المرور المصرى الجديد .. ! هل من مغير معنا ؟؟

**mahamedaraby** · 15-02-2011 03:03 AM

طول ما فيه سواقين ميكروباص و نقل الحال مش هيتعدل

مش يأس بس ده ناس من اسوء ما جبتهم البشريه فى السواقه

طبعا اتفق معاك جدا فى كل اللى قولته ولما بمشى باليل فى صلاح سالم بالتزم الحاره بتاعتى و ارخم كمان على اللى ماشى فى وسط الحارتين وبقلب النور ليه علشان يمشى فى حاره عدله لكن فى الزحمه بتبقى العمليه خارج السيطره تمام

**mailo** · 15-02-2011 03:16 AM

المشاركة الأصلية كتبت بواسطة opel_rekord

هههههههههههههههههه منا فاهم انك بتهزر

وانا مقتنع زيك تمام ان كل الحاجات دى بتحصل من الميكروباصات اولا ثم التاكسى ثم بعض الملاكى

بس انا متفائل ان شاء الله اننا عالاقل نلاقى تغيير ملموس فى المرور كمان بعد ماغيرنا البلد كلها

ايدي على كتفك -اديمة شوية أنا عارف-

يارب

**abdelaziz-waleed** · 15-02-2011 03:17 AM

كلام جميل احيي حضرتك عليه ويا ريت الناس تلتزم بيه
انا امنية حياتي اشوف الناس ملتزمة بالحارة المرورية. انا بحاول بقدر المستطاع التزم بيها وبكل القواعد ولكن للاسف باخد كمية كلاكسات غير عادية من اللي ورايا مخلوطة بمزيج من الشتائم
اعتقد تغيير ثقافة شعب مش هتتغير في يوم وليلة ولكن ممكن تتغير بسرعة لو فيه قوانين رادعة بتطبق على الكل

**Opel_Rekord** · 15-02-2011 04:15 AM

احلى كلمه قريبتها دلوقتى قوانين رادعه

هى دى سر انضباط اى شارع فى العالم

وعدم تواجدها عندنا هى سر فوضى شوارع مصر كلها

يارب مع التغيرات الى بنشوفها فى بلدنا نلاقى تعديل قوانين مروريه ويكون شامل فيها اساسيات المرور العالميه دى

**saadelden** · 15-02-2011 06:21 PM

انهارده ماشي ف شارع البحر الاعظم و كالعاده زحمه و ماشيين واحده واحده
فجأه و انا ماشي تاكسي خبطني !!
واحنا ماشيين واحده واحده و الطريق واقف !!
نزل ك العاده و قاعد يبرطم و هو الي غلطان !! ركنت علي جنب و بصيت علي عربيتي لقيت ماحصلش فيها حاجه
بس عربيته اتكسر الفانوس الشمال و فانوس الاشاره و عايز يلبسني تمنهم !!
قولتله طلعلي واحد ف الشارع كله يقول اني كنت غلطان
طبعا قعد يتنطط شويه ف روحت سايبه و ماشي

المعروف ف دول الخليج او في اي دوله متحضره و فيها حساب و عقاب لو العربيه اتخبطت من ورا او من الجنب ورا يبقى الي غلطان التاني مهما كان موقف العربيه الي قدام
لكن هنا شغل بتنجان و مفيش حد بيحترم الحارات المروريه و مفيش حد بيحترم الاشارات الا جزء صغير جدا من البني ادمين