الموضوع: لماذا يجب ان يتنحي مبارك الأن (منقول)

. بابا حسني مبارك
أنا عندي هنا في دائرة عين شمس نائب حزب وطني من ساعة ما وعيت على الدنيا وهو بيكسب في انتخابات مجلس الشعب, يعني على الأقل من حوالي 24 سنة, هل المفروض لما أهل الدائرة يثوروا عليه و يطلبوا خروجه فورا من البرلمان أقول لهم و أنا متأثّر خالص يا جماعة عيب .. فين الأخلاق .. بابا النائب يا جماعة .. الناس الكويسين ميعملوش كده .. ده طلع في الخطاب عمل عيشة و قال أنا آسف .. يالا نسامحه يا جماعة ده خطاب تاريخي والله .. يالا نعيط زي منى الشاذلي , لكل أصحاب نظرية احترام الكبير و زي أبوكو .. السياسة و مصاير البلاد مفيهاش بابا و عمو حرام عليكم دلوقتي بقى زي أبونا بعد ما كان ظالمنا و ذاللنا و سايب علينا كلابه ينهبوا البلد


2. تسليم و تسلم السلطة بياخد ملايين السنين الضوئية

مبدئياً هو فيه حد لسه فاكر إن مبارك فعلاً واعي و مركّز و بيتابع كل شئون الدولة ؟ يعني إيه الفرق لما مبارك يتنحى و عمر سليمان يعمل نفس اللي بيعمله مبارك دلوقتي اللي هو بالمناسبة لاشيء و أمنياً , وجود حسني من عدمه مش فارق ما عمر سليمان هو اللي جاب وزير الداخلية الحالي و بعدين تقوللى هو إزاي يعني يمشي فوراً هو بيسلّم كشك ؟ طيب عشان هو فعلا مش بيسلم كشك ومش هنقعد نحسب معاه الإيراد و لا حيسلم عمر سليمان دفاتر المخزن و المرتجع لازم مبارك يتنحى فوراً أصل تسليم و تسلم الدولة مش إن مبارك يقعد مع عمر سليمان يفتح معاه دفتر وزارة وزارة و شوف ياعم و خد عندك و إحسب معايا و إديني الإيراد و خلي بالك من دول و اعتقل دول هو كان يعني حسني مبارك كل يوم بيشوف أحوال البلد و متابع أمها و عارف كل حاجة فيها دي دولة منهارة محتاجة إنقاذ فوري مش نقعد نسلّم في أمها شهور, لازم يتنحى فوراً والمسئولين في كل مكان

في مصر حيسلموا الأمور لعمر سليمان "متخافوش وزير الري مش حياخد النيل و يرفض يسلمه لعمر سليمان ولا مبارك حيروح شايله و هربان بية"


3. ارحموا عزيز قوم ذل

كان رحمك هو لما كنت بتتهان من أقل رتبة في الداخلية, كان رحم أختك من البهدلة في المواصلات و التحرش, كان رحم أبوك من سرقة رزقه لحساب أحمد عز و ابنه و مراته و أصدقائه طب ليه بس أحمد عز هو اللي يتحاكم ؟ هو مين أصلا اللى لمعة و طلعة و دخاه الحزب ؟ مين المسئول الأول عن فساد مصر ؟ لازم يكون عبرة لكل ظالم بعده وإلا الرؤساء تيجي تمص دم أبونا و بعدين لما نزنقهم يطلع لنا بتوع الأخلاق الجديدة يقولولنا ياجماعة إرحموا عز قوم ذل


4. ياجماعة ده كان بطل في أكتوبر

إيه رأيك في زين العابدين بن علي ؟ كلب ؟ طاغية ؟ ذل شعبه ؟ طيب ما زين العابدين بن علي كان بطل من أبطال تحرير تونس هو و الطاغية اللي قبله الحبيب بورقيبة . كونه " كان " بطل في أكتوبر ميديلوش الحق يذل شعبه و يهينه للدرجة اللي وصلتلها مصر قبل 25 يناير تدهور علمي و صحي و أخلاقي و سياسي و ثقافي و أمني كمان كونه " كان " بطل ما يعفيهوش من إنه تحول لطاغية و ظالم و مسئول أول عن الفساد و الظلم في مصر دة غير إن فية ابطال غيرة كتير من الحرب الله استشهد و اللى اتصاب و اللى أصلح منة كتير و أنا متأكد إنك لو فتشت في تاريخ العادلي حتلاقيه هو كمان كان بطل في كذا مناسبة أو حادث


5. تلاتين سنة أمان

أمان لما كان أصغر أمين شرطة يقدر يهين أكبر أستاذ في الجامعة في أي لجنة أو كمين أمان لما كان أصغر ظابط شرطة أو أمن دولة وأحيانا جيش ليه الحق قبلك في الحصول على شقة او حتى ركنة عربية !! و ممكن يحول حياتك لجحيم لو طلب إيد أختك و رفضته أو حصل بينك و بينه خلاف في العمارة مثلا أمان لما كان البوليس ييجي الخناقات بعد فضّها أمان لما كان كل مصري ممكن ينزل من بيته و ميرجعش عشان ظابط شرطة اشتبه فيه أو قرر يعتقله بموجب قانون الطواريء


6. دول كام يوم و حيمشي خلاص نستحملهم

يعني العالم كله شايف على التلفزيونات الناس في البلد اللي إنت بتحكمها متظاهرين ضدك و انت تبعت عليهم خيالة بشوم و بلطجية بمولوتوف .. هتقولى دة هو ساذج و بريالة و اللي حواليه بيلبسوه الطاسة و يعملوا اللي عايزينه طب هو ده بقى النموذج اللي يقدر يحكم مصر في فترة حرجة زي دي ؟ مغفل حواليه كلاب و زبانية ؟ وإذا كان مش عارف يحمي شعبه دلوقتي . في الوقت اللي فيه الناس متكاتفة , أمال خلال الـ 200 يوم اللي فاضلين لما الناس تنزل شغلها و تنسى شوية حكاية اللجان الشعبية , حيحصل فينا إيه ؟ حيعمل إيه في معارضيه ؟ إذا كان مش قادر يوفر امان للناس اللي العالم كله باصص عليهم


7. اللي في ميدان التحرير لسه قاعدين هناك ليه

كل يوم بسبب الناس اللي قاعدين في ميدان التحرير , النظام الفاسد بيقدم تنازلات و يحاول يجر ناعم و يعتذر و يقولك حنحاكم و هنصادر أموال و هنمنع من السفر , كل ده بسبب الضغط شعبيا و دوليا لعدم تنفيذ مطالب اللي في ميدان التحرير . الناس اللي بتقعد تشتمهم و تخونهم و بعدين الصبح لما تعرف إن عمر سليمان و أحمد شفيق عملوا و سوّوا و صادروا و اعتقلوا , تفتخر أوي بنفسك و تقول و الله إحنا شعب حقق حريتة و مطالبه يا اخي اختشي على دمك يا ترحمهم من سذاجتك و غسيل التلفزيون المصري لمخك يا تنزل معاهم تحقق مطالبك.


8. حالنا واقف و مفيش شغل

والله دي تسأل فيها حكومتك الرشيدة اللي عايزاك تقعد معاها برئيسها 200 يوم كمان ما تروح شغلك يا عم ؟ هو انا مانعك و لا هو كل مصر بتشتغل في ميدان التحرير ؟ المجمع قدامه فاضي و المتظاهرين سمعوا كلام الجيش و قاعدين خارج كامل ساحته عشان ميعطلوش أي حاجة .. روح شغلك و اشتغل و متشتغلش بالك باللي في ميدان التحرير هما من غيرك بيعملوا كتير و الله .. وجودك فعلا حيفرق معاهم بعد ما تخلص شغلك و تحب

تشاركهم , بس إنت بتتحجج بيهم عشان تقعد في البيت تتفرج على التلفزيون .. و اللى شغلة فى التحرير و الله هيعرف يروح شغلة أنا أبويا شغلة فى التحرير و راح الخميس اللى فات


9. هروح الشغل إزاي و مفيش أمان في الشوارع بسبب الناس اللي في ميدان التحرير

طيب وهي الحكومة ليه مستنية الناس اللي في الميدان تمشى عشان تنشر الشرطة و الأمن في الشوارع ؟ هل مثلا عشان هي عندها شوية صغيرة باقية من الشرطة و المباحث و طبعا دول مشغولين اليومين دول بالهجوم على المتظاهرين في الميدان و تنظيم هجمات البلطجي .. صحيح هما حيعملوا إيه ولا إيه .. الكل عارف إن وزارة الداخلية دلوقتي قوتها الحقيقية 50 % تقريباً و الباقيين رافضين الرجوع للعمل في الوزارة لأسباب متنوعة .. الحكومة بقى ليه مصرة تحشد الـ50 % حوالين ميدان التحرير


10. اللي في الميدان دول قابضين و خونة و عملاء للأمريكان و إخوان و إيران و موساد و كائنات فضائية

طيب إنت رحت شفتهم ؟ ولا القنوات المصرية دلوقتي بقت مصدر موثوق فيه ؟ اللي هناك دول هما أشجع و أنضف و أشرف ناس في مصر و بالمناسبة للي بيقول عليهم شوية شباب متحمسين عايزين مبارك يمشي فوراً و بالعافية .. لأ هى مش حكاية عافية .. دة تقد تسمسة خبرة فى كيفية التعامل مع اساليب ملتوية من النظام ( ذكاء سياسى ) لا بيقولوا عليه بابا و لا يا جماعة ده كان بطل و لا تسليم و تسلم الكشك بياخد وقت .. فاهمين كويس أهمية الضغط على نظام فاسد زي ده و مدركين إيه نتائج التوقف عن الضغط على نظام قمعى مارس قمعة أمام العالم كلة فما بالك من ورا ظهره

و معلش هما كل يوم يمسكوا واحد اجنبى و يعملوا ضجة و مسكنا المندسين المحرضين و تانى يوم يخرجوهوم من غير ما تتعمل نفس الضجة اللهم إلا خبر صغير قد كدة


11. الإخوان مسيطرين على اللي في ميدان التحرير

فيه إخوان مسلمين هناك فعلاً و كل يوم الإخوان المسلمين بيثبتوا إنهم فعلا مصريين بجد و رجالة و ده بشهادة ناس كتير و مثقفين سياسيين واعيين جدا بس رغم وجودهوم و بكثافة مفيش يافطة واحدة مرفوعة عليها شعار الإخوان و لا فرضوا على الناس هتافات دينية و لا حرموا أي حد هناك من إنه مثلا يقعد مع صديقة ليه أو يتكلم معاها بالعكس سابوا الميكروفون للناس يذيعوا أغاني وطنية و بيعملوا مداخلات و مناقشات مع كل الأطياف الموجودة في الميدانبمنتهى التحضر و كونهم منظمين و فاهمين سياسة ده مش عيب ولو خايف منهم فده لإنك متربى على كدة سياسياً دايما فى خوف من اننا نبقى زى طالبان و الجو دة " انا ضد الإخوان أصلا بس بكره أوى اللى ميعرفش أصلا مين الإخوان و عايزين اية و مشكلتهم الأساسية اية و الاقية بيهاجمهم "و كترهم ده كان ميزة مش عيب .. من غيرهم كان العدد هيقل جامد فى الجمعة و الثلاثاء و كانوا إيد واحدة في الدفاع عن المعتصمين في الميدان ضد البلطجية بكامل طاقتهم .. و على فكرة الشعب بعد مبارك لو إنتخب الإخوان مش حزعل لإن ده إختيار الشعب و الشعب لامؤاخذة مش قاصر ولا من حق أي حد يحدد له إختياراته و الإخوان زي ما حييجوا بالإنتخابات لو منفذوش طلباتك و نفذوا سياسات تفيدك في الإنتخابات اللي بعدها هتمشيهم و الشعب اللي كسر مبارك و حكومة القمع الأمنى في رأيي هتقدر تكسر أي نوع من الطغيان حيكون بعده


12. خلينا نهدى شوية بس و نجرب الحكومة الحالية يمكن فعلا ينفذوا اللي قالوه

نجربهم !!!!!!!!! 30 سنة ذل و كذب و غش و سرقة و عايزنى لسة أجرب تانى ؟ دة أول كلمة قالها رئيس الوزراء امن المتظاهرين فى الميدان على رقبتى تانى يوم نزل عليهم البلطجية و على عينك يا تاجر .. تجربة النظام مرة اخرى معناه إنك تاخد على قفاك 7 مرات فى اليوم و تقول معلش قالولي مش حيضربوني على قفايا تاني بكرة


13. الناس جعانة و مش معاها فلوس و حيموتوا بعض

الناس لازم تعرف إن الحرية فعلا أغلي من العيش و دة مش كلام شعارات و لا مظاهرات هنستحمل شوية مقابل حريتنا و أهو عليا و عليك , مش عليك لوحدك و لو حد جاع حيلاقي كتير يأكلوه ولو ضاقت بيه الدنيا ممكن يروح ميدان التحرير مش بتقولوا بيوزعوا هناك كنتاكى و فلوس .. الناس مش معاها فلوس عشان البنوك مقفولة , عشان مفيش تأمين ليها , عشان الداخلية مش فاضية لحفظ الأمن و فاضية للبلطجة على الشعب


14. سكة مينفعش الرئيس يتنحى و يا جماعة لازم تمشوا عشان المادة 82 و 84


المادة 82

إذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذر نيابته عنه ولا يجوز لمن ينوب عن رئيس الجمهورية طلب تعديل الدستور أو حل مجلس الشعب أو مجلس الشورى أو إقالة الوزارة


المادة 84

فـى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، وإذا كان المجلس منحلا حل محله رئيس المحكمة الدستورية العليا، وذلك بشـرط ألا يرشـح أيهما للرئاسة، مع التقيد بالحظر المنصوص عليه فـى الفقـرة الثانية من المادة 82. ويعلن مجلس الشعب خلو منصب رئيس الجمهورية. ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسة


و الخلاصة من الوهم أعلاه هي إن وجود مبارك ضمان لتغيير الدستور الفاسد و الوزارة الحالية وإلا بموجب الدستور الفاسد مش حنعرف نعيش في ديمقراطية و اللي حييجي حيقعد 30 سنة هو كمان

أصل إحنا لما مبارك يتنحى و ييجي واحد بعده ومايغيرش مواد الدستور الباطلة لا هو ولا الوزارة حنقول: لازم نحترم الدستور الفاسد المرسّخ للاستبداد السياسي عشان ده الدستور و الحكومة كمان .. مينفعش يا جماعة .. فين الأخلاق ؟ بالظبط زي بابا مبارك كده ما هو فاسد و مقصّر بس احترام الكبير يا جماعة عيب مينفعش

طبعاً طبعاً لما مبارك يغور بكل بساطة ممكن الحكومة الانتقالية المؤقتة تقعد أقل من الـ 200 يوم بتوعه دول بنص المادة 84 و يتم اختيار رئيس "مؤقت" لتحقيق مطالب الشعب و حيكون مفروض عليه تغيير الدستور سواء رفض أو قبل و إلا الناس اللي نزلت لمبارك حتنفخه هو كمان لحين عقد انتخابات رئاسية يختار فيها الشعب المصري رئيسه ثم أكيد كل القضاة الموجودين بالإضافة لكل المثقفين السياسيين الموجودين مش فاهمين هذا المأزق الدستوري العظيم اللي اكشتفه عمر سليمان و أحمد شفيق و بصوا لبعض و شهقوا و قالوا : يا خرابي .. ده مبارك طلع مهم


15. يا جماعة طيب نسيبه حقنا للدماء .. إحنا تعبنا كفاية

مش أنا قولتلك إن الحرية غالية شوية و تمنها بيكون ساعات دم للأسف ... فيه ناس تعبت نفسيا و ماديا و عصبيا و بيقولوا كله بسبب المظاهرات اللي من طرف واحد فما بالك بمظاهرات من الطرفين ؟؟ المظاهرات اللي تعبتكوا دي هي اللي جابتلكم كل المكاسب اللي اتحققت .. واللي كان فيه قطاع كبير من الناس اللي تعبانة دلوقتي دي ضدها في البداية و بيهاجموها بكل شراسة و خوف و جبن أحياناً إنتوا تعبتوا نفسيا من 10 أيام, و الناس في التحرير بتموت و بتتهاجم و بتصاب و بترجع تاني تدافع عن نفسها و عن حقها في تنفيذ مطالبها, فيه ناس لو روحت بيوتها أكيد تاني يوم حيتم ملاحقتها و اعتقالها لو تعبت إفتكر إنك أصلا كنت تعبان.. إتعب شوية كمان عشان تعيش عيشة محترمة

الى
</B>SE_coralsea


تحليل ممتاز طبعا ، ولكنه لم يعطى للمخاطر risk " اية اهتمام : بلد عددها كبير + مشاكلها كتير + فقيرة + اعدئها كتير واقوياء سواء ايران اواسرائيل + العرب متعولش عليهم بتعريفة ده لو سلمت منهم اساسا
كل هذا يجعلنا نحسب خطوتنا قبل ان نخطيها وهذا ليس معناه الا نأخد الخطوة