حبايبى الهونداوية .... التكييف مش بيلقط

**No Comment** · 17-02-2011 12:23 AM

السلام عليكم يا هونداوية ..... يارب تكونوا كلكم بأتم صحة وعافية ..... بعد الأحداث اللى كانت جارية .
بعد التحية والسلام لأصحابى وحبايبى الهونداوية كنت عاوز اسأل عن حاجة حصلت عندى كذا مرة ومكنتش بركز فيها لما بتحصل لحد من كام يوم حاولت اعرف ايه سببها قبل دخول الصيف .
الحاجة ايه بقى ..... التكييف مش بيلقط .
يعنى من كام شهر كدة كنت بعمل شغل عند منير ونواتج الشغل المعتاد لمنير لاقيت التكييف مبقاش يشتغل مع ان هو سليم ككومبريسور وسربنتينة ومكنتش بقدر اجيب اكتر من درجة 2 فى المروحة فى الصيف لما بكون لوحدى فى العربية .
المشكلة عندى بتحصل فى اللقط ذات نفسه .... فرحت لكهربائى عند منير مرتين .... مرة قالى العيب فى سلك معين مش متوصل كويس وكمان غير الكتاوت واشتغل التكييف بعدها زى الفل ...... دى اول مرة .
المرة التانية عند نفس الكهربائى بعد ما فصل تانى بردوا ووهمنى ان المشكلة من الفيوز وغيره واشتغل زى الفل تانى .
ونسيته لكام شهر بسبب الشتاء ومعملتش شغل فى العربية خالص من ساعتها ..... لحد ماجيت اجربه من كام يوم كدة ونفس الحكاية القديمة مش عاوز يلقط تانى .
قمت رحت لكهربائى قريب من البيت ..... وشيك على كل حاجة وقالى كله سليم وتمام ودى ممكن تكون مشكلة ضعف ضغط الغاز فى الكمبوريسور وهو السببب .
انا بصراحة ما اقتنعتش وحكيتله الكلام اللى فات ده ..... قام عمل توصيلة على الكتاوت كدة وشغل التكييف اشتغل وطلع هواء بارد زى زمان .
طبعا هتقولولى المشكلة بقى فى ايه ..؟
المشكلة ان الكهربائى بيقولى ان الكتاوت سليم مفيهوش حاجة هو لاغاه فأشتغل ...... بس هو مصمم ان المشكلة مش فى الكهرباء ..... مقتنع ان المشكلة فى الضغط بتاع الغاز ...... مع انه لما وصل السلك ولغى الكتاوت طلع التكييف هواء بارد ولو كنت سبته شوية كان هيبتدى يدخل فى مرحلة التسقيع .
ايه التفسير المنطقى للكلام السابق ده ...... وايه الصح ..؟؟
اشيك على الكتاوت واغيرها ولا اروح لحد بتاع تكييف ويقعد يشتغل الواحد ويألف هو كمان ....؟؟؟
مش عارف عاوز رايكم ..... ومنتظر الردود .....أهو على الأقل أسلم عليكم ههههههههههه .

**SAMEH_FOUAD** · 17-02-2011 03:01 PM

يابو حميد دلوقتى انت قولت ان الراجل لما شغل التكييف من غير الكناوت اشتغلت يبقى اية بقى اللى دخل الفريون فى الموضوع

دلوقتى ياحمد انت هتروح تغير كتاوت التكييف والزرار بتاع الa/c اللى فى التابلوة عندك دة تتاكد انة شغال كويس عشان مايحرقش الكباس وشوف الدنيا

وبعدين بسيطة ياباشا روح عند اى متخصص تكييف وخلية يقيسلك الشحن بس هتعرف , واتاكد من سلامة سير التكييف

وهات الكتاوت اصلية او استيراد وقولى اية الاخبار

اوعى تجيب كهربائى للتكييف هيبوظهولك

**No Comment** · 18-02-2011 12:08 PM

المشاركة الأصلية كتبت بواسطة m3touk_85

الجندي المجهول

انت مختفي واحنا عمالين ندور عليك وفى الاخر نلاقيك عايز تتكيف ماشي يا باشا براحتك

عامل ايه يا وحش انا ما عنديش خبرة انتظر الشباب الاخر

توقة يا غالى أخبارك ايه ...... عرفت انك كنت مستخبى فى الشرقية أو بتأمن منطقة نفوذك هناك .

المشاركة الأصلية كتبت بواسطة semsem kane

يابو حميد دلوقتى انت قولت ان الراجل لما شغل التكييف من غير الكناوت اشتغلت يبقى اية بقى اللى دخل الفريون فى الموضوع

دلوقتى ياحمد انت هتروح تغير كتاوت التكييف والزرار بتاع الa/c اللى فى التابلوة عندك دة تتاكد انة شغال كويس عشان مايحرقش الكباس وشوف الدنيا

وبعدين بسيطة ياباشا روح عند اى متخصص تكييف وخلية يقيسلك الشحن بس هتعرف , واتاكد من سلامة سير التكييف

وهات الكتاوت اصلية او استيراد وقولى اية الاخبار

اوعى تجيب كهربائى للتكييف هيبوظهولك

سامح يا كبير .... بص انا بفكر قبل ما أصلح او اغير حاجة عندى فى العربية الـ a/c سليم وكل الكلام اللى قلته سليم بس برضوا انا احتمال اروح انا وأمين السبت الحرفيين وكنت عاوز احصر المشكلة قبل ما الناس المألفاتية هناك يقعدوا يقولوا كل واحد كلام فى اى كلام .

**No Comment** · 01-03-2011 10:15 AM

السلام على كل افراد العصابة الهونداوية .
من اسبوع رحت اعمل موضوع التكييف اللى كنت اتكلمت عنه فوق وكنت رحت لواحد بتاع تكييف وكهربة تكييف ... بتوع التكييف قالوا التكييف ودورته زى الفل المشكلة من كهربة التكييف وللاسف كهربائى التكييف مكنشى موجود فأضطريت لانتظاره كذا يوم .
المهم رحت امبارح واحتار من المشكلة بردوا زى اللى قبله كله سليم طيب ايه المشكلة ..؟
فمشى مع دورة كهربة التكييف حتة حته وبصراحة عمل حبة تشييك واختبارات من كترها مش هفتكر معظمها ... لاكن فى النهاية ركب كتاوت زيادة غير اللى موجود لفصل وتوصيل مروحتين الردياتير والسربنتينة والتنسيق مبينهم مع شوية تظبيط فى وصلات الأسلاك والعربية بقت تمام .

المشكلة ايه بقة ...؟ النهاردة بعد ما وصلت للشغل وبعد ما قفلت الكونتاكت وبتحرك بعيد عن العربية سمعت صوت المراوح اشتغلت فرجعت تانى للعربية وشغلتها لحد ما المراوح فصلت .
العربية مكنتش بتعمل كدة زمان وعمر ما المراوح اشتغلت بعد غلق الماتور .
الكلام ده مش مريحنى مع انه موجود فى عربيات آخرى .
انا عاوز اعرف الطبيعى فى مختلف موديلات الهوندا صح ان العربية ممكن تشغل المراوح عند تبطيل الماتور مع زيادة الحرارة قبل التبطيل ولا ..لا ... ؟
منتظر ارائكم ... ؟

**SAMEH_FOUAD** · 01-03-2011 02:57 PM

لا ياباشا مروحة الهوندا مرتبطة بانها تكون دايرة مجرد ماهتقفل العربية المروحة هتقف حتى لو شغالة

**No Comment** · 01-03-2011 06:12 PM

رحت النهاردة لكهربائى التكييف خليته عدلى فى الشغل بتاعة ... وخلى مروحة الردياتير والسربنتينة يفصلوا بمجرد ما افصل الكونتاكت حتى لو كانت العربية ساخنة .
مع ان الموضوع ده مش عيب فى عربيات آخرى .... لاكن الوضع الأصلى للعربية أفضل .

**No Comment** · 03-03-2011 11:05 AM

بالأمس وانا مروح كنت مشغل التكييف وطبعاً لما بيشتغل التكييف بيشغل معاه المروحتين لانى عندى الردياتير العريض والسربنتينة العريضة فلازم تشتغل المروحتين ... ولما جيت النهاردة الصبح أدور العربية ملقطتشى من أول مرة عادى ممكن تحصل لاكن لما جيت ادورها تانى مرة لاحظت ليدات البطارية ولمبات التشيك منورة ببهتنة كدى ودارت بالعافية فبصراحة انا مش عارف ده ضعف شحن ولا علشان بقالى كام يوم بحمل على البطارية فى الفترة السابقة ولا أيـــه ؟

**SAMEH_FOUAD** · 03-03-2011 10:30 PM

معنى انك تدور العربية وتلاقى اللمض منورة خفيف كدة يبقى عندك تلميس ياحمد خلى بالك وعايزك تتاكد وتدور العربية شوية وحط ايدك على كابل البطارية شوف درة حرارتة اية عشان بس تتطمن ان الارضى مش لامس سلك كهرباء