المشاركة الأصلية كتبت بواسطة wesam_salom
ليا واحد صاحبى نقيب شرطه
اول يوم المظاهرات يوم 25 لقيته بينظم المرور فى الشارع وانا بهتف
عملت نفسى معرفوش خفت الناس اللى فى المظاهره تفتكرنى مخبر ولا حاجه
يوم الخميس شفته واقف قدام امن الدوله قالى اعقل بقى وبلاش تنزل بكره مع العيال دول
قلت له لو شفتك بكره ه تييييييييييييت
ولسه مقابلتهوش من يومها
واحد جارى امين شرطه يوم اللجان الشعبيه الاول لقيته واقف وماسك سيف بيحرس المنطقه
قاللى معاك سجاير علشان المحلات كلها قافله قلت له عرفت بقى الناس بتكره الشرطه ليه ما هو من امثالك ههههههههههههههه (مع انه من القله المندسه قصدى المحترمين)
قاللى والمصحف لو صيحت لى لاكون مروح وسايبك لوحدك
حاليا بحاول لو شفت عسكرى وانا سايق بسلم عليه (ده طبع فيا ) لانى بحس ان العسكرى او المجند مغلوب على امره
نفسى اقابل صاحبى ده تانى وهو واقف فى اى كمين علشان انزل اصيح له هو واللى معاه بس شكله مستخبى لانه من الظباط المكروهين فى المرور
بس الصراحه انا عذرت الظباط شويه بعد ما شفت اللجان الشعبيه وتلاقى اللى واقف باين على وشه انه سوابق وواقف فى الكمين ومصر يفتشك ويشوف رخصك
وشويه شويه ممكن يسحب الرخص امن ومتانه
يوم السبت كنت فى المرور (تانى يوم التنحى)
نقيب فى المرور واقف يقول رخص السيارات هنا ورخص القياده فى المحله ولابس جاكت فوق البدله
راجل كبير لابس جلابيه قاله انت شغال ايه قاله انا نقيب فى المرور قاله ومش ناويين تبطلوا فساد بقى
احنا فى عصر جديد والشرطه فى خدمه الشعب اتعلم انك بتقبض علشان تخدمنا
افتح الباب يا ابنى وشوف شغلك يا اما تروح بيتكم تلبس الجلابيه
الظابط كان هيعيط وقال يا جماعه انا بحاول انظم الدنيا علشان اسهل عليكم وانتوا اهلنا واحنا فى خدمتكم
بس كان هيعيط
طلعت للموظف فوق لقيته بيقولى هتاخد تصريح علشان الانترنت واقع (عاوز فلوس)
زعقت له قلت له غصب عنك هتعملى رخصه
مش هدفع رشوه انضفوا بقى يا عالم يا تيييت يا اما هدخل لمدير المرور وابهدلك انت وهو
وقد كان اخدت الرخصه كمبيوتر بسنه واستلمت النمر الجديده