مسيرة سلميه لتوديع السيد الرئيس محمد حسنى مبارك بصورة لائقة

**زينة الله** · 12-02-2011 07:33 PM

مفيش مشكلة مسيرة حلوة و محاكمة عادلة و كل واحد يأخد اللى ليه و يجيب اللى عليه

و يتنفذ حكم القضاء فيه زى أى مواطن و من غير قانون طوارئ و أعتقال و تعذيب زى ما عمل فى الشعب

و مش زى أحكام بطلان مجلس الشعب و تصدير الغاز اللى وقف تنفذهم و سلم لى على سيادة القانون

**icehearted girl** · 12-02-2011 07:39 PM

أحييك علي فكرتك... دا لو تقدر تنفذها فعلا..

اقصد لو جالك قلب

لو كان عدو بين في حرب شريفة كنت هسلم عليه وقت الهزيمة

انما دا.....

ولابلاش بقي...

ريحة دم الشباب اللي كان علي ايدي ميستحقش يلمسه غير الشرفاء

**emadspeed** · 12-02-2011 07:45 PM

لا حول ولا قوة الا بالله العلى العظيم
انا كنت مفكر نفسى انا بس اللى متعاطف مع الريس لكن اتضح لى ان فى ناس كتير زى متعاطفين معاه
يا جماعة ده ربنا بيرحم الناس مالها قلوبها بقا كله سواد كده
انا والله اول واحد فى مسيرة توديع الريس

**Ahmed Selim** · 12-02-2011 08:00 PM

مش عارف.........أول ما دخلت الصفحة على الفيس بوك حسيت أنى دخلت الحزب الوطنى مش عارف ليه.

قد نتفق أو نختلف على تنظيم مسيرة وداع له......بس أن يكون كل الناس اللى فى الصفحة يملأهم الحزن و بيدعوا على اللى عمل كده فيه.............يبقى مين اللى كانوا فى الشوارع عاملين ثورة دول ؟؟؟؟؟؟؟؟

**samehafez** · 12-02-2011 08:03 PM

stockholm syndrome

**al_manara** · 12-02-2011 08:04 PM

واضح انك عاوزها دم . دة لو واحد راح ومشي فيها هايدبح وهاتكون نهايتة سودة
اة وبالمناسبة هانشوف كام واحد يدخل الصفحة وتعجبة . دة لو دخلها اساسا

**wael17** · 12-02-2011 08:10 PM

المشاركة الأصلية كتبت بواسطة samehafez

stockholm syndrome

للاسف ..مش طبيعي ان حاكم يقعد في الحكم 30 سنة و ده معناه ان اجيال كتير اتولدت و ماشفتش غيره
مفيش في بلاد العالم المتحضرة كلام من عينة...بالروح بالدم نفديك يا فلان...الرئيس الأب....و الكلام الفاضي ده لان في الاخر رئيس الجمهورية المفروض انه موظف احنا نختاره و نغيره مش أب ولا الكلام الفاضي ده
بس هانحتاج سنين عشان نتعود علي الحرية و نبطل نحول رؤسائنا لالهة

**megamoudy** · 12-02-2011 08:13 PM

أنا بس هديك مثل

واحد دخل عليك بيتك وسرق فلوسك ومتربص ليك كل شوية لما تجيب فلوس يسرقها ............... وبعدين لما قولتله عيييييييييب يا عم حتى مقاومتوش راح قاتل ابوك وامك

بعد كده ناس من جيرانك وحبايبك ساعدوك وقدرو يبعدو الراجل ده وقدرت تعيش حياه كريمة

عرفت بعدها ان الراجل ده جاله مرض وحش هتروحله تديه بوكيه ورد وتبوس على راسه ولا ايه

جرا ايه يا جماعه فيه ايه هو الراجل ده مش سرقنا وعذبنا فرد فرد

هو في بيت خالي من امراض مزمنة من ضغط وسكر وفشل كبدي وفشل كلوي وا وا وا هنقول ايه ولا ايه

علاقتنا بيه اخرها لما يتحاكم
مظهرنا دلوقتي قدام العالم قوي جدا ان احنا قدرنا نمشي الرئيس بتاعنا