الموضوع: تعبان نفسيا من اللانسر .......ممكن تساعدونى

انا كنت الاول معايا كورولا 2003 اوتوماتيك والعربيه بتاعة مامتى وكنت واخدها وبروح بيها الجامعه وكل مكان مؤقتا لحد ما اجيب عربيه جديده
المهم كان واحد صاحب بابا معاه لانسر سوبر اكشن مو 2007 وكانت عامله 10الف كم بس وقعدت معاه 4 شهور تقريبا بس وقرر يجيب اوكتافيا a5 علشان بيقول عجبته والمانى وعائلى وكده المهم بابا قالى اشترى العربيه بتاعاته ودى فرصه وزى الزيزو وافقت على طول طبعا دى فرصه المهم ركبت العربيه وفى الاول كنت مبسوط بحكايه الشد بتاعاها لانها 1600سى سى يعنى بتسحب اكتر من التويوتا بتاعة مامتى ولكن ما عداش ايام قلائل وبدات اكره العربيه بجد حسيت بفرق كبير بينها وبين التويوتا
العيوب:
اولا:
قالوا عنها ثابته بصراحه هيا فعلا كدا بس انا مش معترف بكده لما تبقى ماشى على 160 مثلا وفى الطريق منطقه مش متسفله صح تلاقى العربيه طارت من فوقها ووتحس كدا كانك هتفقد السيطره ع العربيه دا غير العربيه طول الطريق عماله تتنطط ع الطريق لان طرق مصر مش متسفله صح واى زلطه او اى شىء فى الطريق هتحس بيه عكس التويوتا
ثانيا:
صوتها عالى جدا وبتخنق منه قوى وخصوصا فى الشد اول ما اشد الاقى الناس اللى فى اخر الشارع سمعته وبيبصوا ع العربيه وكمان على السرعات العاليه بحس بتسرب عالى جدا للهواء داخل العربيه مش عارف فين العوازل بقا؟؟؟؟؟
ثالثا:
خشنا جدا ع المطبات بيقولوا علشان العفشه رياضيا بس مكانش المفروض يخشنوها للدرجه دى كدا انا مش راكب ملاكى انا اكتشفت ان التويوتا دى عربيه كنزه باخد المطب على 120 عادى جدا اما الللانسر على 20 يبقى هتتعب قوى وهتطير من فوق المطب وهتحس بكل تفاصيل المطب
رابعا :
بحس بصوت الكوتش وانا ماشى مش عارف دا ليه دا عيب فى العربيه عامة ولا عندى بس الله اعلم خصوصا ان ركبت عربيه واحد صاحبى وسوبر اكشن برضه وسمعت نفس الصوت مش معقول احنا الاتنين محتاجين تغيير بليه والعربيه لسه جديده
خامسا :
التكيييف وحش جدا بجد فى اللانسر
التويوتا والله على اقل سرعه والعربيه بتبرد بسرعه انما اللانسر مش فاهم يعنى ايه المشكله
سادسا :
الفرامل مش قويه والتويوتا اقوى وبكتييير كمان
سابعا :
نورها مش قوى وهيتعبك بليل الواطى هو كويس انما العالى بتاعها مش عالى قوى عكس التويوتا الواطى بتاعها واطى قوى زياده عن اللزوم وبرضه العالى العكس عالى قوى زياده عن اللزوم

--------------------------الخلاصه بجد انا عرفت وتاكدت ان الكورولا تستاهل فرق السعر الاعلى من اللانسر اللى الناس بيقولولى عليها غاليه على الفاضى محدش هيحس بقيمتها اللى ما يركبها حد موضوع الثبات اللى بتتكلموا فيه عنها مبالغ فيه قوى وثباتها مش سىء ولكن وسط واللى مش عجبه ثباتها ممكن يركب جنوط اكبر ويوطيها حبتين انا طبعا بتكلم عن الموديل القديم انما الجديد ثابت تمام ما شاء الله


----------------اخيرا يا جماعه ممكن اسمع ارائكم واحب حد يساعدنى عن رايككم بالرينو ميجان غير حكايه ان صاجها صعيف ممكن تقولوا ايه رايكم فيها بكل حياديه وعاوز اعرف ليه سعر المستعمل فيها بينزل الارض ليه؟
وشكرا على متابعتكم

اولا:
قالوا عنها ثابته بصراحه هيا فعلا كدا بس انا مش معترف بكده لما تبقى ماشى على 160 مثلا وفى الطريق منطقه مش متسفله صح تلاقى العربيه طارت من فوقها ووتحس كدا كانك هتفقد السيطره ع العربيه دا غير العربيه طول الطريق عماله تتنطط ع الطريق لان طرق مصر مش متسفله صح واى زلطه او اى شىء فى الطريق هتحس بيه عكس التويوتا

طب مهو برضه انت شايف الطريق وحش تقوم تجيب 160 عليه ماهو اجدع عربيه لازم تعوم منك في لمناطق دي .
حكايه اي زلطه تحس بيها و دا لان عفشتها رياضيه وبتفضل الثبات علي حساب الراحه.

ثانيا:
صوتها عالى جدا وبتخنق منه قوى وخصوصا فى الشد اول ما اشد الاقى الناس اللى فى اخر الشارع سمعته وبيبصوا ع العربيه وكمان على السرعات العاليه بحس بتسرب عالى جدا للهواء داخل العربيه مش عارف فين العوازل بقا؟؟؟؟؟

ماهو اي عربيه بتشد بيها لازم صوتها يعلي و لا انت عاوز لفت الموتور تزيد و صوت العربيه يفضل هادي وبالنسبه للعزل فاكيد دا مقصود علشان يحسسك بالطابع الرياضي للعربيه.

ثالثا:
خشنا جدا ع المطبات بيقولوا علشان العفشه رياضيا بس مكانش المفروض يخشنوها للدرجه دى كدا انا مش راكب ملاكى انا اكتشفت ان التويوتا دى عربيه كنزه باخد المطب على 120 عادى جدا اما الللانسر على 20 يبقى هتتعب قوى وهتطير من فوق المطب وهتحس بكل تفاصيل المطب

نفس رد اولا !!!!!!!

رابعا :
بحس بصوت الكوتش وانا ماشى مش عارف دا ليه دا عيب فى العربيه عامة ولا عندى بس الله اعلم خصوصا ان ركبت عربيه واحد صاحبى وسوبر اكشن برضه وسمعت نفس الصوت مش معقول احنا الاتنين محتاجين تغيير بليه والعربيه لسه جديده

ممكن يكون صوت الكاوتش عالي و دا بيرجع لنوعيه الاطار نفسه ما الياريس عندي صوت الكاوتش برضه عالي بس مش للدرجه المزعجه .

خامسا :
التكيييف وحش جدا بجد فى اللانسر
التويوتا والله على اقل سرعه والعربيه بتبرد بسرعه انما اللانسر مش فاهم يعنى ايه المشكله

ما جربتوش بصراحه بس ركبت عربيه الدكتور احمد عبد الغني و الاستاذ اسلام شاهين و الاستاذ اسلام المصري(1600) و كان التكييف كويس لكن بيأثر علي السحب او لاء ف دي ما اعرفهاش .

سادسا :
الفرامل مش قويه والتويوتا اقوى وبكتييير كمان

الفرامل مش قويه علي سرعه كام؟؟
ماهو ما تبقاش ماشي 160 و تقول الفرامل مش قويه برضه
انا جربت اللانسر ال1600 سبور من كام يوم و كانت لسه جديده زيرو و ما حستش باي ضعف في الفرمله .
و احتمال يكون التيل بتاعك بيودع ما انت ما تعرفش اللي قبلك كان بيستعمل الفرامل ازاي
ممكن برضه يكون بيشد و يجري و يدوس فجأه و دا بيقلل من عمر اللتيل.

سابعا :
نورها مش قوى وهيتعبك بليل الواطى هو كويس انما العالى بتاعها مش عالى قوى عكس التويوتا الواطى بتاعها واطى قوى زياده عن اللزوم وبرضه العالى العكس عالى قوى زياده عن اللزوم

مفيش عربيه جديده نورها وحش حتي لو عربيه معموله تحت بير السلم !
و انت في التوكيل خليهم يضبطوا النور يمكن يكون عاوز يترجلش او حاجه,
يا راجل انا معايا سويفت 93 و نورها لما بيشتغل بيبقي الطريق ضهر قدامي .

اخيرا يا جماعه ممكن اسمع ارائكم واحب حد يساعدنى عن رايككم بالرينو ميجان غير حكايه ان صاجها صعيف ممكن تقولوا ايه رايكم فيها بكل حياديه وعاوز اعرف ليه سعر المستعمل فيها بينزل الارض ليه؟
وشكرا على متابعتكم

شكلكك كده من الناس اللي بتتلكك للعربيه:)
و اقدر اقولك لو حتغير هات كورولا و بلاش الميجان خالص لانها عاوزه معامله خاصه شويه علاه علي قطع لغيار الغاليه
و زي الاستاذ ابو عبد الله ما قالك شوف بعد ال 100 الف كيلو اللي معاه ميجان صرف كام و اللي معاه كورولا صرف كام ؟؟؟