الموضوع: البورصه المصريه ((انه وقت الشراء))

المشاركة الأصلية كتبت بواسطة Bonanza

بسم الله الرحمن الرحيم

اولا البورصة حلال بالشرطين اللي اتكتبوا
و معني الحتة اللي انت مش فاهما هي انك تاخد فلوس من شركة السمسرة ( علي المكشوف ) و تشتري بيها اسهم بشرط العمولة في هذه الحالة بتبقي اكبر في حالة المكسب اما في حالة الخسارة بيبقي العمولة و الخسارة عليك و الشركة تاخد فلوسها علي داير مليم

اما بخصوص فرصة جيدة للشراء في الوقت الحالي ام لا
فا انا انصحك انك تستني الهوجة دي لما تخلص او بمعني اصح لما يبان معالم للفترة اللي جاية هل هايبقي في استقرار سياسي في البلد ولا لا و لو ابتدت تظهر معالم للاستقرار انصحك تشتري اي سهم بشرط يكون سيولة السهم ده كبيرة يعني ماتروحش تشتري في سهم بيتداول عليه في اليوم ب 10 الاف سهم مثلا ( لازم يبقي سيولة السهم كبيرة )
و طبعا يا حبذا لو اشتريت في الشركات المحترمة و طبعا اكتر شركات محترمة هي شركات اوراسكوم ( تليكوم او انشاء ) و طبعا البنك التجاري الدولي و موبينيل و ماريديف و السويدي
و حاول تبعد عن الشركات الي ممكن يبقي فيها قلق زي طلعت مصطفي و شركات الاستثمار العقاري و الحاجات اللي لسه مش عارفين ايه ها يحصل مع اصحابها
اي سهم لشركة محترمة لا غبار عليها هايبقي فرصة عظيمة للاستثمار سواء قصير الاجل علي مدار مثلا من شهر لثلاث شهور او علي المدي المتوسط بتتكلم مثلا من ستة شهور الي سنه ونص

خد بالك ان زي ما الناس قالت لازم الفلوس اللي تدخل بيها البورصة تكون زيادة عن حاجتك ( ليه بقي ) عشان ماترتبطش بيها نفسيا بمعني انك تبقي قادر تاخد قرارت صح في اوقات صح .. كمان قبل ما تفكر في المكسب لازم تفكر في الخسارة ( لا قدر الله طبعا ) اقصد انك لازم تحدد نسبة ايقاف خسائر لنفسك من الاول يعني لو لقدر الله خسرت هاتستحمل خسارة كام .. يعني لو داخل بعشر الاف جنية ممكن تستحمل تخسر كام منهم

انصحك كمان تختار شركة سمسرة عندها تداول اليكتروني Online Trading عشان تقدر تتابع محفظتك في اي وقت و من اي مكان .. خد بالك ان المبلغ اللي هاتبتدي بيه قليل و ده هايخليك تلعب لوحدك يعني مفيش Account manager هايبقي معاك كبيرك هاتقرأ التقارير بتاعة الشركة و تشتري و تبيع بنفسك ( لان اي مدير حساب بيبقي للمحافظ الي فوق 150 الف جنيه )

انصحك بقي نصيحة كويسة انك ماتروحش للشركات الكبيرة اصلا لانهم بيتعاملو بحجم محفظة العميل يعني الاهتمام بالعميل علي قد محفظته اما الشركات الصغيرة شوية بتهتم بالعميل اكتر عشان تبني قاعدة عملاء كبيرة

اخر نصيحة بقي انصحك بيها انك لازم تقرا كتير و تتعلم كتير عن البورصة و عن شركات السمسرة قبل ما تحط فلوسك فيها

الف شكر علي المعلومات القيمه يااستاذ اسامه