الموضوع: ربة الصون والعفاف بنت سيادتكم

بغض النظر عن المهنة ، وعن نوعية الشهادة الجامعية

انا عندى حد ادنى لمواصفات الشخص اللى يدخل بيتى يطلب بنتى

لازم يكون انسان مهذب ومتحضر، ولازم يكون انسان له مصدر دخل يقدر يصرف منه على بيته ولازم يكون عنده مكان للإقامة

بعد كدة هى حرة تقبل او ترفض اللى هى عايزاه ، عاجبها الميكانيكى اهلا بيه ، عاجبها الدكتور يا مرحب ، على فكرة انا قضيت 15 سنة من عمرى بتعامل مع ميكانيكى مؤهله الوحيد هو تعليمه فى ورشة الميكانيكا التى حصل عليها لاحقا بعد هجرة صاحبها الأول، ومع ذلك كنت بتعقد من ادبه واسلوبه فى الكلام وتحكمه التام فى مجرى اى حوار واستطاعته انهاء اى خلاف بدون احتداد وبدون عصبيه ، وياما شفت مهندسين ومحاسبين لا يجيدون تركيب 4 كلمات مع بعض لخلق حوار الا اذا كان الحوار موجها لسكة الشتيمة وقلة الأدب،
فعلى ذلك معيارى الوحيد هو التربية الجيدة والقدرة على تحمل مسئوليات بيت، اما ما عدا ذلك فهو حق الفتاه فى الإختيار

سبعاوي العزيز..........عندك حق يمكن التعبير خانني .....انا قريت الموضوع بتاع مدام علا بتاع السبعينات و فكرني بايام جميلة كان تاثير المادة في بلدنا اقل من كدة بكتير........... ايامها كان طاهر ابو زيد عندة سيارة 128 ووالدي المدرس كان عندة 132 انا بس لما ببص لعمر ابني محتار اربية ازاي اخلية يطلع دكتور و يخيب خيبة ابوة ولا اقدملة في نادي كورة ويطلع باعدادية بابتدائية مش مهم..............كل الموضوع ان بلدنا بقت صعبانة علية من اللي بيحصل فيها.......عموما اتمنى اسمع راي بقية الناس بعد ما وضحت الفكرة

المشاركة الأصلية كتبت بواسطة turboman

انا بس لما ببص لعمر ابني محتار اربية ازاي اخلية يطلع دكتور و يخيب خيبة ابوة ولا اقدملة في نادي كورة ويطلع باعدادية بابتدائية مش مهم..............

خلليه يطلع انسان محترم، متدين، عنده وجهة نظر وفلسفه فى الحياة، يقدر يواجه المشاكل بثبات، قادر على التفكير و"التنفيذ" والاتقان، اغرز فيه معانى الرجوله الحقيقية من شهامه وجدعنة وفروسيه اخلاق، عرفه ازاى يواجه صغار النفوس باحترام ولا يتدنى لمستواهم وفى نفس الوقت لا يسمح لهم بالاساءه، عرفه اهمية اتقان العمل واهمية تنفيذ العمل حتى النهاية (اى حاجه من السلاطه لمشروع التخرج)

اغرز فيه الاساسيات وسيبه هو يختار براحته اى توجه ... واهرف انه هاينجح فى اى حاجه يعملها لانك بنيت شخصيه سويه .... مش مهم اوى نوع الـ career قد ما مهم نوع الشخصيه .... لو بنيت سفينه قويه ومتينه وبها كل الامكانيات .. تقدر تمشى فى اى بحر

انسب وسيله لتعليم الاطفال اننا نكون قدوه ليهم ... خلليه معاك على طول واتصرف زى ما تحب انه يتصرف وهو هايلقط ويفهم لوحده .. الطريقه الغير مباشره مع الاطفال احسن مليون مره من المواعظ