الموضوع: عيب تصنيع فرامل في الإيفو

المشاركة الأصلية كتبت بواسطة sky_walker

بص إحنا لما كنا في اللجنة المستشار القانوني قاللي قبل ما يصلحوها كنت هقولك أقدر أخليه يجيبلك عربية تانية و تعويض كمان بس دلوقتي هو لعبها صح و خبى كل حاجة يبقى فين العيب؟؟؟!!! يبقى استلميها بقى و لو لقيتي عيب تاني هنحطه على العيوب اللي قبل الحادثة و نشوف و مهانش عليهم يكلفو نفسهم و يكشفو عليها قبل ما استلمها حتى!!!! و انا ساعتها رديت عليهم و قولتلهم ألف شكر على تعبكم و الصيانة المصنعية اللي ببلاش دي لو لحقت أعملها اصلا فخليهالكو و حتى لو مكنتش مضيت على قطع الغيار اللى هي المستند الوحيد اللي يثبت إن التوكيل متحمل اكتر من 19.000 جنيه مصري (لله كدة سبحان الله) هو محمد البربري ده قال إن مفيش حاجة اسمها عربية تانية في سياسة اوماترا بس كدة...... قامو حماية المستهلك قالولي هنبقى نشوف لما تستلميها....

و زي ما انا قلت في الأول انا بعمل كل الخطوات دي يأساَ مني انا عارفة اني مش هطول من حد فيهم لا حق و لا باطل بس أبقى عرفت الناس بالمشكلة و خللصت ضميري و أبقى سعيت و عملت اللي عليا...

اول حاجة، بلاش احساس اليأس دة عشان خاطرى :D
اللى بيحصل بيحصل عشان احنا بيبقى عايزينه يحصل و عشان ربنا بيوفقنا فى اللى احنا عايزينه يحصل.. الناس اللى نزلت فى الثورة، و الناس اللى كانت قاعدة فى البيت، قبل 25 يناير، عمر ما كان حد يحلم ولا ييجى فى باله ان حسنى مبارك يمشى!
اللى حصل حصل بسبب ان الناس كانت مصممة على النتيجة، و ان ربنا وفقهم فى كدة يمكن عشان هم ايمانهم باللى ممكن يعملوه كان قوى جدا ! يعنى اصرارهم دة، مع ان فى ناس كتير اوى كانت بتقول كدة كفاية يا جماعة متحلموش بأكتر من كدة، بس هم بالاصرار الغريب دة عملوا حاجة محدش كان بيفكر فيها نهائى قبل 25 يناير..
طيب دلوقتى، انا شايف ان الكلام يبدأ من الbrake switch.. زى ما قلت فى المشاركة اللى فاتت.. ما دام فى brake switch لسة عايز يتغير، بالاضافة للحاجات الى اتغيرت، بالاضافة لحياتك و حياة الناس اللى اتعرضت لخطر، و اهم حاجة، انا شايف دة مدخل ممتاز، ان العربية طلعت من عندهم و هى ناقصها brake switch عايز يتغير (معناها ان فى مخاطرة تانية بحياتك و بعلم اوماترا!) و السبب مقنع جدا، عشان السيستم واقع :D .. يا سلام على المنطق الجميل
يعنى دلوقتى الكلام يبدأ من ان العربية لسة فيها مشكلة فى الفرامل، الا و هى الbrake switch.. الامر اللى يعرض حياتك للخطر لتانى مرة، و ان العربية اتسلمت لك و هى فيها العيب دة بعد اما اتغير لها قطع غيار بقيمة 19 الف جنيه .. طب دلوقتى لو انتى غيرتى الbrake switch، ايه اللى يضمن ان العربية بقت سليمة؟ ازاى حتسوقيها و انت مش مقلقة منها؟ ما يمكن يكون فى عيوب تانية و هم لسة مغيروش قطعة الغيار المطلوبة؟
ادى اول مدخل عشان يشكك فى اوماترا نفسها و فى قطع الغيار اللى اتغيرت.. ان العربية اتسملت بعد حادثة كبيرة و هى لسة فيها مشكلة! ، طب ما ممكن يبقى فيها مشكلة بعد حتى اما يتغير الbrake switch؟ من هذا المنطلق، اعتقد التوجه الطبيعى للتفكير ان العربية دى ممكن يكون فيها عيوب صناعة تانية و مش حينفع تبقى واثقة فيها و انتى سايقاها، زى ما العربية استلمتيها اول مرة و هى فيها عيب صانعة فى الفرامل، و زى ما سلموكى العربية بعد التصليح و لسة فيها قطعة غيار ما اتغيرتش.. قولى لهم الكلام دة و كلميهم بثقة، بتفكير اللى حيجيب حقه يعنى حيجيب حقه، مش بتفكير اليائس اللى بيعمل اى حاجة مع انه مؤمن انه مش حيوصل حاجة..
انا آسف مقدما على الطريقة اللى بتكلم بيها انها بدون القاب و كدة بس مش عارف اظبط الالقاب فى وسط الكلام الكتير اوى دة ، دة يغر انى اتشليت من الكلام اللى سمعته دة :D