مين اللي قال ان قبل الثورة غير بعد الثورة .. المرور مازال فيه فساد ومرتشين

**nonetta** · 20-02-2011 12:22 PM

كنت فاكرة ان الناس اتغيرت للاحسن
كنت فاكرة ان قبل الثورة غير بعد الثورة
كنت فاكرة ان المرور هيبقى نموذجي ولا مرور البلاد النضيفة وسهولة في التعامل
لكن للاسف اصبت بخيبة امل

مرور المقطم اتحرق .. كان عندي تجديد رخصة القيادة بتاعتي .. وكنت بارخص عربيتي البيكانتو الجديدة اللي راكنة نحت البيت مش عارفة ارخصها من يوم 24 يناير قبل الثورة بيوم

طبعا مرور المقطم ومرور البساتين راحوا موظفينه في مرور عين الصيرة وطبعا المرور زحمة جداجدا
نفس الوشوش البشعة نفس التسول .. عيني عينك

لما خلصت اللفة اللي مالهاش لازمة من الشباك دة للشباك دة ومهندس الفحص اللي طلبها عيني عينك حلاوة العربية الجديدة
رحت للبيه المراجع
قال الكمبيوتر عطلان اصل الكابل الارضي بتاع الكهربا بتاعة الكمبيوتر اتسرق
الكابل بتاع الكمبيوتر تحديدا هوة اللي اتسرق شفتوا الصدف
واروح الناحية التانية الاقيهم بينادوا على استلام الرخص بتاعة مرور عين الصيرة

بعد ماخلصت رخصة القيادة قلت اروح اسأل تاني يمكن الكمبوتر اشتغل
اتاري جوزي من ورايا راح له وفتح مخه .. راح واخد الورق وخلص لي الرخصة

طبعا اتخانقت مع جوزي على كل مليم دفعه بدون وجه حق
وقلت له احنا اللي بنديهم فرصة ..
قال لي مش بدل ما تيجي المشوار بكرة تاني وانا مش هاعرف اجي معاكي ومش هاسسيبك تيجي لوحدك
هما اللي بيلووا دراعنا عشان احنا محتاجينهم
وحسبي الله في كل واحد بياخد مليم بدون وجه حق

**medo2o1o** · 20-02-2011 12:26 PM

لا بجد لازم وقفة
احنا فى مدينة نصر مدفعناش رشاوى كله ماشى زى الالف
لكن اللى بياخد رشوة هاتوله الجيش او كل اللى فى المرور ينزل يضرب فيه

**mohamed_selim** · 20-02-2011 12:38 PM

معلش حضرتك المفروض كنتو دخلتو للظابط المسئول و لو معملش حاجه تبلغو فى التفتيش
وزارة الداخليه بتنضف و الراجل الجديد عامل شغل جامد و الحاجات دى مبقتش تتساب زى زمان ... ممكن حد يقول ان الغربال الجديد له شده بس ليه منستغلهاش علشان ننضف الاخلاقيات دى ...

يا ريت لو حضرتك تبعتى شكوى باللى حصل للوزاره و نشوف ايه اللى هيحصل

**nonetta** · 20-02-2011 12:53 PM

و الله ولا الف ولا ب دة المراجع مال عليا و بيقول لي الموظف دة رايح يخلص لك الرخصة ابقي شوفيه هوة كمان بحاجة
ماهم الناس ال لامؤاخذة هيفضلوا طول عمرهم لامؤاخذة ايه اللي هيغيرهم اتعودوا يمدوا ايديهم و يشحتوا

**nonetta** · 20-02-2011 01:00 PM

المشاركة الأصلية كتبت بواسطة mohamed_selim

معلش حضرتك المفروض كنتو دخلتو للظابط المسئول و لو معملش حاجه تبلغو فى التفتيش
وزارة الداخليه بتنضف و الراجل الجديد عامل شغل جامد و الحاجات دى مبقتش تتساب زى زمان ... ممكن حد يقول ان الغربال الجديد له شده بس ليه منستغلهاش علشان ننضف الاخلاقيات دى ...

يا ريت لو حضرتك تبعتى شكوى باللى حصل للوزاره و نشوف ايه اللى هيحصل

المشكلة ان احنا ضيوف على المرور مش بتاعنا وبعدين اصلا الضابط مكانش طايق نفسه واتخانق مع واحد
كنا بنساله شبابيك مرور المقطم فيم ما ردش علينا اول مرة وتاني مرة رد وهوة بينفخ ومن غير ما يبص لنا
وجوزي كان عاوز يخلص علشان ما يبهدلنيش عشان الرخصتين بتوعي والدنيا كانت زحمة جدا ومش عاوزني اتبهدل في الطوابير
قلت له انا كان عندي اقف في طوابير واقعد اليوم كله في المرور بس ما اعملش حاجة غلط
قال لي خلاص اخر مرة
يعني تفتكر اشتكي فين
ناس قالت لي اتصل بالجيش ابلغهم
بس بصراحة الله يكون في عونهم هيمسكوا الكبار اللي سارقين مليارات وللا الصغيرين اللي لو مسكتهم هيقولوا يعني جت علينا احنا

**mohamed_selim** · 20-02-2011 01:13 PM

لأ مش الجيش ... الظابط ليه الوزاره بتاعتو ... معلش جربى تقديم شكوى على النت و شوفى ايه اللى هيحصل ... الظابط لازم يعرف ان فى اسلوب جديد للتعامل و الموظف المرتشى لما يتوقف ولا يتجازى هو و غيره هيخافوا

**محمد محمد** · 20-02-2011 01:16 PM

انقلي الشكوي دي علي صفحة وزارة الداخلية علي الفيس بوك.

**kdosoki** · 20-02-2011 01:21 PM

اشكرك على حماستك وتقديم الموضوع بهذه الطريقة
وانا مع الرأى انك تكتبى اللى حصل فى موقع الشكاوى لوزارة الداخلية
ضرورى جدا

**Ahmed_Ramadan** · 20-02-2011 01:24 PM

فكرة المدينة الفاضلة ديه مش هتحصل فى يوم و ليلة يعنى....ماهو فى ناس كانت بتسرق شقق و يسرقوا الناس فى الشارع الفترة اللى فاتت ....فى جزء كبير من الشعب مش هيتغير الا بزواله هوا