي سيبين الفوضى في الشوارع
وهما اللي مانعين مؤسسات الدولة تشتغل
والا اقتصاد البلد كله متركز في التحرير
للاسف محدش عايز يشوف الحقيقة
وكلو شايف انو محققش اي مكاسب حتى الان
ولاكن كلو قال اه من اول قلم
سيبو بقى اللي حاسين بالمشكلة الحقيقية يعبرو عن نفسهم
ويا ريت يا ريت بلاش قنوات الحكومة
ما توجهو كلامكو للوجهة الصحيحة بقى
احنا سايبين الفتوى وبنكلم الحرافيش

المشاركة الأصلية كتبت بواسطة elshimy

والدي الله يرحمه قالي نكته اتنين حشاشين واحد بيقول للتاني ماتيجي نحارب الامريكان يقوموا محتلين مصر وناكل ونشرب علي قفاهم فالتاني قالو طب لو احتاليناهم احنا هنعمل ايه..........
هي دي الكوميديا السوداء ان كل اللي خرج في اليوم المنيل ده كان فاكر انه هياخدله قلمين من اي ظابط او اي شومه من اي عسكري
ويروح وهي علقه تفوت ولا حد يموت مره واحده لقوا البلد بقت في ايديهم وياويل اللي يمشي ورا العيال

معاك حق كل اللي بيطالب بانهاءالوضع الان ومش الان بس لا كمان ده من قبل ما الكبير يقدم اي تنازل من اللي قدمة
كانو فاكرين انها لعبة وشوية بلوتيكا ومش قادرين يحسو بالناس اللي متمسكة بحقها بجد

المشاركة الأصلية كتبت بواسطة heshamzaky

معلش سؤال هية العملية سلق بيض زى ما المثل بيقول و لا العيال الى فى التحرير واخدينها بالدراع . بص يا باشا العيال الى فى التحرير دول حاسين بالامان لوجود القوات المسلحة طب السؤال من هو القائد الاعلى للقوات المسلحة الى فوق طنطاوى هو حسنى مبارك يعنى برضو هو الى مسيطر

30 سنة وتقول سلق بيض لا تعليق

المشاركة الأصلية كتبت بواسطة karim_monir

متفق معاك في النقطة الاولى
قانون الطوارئ لازم يرجع
لكن هل تفتكر بمقارنة الخسائر المرعبة بالمكاسب وهي الغاء قانون الطوارئ اننا كدة كسبنا ؟؟

زي اللي وقفت على وشه ذبابه ضربها برصاصه
لا يتفع الفعل ورد الفعل
حجم الخسارة كبيرة جدا جدا

النقطة الثانية رفع الحد الادنى للاجور
لازمله مليارات تغطيه في ظل موازنة خسرانه ودعم مابيروحش لمستحقيه
مين يقول ان صاحب عربية بنص مليون جنيه يحط بنزين مدعم حتى لو دفع ضرائب قد كدة
انا معاك في ده لكن حجم الخسائر ما زال مرعب
اتنين ونص مليووون من العاملين بالسياحة بكل اشكالها وصناعتها المغذية اصبحو مشردين
يعني بكرة تلاقي مترجم زي الفل بيشتغل ساعي في مكتب
ازاااي يا اخوانا
حل مجلس الشعب قال هاينفذه ويقبل الطعون
ازاي عايزين تنفذو الحاجة بين يوم وليله
دي دوله مش عزبه
اي مكاسب عادلة التي تساوي تجويع وتشريد الالاف الاسر
والله ثم والله لنحاسب ان كنا مشتركين في هذا الاثم الكبير
ولدعوة مظلوم واحد مات جوعا او بات بلا طعام
لتقبل عند الله وهو قادر
وتحل علينا المصائب اكثر من ذلك

امامي العشرات من الحالات التي تبكي العيون دما عليها
لا حول ولا قوة الا بالله

اولا سبب الخسائر الموجودة دي كلها هي الحكومة وكلنا عارفين ده كويس
وده نوع من الضغط علينا عشان نقول اخية العيال الوحشين دول هما السبب هما اللي عملين فينا كد
وبدل ده ما يكون سبب لتمسكنا بمبدا وافقنا عليه من الاول ونوجة عتابنا وسخطنا على العصابة اللي بتعمل فينا كدة لا نقول العيال اللي في التحرير هما السبب انت بتحسبها بخساير مادية
ونسيت زمايلك اللي ماتو لغاية الان ودي مش خساير مش حرام دم دول يروح بدون فايدة
وعلى فكرة كلو فرحان وبيقول اخية ايه الاشكال دي مش دول بتوع 25
فعلا فيه كتير فيهم ما كانش موجود في 25 بالاضافة لوجود ناس اعرفهم من اول يوم موجودين لغاية دلوقتى بس الفرق وزي ما وضح وللاسف مضطر ااقول كدة ان فيه ناس مبسوطة كتير ونزلت يوم 25 مغامرة لاكن عايزين يرجعوا لحالة الرفاهية بسرعة ومش عايزين يكتئبو وما يرحوش الكافية
هي كانت مغامرة ومش ضامنين فيها اي مكاسب
لاكن معظم الموجودين دلوقنى ناس كتيرمعندهمش ع عربيات زينا وعايزين يحطولها بنزين 95 وزهقو عشان مش عارفين يفسحو ولادهم
لادول ناس كانو ميتين ميتين مش حاسين باي ادمية لا فيه فلوس لعلاج ولا سكن مناسب
ولا عارفين ياكلو هما دول اللي واقفين دلوقتى بالاضافة لكتير من الشرفاء
وسبونا من اصحاب الاجندات دلوقتى لان مش دول اغلبية اللي في التحرير
الواجب علينا اننا نساعد الناس يحققولنا اللي كان عمره ما هيتتحق
ولو فيه يا سيدى واحد بواب تعبان بدل ما نقول المشكلة في الناس فى التحرير كل عمارة تحاول تساعد البواب بتاعها
وكل مجموعة فى منطقة شايفين حد حالة تعبانة يقفو جنبة
ونشوف مين اللي عمل كدة فينه عمرنا ما هنلاقيهم من اللي في الميدان

المشاركة الأصلية كتبت بواسطة baskota

ده على اساس ان المظاهرات هى السبب فى وقف حال البلد
ما المظاهرات كانت شغالة من يوم 25 ل يوم 28 والبلد ماشية والناس بتروح شغلها وكله تمام وساعتها كانت المظاهرات حلوة والشباب دول رجالة مادام بتاكلوا وبتشربوا
ولما الحكومة طلقت بلطجيتها عالشعب عشان تلاقى ذريعة تعمل حظر تجول وتوقف مصالحكم وتخوفكم وترعبكملعنده
بقا الشباب بتاع الفيس بوك ده وحش وهو اللى خرب بيوتكم
لا حول ولا قوة الا بالله
لما تكونوا عارفين كويس مين المذنب وتعاقبه اللى بيقف قصاده وتدعو عليه
يبقا فعلا خسارة الشباب اللى مات فى مظاهرة زى دى
ويمكن لو واحد فيكم اخوه ولا ابنه كان مات فى التحرير مكنش هيبقا ده موقفكم

معاكى حق

المشاركة الأصلية كتبت بواسطة mohamed_hegazy

محدش يزعل - الناس اللى خرجت من الاول بيطالبو برحيل الرئيس - ودا معناة رحيل نظامة الفاسد اللى خرب البلد - الدوله قاعدين يلتفو وخايفين لانه كللهم مذنبين - اذا توقف الاحتجاج سوف يبقى الفاسدين كماهم ويكون خسارة كبيرة على الفاضى - الهمه ياشباب هانت وغدا افضل ان شاء الله

يا اخي والله لو نفزو الطلبات المنطقية المطلوبة بعيد عن رحيل الرئيس والكلام ده انا عارف ان 90%من الناس دي هتروح
لاكن كتير مش حاسس ان فيه حاجة اتحققت رغم انها مش محتاجة اكتر من قرار فوري

المشاركة الأصلية كتبت بواسطة wael17

كده قلبت علي صياعة و قلة أدب
يعني هو لما يقفل الشوارع و الميادين بيعاقب الحكومة ولا بيعاقب الشعب؟
خلاص المطالب وصلت و بتتنفذ...قمع الشرطة انتهي و الشرطة نفسها انتهت..الرأي العام العالمي تعاطف و ساند و طلب من مبارك يمشي و مش ناقص غير تدخل عسكري....كده بقي عقاب للشعب مش للحكومة و صدقوني لو الليلة دي ما اتفضتش خلال كم يوم الشعب هو اللي هينزل يربي العيال دي

يا اخي المتظاهر قفل التحرير بس
الحكومة واقفة حال البلد كلها

يا دكتور محمد ماكينات الصرف شغالة ، ونت البنوك شغالة قبل النت بيومين من أجل التحويلات ..
يعني بالذمة التحويلات مش خطر دلوقتي ، وفتح البنوك هو الخطر ..
وبعدين يعني نصدق إنهم هاينزلوا الميادين كلها .. وفي الوقت نفسه نصدق إن الحكومة هاتعمل اللي احنا عايزينه بعد ما يتفض الاعتصام ..

أنا في منطقتي ، وأقول أنا شخصياً قبضنا على معاون مباحث كان داير طول الليل هو وواحد صاحبه بيضربوا بالآلي في كل مكان .. وسلمناهم للجيش ، ولقينا معاهم في العربية ثلاثة اسلحة آلية وخمس صناديق ذخيرة ..
لو هاحكيلك على اللي اتمسكوا منهم في مربعنا بس .. هاتقول عليا كداب
أنا باتكلم على اللي قبضت عليه بنفسي
احنا في حالة عقاب جماعي من النظام بدأ بأسلوب ممنهج منذ يوم الجمعة
بهدف التخويف والترويع الآني الفوري
ولما فشلت الخطة بقى الهدف الخوف والترويع من المستقبل
وهو كان المستقبل أصلاً منور وجميل علشان نخاف منه
طول عمرنا خايفين من المستقبل
يبقى الأساس هو ضمان المكتسبات التي تحققت
وضمان المكتسبات مش إن الريس يمشي
ضمان المكتسبات صياغة فورية لمواد الدستور المزمع تعديلها ، ثم إقرارها في جلسة واحدة لمجلس الشعب
ورفع حالة الطوارئ
دي كلها قرارات ورقية .. هاتحصل في أيام وتخلص والكل يستريح
يبقى إيه لازمته التأخير والعناد والحوار الوطني والكلام الفارغ ده كله ؟؟
مش كدة ولا إيه ؟؟

المشاركة الأصلية كتبت بواسطة wael17

لا مش ماتش نهائي ولا حاجة...دول عايزين يعملوا اسبوع الصمود....و في دعوة انهم ينزلوا مظاهرات مليونية يوم الاحد و الاتنين و الاربعاء...و لما اجازة نص السنة تنتهي هتبقي المظاهرات يوم الخميس بالليل

لافعلا انهارده كان الماتش النهائى بتاعهم ادام الشعب المصرى الى ملوش فى السياسه

لكن صدقنى لو قعدو شهور مش حيتنفذ ليهم اكتر من كده
متنساش ان الرئيس جابلهم واحد من المخابرات يتعامل معاهم

بس يارب الدنيا ترجع وحظر التجوال يتشال والجيش يروح وساعتها حيلاقو نفسهم فى الشارع بلا حمايه

هما دلوقتى بيتحامو فى الجيش
والجيش بياخد اوامره من النظام

للاسف الناس نش قادرة تقتنع ان المطالب زادت و عمالة تزيد لحد ما هتقلب عليهم و مش هيطولو اي شيء

انا النهاردة دخلت في جدال عقيم مع ناس علي ال Face

و المشكلة ان الناس دي مش عايشة في مصر حاليا

الي في السعودية و الي في الكويت

محدش منهم داري بالاحدث الزفت الي احنا فيها

كل واحد قاعد في بيتة بيشرب الكانز و قاعد ع الاب توب مانتخ عمال يولع الدنيا و يحث الشباب ع التظاهر و يولعها و يسقط الرئيس

و مش هيتحرك الشباب من التحرير غير بسقوط الظالم المستبد

عمالين يرغو و هما و لا واحد فيهم جرب يمسك سنجة و لا شومة و لا مولوتوف يحمي بيه اهل بيته و يفضل واقف للصبح

و لا مرة و هو نايم مريح ساعتين عشان يكمل حرساة مكان حد يصحي مفزوع علي صوت واحد بيقول اصحوووووووووووو و لا صوت شيخ

المسجد بيستنجد و يحث الشباب علي النزول للحماية و لا ضرب النار الي بقي عادي بالنسبة لينا

و لا جرب يشوف رب اسرة مش عارق ياكل اولادة و لا يعالجهم عشان لسة مقبضش !!

و تحاول تقنع فيهم ان انت لو تماديت في مطاليك و الرئيس رحل فعلا مش هطول حاجة غير تغير الحاكم صورياً ففط

انما نفس الحزب هو هو بنفس القيادات بدون تعديلات دستورية

كل الي علي لسانة الثورة و التظاهر حتي تنحي الرئيس و حل مجلس الشعب

طب يبني انت لو حليت مجلس الشعب دلوقتي مين هيوافقلك علي تعديل دستوري كمان دستور بلدك

بينص صراحة علي ان تعديل الدستور لا يمكن ان يحدث الا في وجود رئيس شرعي منتخب

يعني لو الرئيس مشي دلوقتي يبقي انت ولا طلت بلح الشام و لا عنب اليمن

البلد هتفضل في الوضع المهبب دة فترة اطول

مش هيتم عمل اي تعديلات دستورية

بالتالي هيفضل شرط توقيع ال 250 لجنة موجود

ابقي دور بقي علي حد يخش الانتخابات تاني

و مفيش اشراف قضائي

و مبروك عليك انتخابات مطبوخة

بس المرة دي مطبوخة بايدك انت مش بايد حد تاني يا حلو !!

يرد عليك يقولك يعني كل الناس الي بتتظاهر دي مش فاهمة ؟؟؟ و دم الناس الي ماتت دي ؟؟؟

يا جدعان و الله الشباب دة بيتم التلاعب بيه بقوي سياسية و احزاب لا يحركها الا اطماعها

و بيتم تحفيزها و تسخينها بواسطة ناس مش حاسة بالي بيحصل دة خالص

و الناس الي ماتت دي هي دفعت تمن الحرية و الحرية تمنها مش رخيص دة غالي قوي

و ادينا وصلنا لحاجات من 10 ايام مكناش نحلم بربعها

و الي ماتو نحتسبهم شهداء عند الله ان شاء الله

من الاخر الي ايدة في المية مش زي الي ايدة في النار !!