المفروض تبقى فيه مظاهرات يوم الجمعه بس عشان البلد متقفش
المفروض تبقى فيه مظاهرات يوم الجمعه بس عشان البلد متقفش
ولا يوم الثلاثاء ولا الجمعة ولا اي يوم بعد كدا
المظاهرات دلوقتي بقت فسحة اللي عايز ينزل يتفسح يروح المظاهرات
ربنا خلق الدنيا في 6 ايام واستوى على العرش في اليوم السابع واحنا بقالنا 30 سنة ضايعين والمطلوب في خلال اقل من شهر الدنيا تبقى حلوة وكل اللي عايزينه اتعمل والحياة رجعت احسن من الاول
يا جماعة حرام فكروا بعقلكم شوية بقى بجد حرام الخراب اللي بقت الدنيا فيه والله اعرف ناس شغالين في السياحة الشركات قفلت وقاعدين في البيت. سيبوا العجلة تدور ونشوف ايه اللي هيحصل
وانا مستبشر خير باحمد شفيق (ودا وجهة نظري)
وبجد لو فضل الحال كدا يبقى نفسي الجيش يطبق الاحكام العرفية علشان البلد تبدأ تتعدل بدل الفوضى كل جمعة.
انا مش مع المظاهرات اليومين دول خالص لأن لازم يكون في حكومة تمشي البلد و تبقي تتغير بعد كده لكن لازم يبقي في نظام...يعني الشرطة لازم تنزل الشارع فورا و بعدين نحاسب و نستبعد الفاسدين...مش نقول الشرطة ما تنزلش الشارع غير لم حاكمت فلان الفلاني
النقطة التانية...لو الناس عايزة تضغط علي المجلس العسكري للاسراع في الاصلاحات يبقي تعمل مظاهرات يوم الجمعة كنوع من استعراض القوة للشارع المصري عشان الحكومة تعرف ان الشعب صاحي لكن ننزل في وسط الاسبوع بالملايين ليه؟؟!!! هي الناس ماعدش وراها شغل؟؟ ايه البلد اللي ينفع تمشي لما كل الناس تعمل اضرابات و تتظاهر ولا هو كل واحد فاكر انه مش محتاج يشتغل و نصيبه في ال70 مليار هيكفيه بقيت العمر من غير ما يشتغل
اما كنت موافق على المظاهرات بس بعد تعديل الوزارة
انا ضد المظاهرة
تصدقو يا جماعة لو الجيش قال أنة حا يتم القبض على أى متظاهر و التعامل معة بموجب القانون مش حا تشوفو لا مليونية و لا ألفية حتى و الله لو الجيش ذاع بيان زى كدة مش حا ينزل نفر يتظاهر . دة كلام و ساعت الجد مش حا ينزل حد بس الجيش ينزل بيان زى كدة و شوفو مين الى حا ينزل . الناس متحامية فى الجيش بصورة غير مباشرة بلاش أستفزاز للجيش حتى لا تقطع شعرة معاوية. الجيش بس ينزل بيان و تحذير و بعدين نشوف الكلام عن المظاهرة حا يبقى حقيقى و لا كلام بس
أنا نزلت المظاهرات قبل كده
بس دلوقتي نشوف اللي هيحصل
مش مظاهرات على طول
نشوف الايام الجاية هتقول ايه
وبلاش فعلا ف وسط الاسبوع عشان الناس الغلابا وذوي الاعمال البسيطه
انا شخصيا موافق على الاستمرار
بس مش موافق على يوم الثلاثاء
ايه المشكلة لما نستمر فى المليونيات كل يوم جمعة وبكدة نبقى ضاغطين لحد ما جميع مطالبنا تتحقق وكمان نضمن استمرار الثورة ( اللى هو اصعب من بدءها )
وكمان نكون مسكنا العصاية من النص
وعجلة الانتاج تستمر ......... والثورة تستمر
لا
فلنكتفى بهذا القدر
الوقت ده و قت مراقبه و فهم و اعداد
مافيش داعى خالص
والراجل شفيق كويس لغايه دلوقتى
لو استهبل عندنا الميدان
هو احنا شغالين عند الجيش و لا الجيش اللى بيشتغل عندنا
لو يقدر يوقف حد واحد يقوله مايروحش مظاهرات يبقى يعملها ويورينا
لو مش بالحوار و يقنع يبقى خلاص
الوضع دلوقتى اتغير جزريا و الكلام اللى بتقوله ده بتاع شعب مغلوب على امره
واحنا لا مغلوبين على امرنا ولا حد فارض علينا حاجه
و اقسم بالله لولا ان الناس هيه اللى واثقه فى الجيش كنا نزلنا و قولنا للجيش مايدرش امور البلد و اللى يمسكها اداره مدنيه خالصه حتى الانتقال
من فضلك راجع معطيات المعادله عشان اتغيرت جدا
المعادلة غير متكافئة نهائيا دة حقيقى فعلا بس لصالح الجيش مش لصالح الشعب .
شعب مين يا باشا الى حا يقول للجيش كمان لآ الناس متخيلة أنها الى بتدير البلد طيب أمال المجلس الاعلى دة بيعمل أية و مين الى شال الضرب و خلى المتظاهرين فى أمان مش الجيش برضو و لما الناس شافت الدبابات عيطت من الفرحة يبقى كمان الجيش عاوزينة صورة و منظر و لو كلامة مش عاجب الناس يقولو لة كمان لآ . دة مش ممكن يبقى معنى كدة أن الدنيا بقت غابة و مفيش نظام و لو حا نمشى بمبدأ البقاء للأقوى يبقى الجيش حا يبقى هو الاقوى . لو الجيش عاوز يعلن احكام عرفية هو حا يبقى قادر على ذلك بس الجيش بيطبطب على الناس و مريحة و دور الناس أنها تلتزم شوية و تبطل أفكار هدامة
على الرغم من ان يوم التلات هو يوم عمل وهيعطل مصالح كتير
لكن للاسف مفيش حل غير كدة مع الحكومة دي
احمد شفيق اللي عينه مبارك وأقسم اليمين امامه ودة يعتبر مخالف لدستورية استمرار شفيق بعد رحيل مبارك
لماذا لم يتم تعيين وزارة جديدة بوجوه جديدة ذات مصداقية للشارع المصري ...الكفاءات كتير
انا نازل التحرير يوم التلات باذن الله حتى يرحل احمد شفيق
فداكي يا مصر ....
و الله انا مؤدب غصب عن اى حد و انا اخترت انى اضحك بدل ما اكون قليل الادب بجد عشان ما بعرفش ابقى قليل الادب و لا اجرح فى حد و لا اقول للى قدامى يتكلم ازاى كل واحد يتكلم براحته يا بيه يا محترم و انا ما غلطتش فيك و لا عمرى هاغلط عشان انا محترم لكن انا اعتمدت على اسلوب السخريه و التهكم و ممكن كمان ترد بنفس الاسلوب عادى براحتك يعنى لكن ماتقليش اتكلم بأدب دى خالص
هو احنا مش هانبطل بقى منطق القوة و نحاول نتمسك بمنطق الحق شوية ؟
برجاء للناس اللي بتفكر في مصالحها الشخصية وبس تعرف ان كلنا خسرنا بعض مصالحنا الشخصية ومستعدين نكمل للنهاية حتى القضاء على كل بؤر الفساد في البلد وحتى اكتمال نجاح ثورتنا المجيدة
يا من تفكر في مصالحك الشخصية تذكر دماء الشهداء اللي ضحوا بارواحهم من اجل هذه البلد
اقرا المشاركه اللى كتبتها قبل ما ارد عليك
انا بتكلم فى مبدأ
القوه الوحيده المهيمنه و اللى هيه القوة الرئيسيه الان هى قوة الشعب و ده الجدال فيه يا عزيزى مش هيوصلنا لحاجه
حضرتك شايف من الاول الجيش فوق الشعب و ده وضع غلط
الجيش يؤتمر من الشعب
الناس عيط لما شافوا الدبابات و انا منهم عشان كنا تعبنا من ضرب الشرطه و الناس طول الوقت بتقول احنا مع بض الجيش و الشعب
ده اسمه تفويض من الناس للجيش ان هو اللى يقف معاهم تفويض ليه و اختيار بديلا للمرحله ديه و كلنا كنا بنادى بده
بس ده مش معناه ان حضرتك تقول الشعره و لازم نخاف عشان الجيش مايزعلش
الجيش بيحاول يدير المرحله ديه و ده بتفويض من الشعب تانى بقولها
يعنى الشرعيه الوحيده اللى عنده هيه شرعيه الشعب مش شرعيه ان مبارك نقل ليه اداره البلاد
و تانى وتالت الجيش مش هيقدر يمنع اى مظاهرات و اللى حضرتك بتحذر منه انا شايف انه غير منطقى بالمره عشان مافيش جيش هيضرب على ناس بتتظاهر
هو عارف و حاسب لو فكر يعمل كده هيحصل ايه
و مافيش فيهم اى حد عاقل ممكن يعمل كده
و المظاهره لو هتم بكره او كل يوم مليونيه مش هيقدروا يوقفوها ده امر مفروغ منه و لو حاولوا هتبقى حرب اهليه و هيحصل انفصال فى صفوف الجيش و عليه العوض و منه العوض
دلوقتى وقت حوار و ده اللى بيحاولوا يعملوه
وزى ماقلت عن نفسى مش عايز مظاهرات تانى انا مستنى و بتفرج و مقتنع بشفيق
غير كده يا ريت بلاش نغمه الجيش هيعمل ايه و صابر لان الجيش موجود فقط بشرعيه مستمده من الشعب
لو فكرنا زى مانت عايز يبقى يحكم بقى الجيش و انسى الثورة ولا اكننا عملنا حاجه
الجيش ما هو الا مؤسسه ملك الشعب لتحميه
يا ريت عدم تحميل و الامور اكتر من حجمها عشان ده اللى وصل مبارك انه يبقى فرعون و فى الاخر ماخدتش اكتر من 18 يوم
انسى موضوع مبارك .. احمد شفيق تم تكليفة من قبل المجلس الاعلى للقوات المسلحة حاليا و هو دة الاساس اللى بيستمد منة شرعيتة
و الوزارة الجديدة اهى اتشكلت بوجوة جديدة ذات مصداقية للشارع زى ما حضرتك طلبت و حتى لو فضل فيها وزير و لا اتنين مش عايزينهم نقدر نضغط و نشيلهم بدون تظاهرات مليونية فى اوقات حرجة نحتاج فيها الى التنفس و التفكير
و بلاش شعارات ثورية هى اللى تحركنا .. يا ريت نبص للصورة من بعيد شوية عشان نشوف كل تفاصيلها .
و افتكر ان لو الامور ساءت و خرجت عن المسار الذى رضى عنة اشرف و اكبر عقليات فى مصر هتبقى حضرتك و من معك قمتم بتخريب الثورة و اجهاضها بالاندفاع و عدم التعقل .
يا ريت نسمع بعض و فى الاخر لو انت بتنادى بالديموقراطية تشوف نتيجة الاستفتاء و تالتزم برأى الاغلبية .
و فى النهاية انا واثق انك و كل من شارك برأية بيحب مصر و عايزها تكون افضل بلد فى الدنيا بس يا ريت نسمع بعض و بلاش العزف الانفرادى .
علشان تحقق الحق يبقى لازم قوة أنما نعطل الدنيا علشان أراء معينة يبقى المصلحة العامة فوق المصلحة الشخصية . أنا شايف مشاركات كتير منقولة ل نوارة نجم . و مش عاجبنى أرائها دة رأيى الشخصى مش لازم أمشى ورا افكارها و لازم أبقى عارف أية أخر قوتى علشان ما أدخلش فى معركة خاسرة لو بتلمح للجيش مفيش أى ضامن ألا الكلمة الى حا يقولها و الى معترض على أراء الجيش لو يعرف يغير حاجة يبقى يغيرها لو عرف
لا هي بالعافية ولو مشعاجب اي حد اي حاجة في البلد هاينزل يعمل مظاهرة في التحرير ويوقف البلد واللى مش عاجبه يعمل هو كمان مظاهرة تاني يوم وبردو في التحرير ويوقف البلد
والجيش ميقدرش يعمل اي حاجة ماهو من يوم 28 نزل البلد وساكت هاييجي يعمل حاجة دلوقت
فدا مين بس يا خالد بيه
التلات اللى جاي علشان شفيق والجمعة اللى بعده علشان التطهير والتلات اللى بعده هايكون علشان ايه تاني ؟؟؟؟؟؟؟؟؟؟
شفيق المجلس الاعلى للقوات المسلحة هو اللى امر باستمرار وزارتخ كوزارة تسيير اعمال يعني عمله دستوري برغم ايقاف الدستور
والوجوه الجديدة اللى اتعينت امبارح دي كلها مالهاش مصداقية ؟؟؟؟؟؟؟؟
طيب يجيب منين مع الوضع في الاعتبار ان فيه ناس من المحترمة بردو بترفض تغامر في وزارة عارفين انها مؤقتة وانها مهما عملت بردو مش هاتعجب الناس
وايه هو المطلوب من الحكومة انها تعمله مع الوضع في الاعتبار ان بعض الامور بيد المجلس العسكري وليس للحكومة اي دخل فيها
ولو وافقتك وتم اقالة حكومة شفيق تفتكر الناس اللى كل يوم بيدعو لمظاهرة هايتفقوا على حكومة جديدة ؟؟؟؟؟؟؟؟
اذا كانوا بيختلفوا على كل شئ واحد يطلع يقول حاجة يطلع عشرة يقولوا انه بيمثل نفسه وبس
وحتى لو اتفقوا تضمن منين ان مايطلعش ناس تانيين يقولوا انهم مش موافقين على الحكومة الجديدة ويطلعوا على التحرير ويوقفوا البلد بردو؟؟؟؟؟
وتفتكر الناس العادية اللى حالها واقف فعلا هاتتحمل لغاية امتي ؟؟؟؟؟؟
السعة 1 ظهر 21-2
الرافضين 77
الموافقين 39
تراجع ثلاثة من الموافقين بعد التعديل الوزاري لتصبح النتيجة الحقيقية
الرافضين 80
الموافقين 36
اتفق معاك
بقالى كتير ماتفقتش معاك :)
انا ممكن انزل مظاهره للمطالبه بمحاكمه صفوت الشريف او مظاهره للمطالبه بان مبارك يتم حسابه
بس مانزلش عشان الحكومه ديه تمشى
هيه كده كده ماشيه - و احنا بنراقب دلوقتى و نشوف
و المهم هو التعديلات الدستوريه
نراقب و نفهم و ندرس عشان نبقى فاهمين المرحله اللى جايه
بس كل شويه مظاهره شئ مستفز من غير هدف فعليا جدير
الجمعه اللى فاتت لما تم تسيس المظاهره رفضت النزول خصوصا ان هيه فعليا عشان تورى ان احنا نقدر نتجمع تانى و نضغط بس تم التسييس بطريقه سافره
يبقى وصلنا لآية يا دكتور محمد . وصلنا لنقطة الصفر و محلك سر . الناس واخداها بالدراع و أى حاجة يقولو نعمل مظاهرة أية رايك بكرة الناس حا يتقلبو على بعض و يعملو مظاهرات ضد بعض يعنى الشعب ضد الشعب مش الشعب ضد الحكومة . أنا بصراحة شايف ان الى بيحصل فوضى فى كل مكان و مفيش ظبط و لا ربط .
يا باشا رأيك من حقك بكل تأكيد و ده لا اختلاف عليه
و انا عن نفسي ياما قلت اني اوقات كتير باختلف مع كلام اي حد ايا كان و مش صح ان الواحد يمشي ورا حد و خلاص اصلا
لكن مسألة اسقاط الحكومة و اقالة الفاسدين و محاسبتهم , و حل أمن الدولة و الافراج عن المعتقلين دي مش مصالح شخصية و لا آراء شخصية و الا كان يبقى مبارك كمان اسقاطه آراء شخصية
بخصوص نقطة المعركة الخاسرة , مين قال ان الناس اللي نازلين دول نازلين ضد الجيش ؟
كلهم اصلا هتافهم الأساسي ان الجيش و الشعب يد واحدة
الناس ليهم مطالب معينة و نازلين يطالبوا بيها , و الله لو العدد قليل و ما عطلوش مصالح يبقى خلاص قليلين ( و لو ان ده لا ينفي انهم وارد جدا يكونوا على الحق حتى لو قليلين ده لو هانتكلم بصفة عامة)
و لو كتير لدرجة انهم قفلوا الميدان يبقى حقهم ان مطالبهم تجاب لأنهم كتير
بخصوص مسألة اللي يعرف يبقى يغير
دي اللي باقول فيها ان الحق فوق القوة , اصل اللي مش بيدخل معركة خاسرة الطبيعي انه بيرتب لأنه يدخلها في وقت تاني تكون القوة متقاربة , انما اللي انا فاهمة من حضرتك ان المعركة دي في اي وقت و كل وقت خاسرة (يمكن لأنك شايف انها ضد الجيش , انا عن نفسي مش شايف كده زي ما وضحت) , و بالتالي يبقى الواحد عليه انه يعمل اللي عليه بأقصى قدرته و التوفيق من عند الله , ماحدش لغاية يوم 24 يناير كان يتخيل ان مبارك ممكن يسقط ولا ان قبضة الداخلية تسقط , لكن بفضل الله حصل ...
ديه انا متفق معاك فيها
و ده الوضع الاسوأ
عشان كده الحج البرادعى بيقول ان لازم فتره توصل لسنه كفتره انتقاليه محدده الاهداف
عشان الشعب يقدر ينضج سياسيا و كمان تقدر الاحزاب تقوى
بدل ما الناس بتتحرك بالنيه من غير اى نوع من الوعى مع الناس اللى عندها تفكير ان الوزاره سبب الفساد
كل واحد يحترم لرأيه بس فى الاخر الدنيا هتبقى مش مظبوطه
بس ارجع اقولك على حاجه
فرنسا كان فيها اضرابات و الحياه ماشيه تمام
يعنى اللى عايز يروح يروح انت عليك بالتوعيه و اشتغل و اعمل
و انصح الناس
بس لو لقيت الوضع فيه لعب يبقى كلنا ننزل تانى
أويد بشدة
انا شامم ريحة مش كويسة و شايف محاولات تهدئة و تحويل انظار الناس عن حاجات كتير
هما لسة هاينقلبوا على بعض ؟؟؟؟؟؟؟؟؟؟
راجع ايام ما قبل التنحي ما بين 2-2 وحتي 11-2 هاتلاقي كل يوم يطلع في كل قناة شوية يقولوا انهم المتحدثين باسم الثورة ويطلع ناستانيين على قناة تانية يقولوا لا احنا اللى بنتكلم باسم الثورة وكل 10 يتجمعوا ويعملوا لجنة حكماء ولجنة الثورة ولجنة ام حسين والاحزاب تدخل في النص ووائل غنيم بطل لا ده عميل وماسوني احنا قربنا فعلا ندخل في مرحلة حرب الكل ضد الكل
أنا ردى كان بخصوص أن نوارة نجم مش عاجبها حاجة و كل شوية بفكرة عجيبة و الناس الى بتصدق بقت متخيلة أن المؤامرات بقت من كل حدب و صوب . و شوية وحا تسمع أن الناس مش عاجبها بعض قرارات المجلس الاعلى الى قرر أن أحمد شفيق يبقى هو رئيس الوزراء فبصورة غير مباشرة يقولو نعمل مظاهرة و نشيل احمد شفيق . الله مش الجيش هو الى معين شفيق و موافق علية يبقى الناس بتعترض على مين على متخذ القرار الا و هو الجيش بس بصورة مستترة و غير واضحة و لا مباشرة . الجيش فاهم كل حاجة و منظرة كبير جدا جدا و مفوت حاجات كتير للناس بلاش نبقى طماعين و صدقنى الجيش مش بيتعامل بصورة مباشرة الا فى حاجات معينة و بعض الامور الاخرى بيتم معالجتها بطرق اخرى استراتيجية لان دة هو المنهج العسكرى
صح بس لان التظاهر في فرنسا وغيرها من الدول بيكون محترم بمعني ايه ؟
بمعني انك بتخطر - اخطار فقط- الجهات المسئولة تقولهم انا هطلع مظاهرة اليوم الفلاني تبدا من المكان الفلاني ومسارها كذا وتنتهي في المكان الفلاني وهاتترفع فيها لافتات بتقول كذا وكذا وطبعا كل ده بيبقي له مسارات محددة بحيث لا يؤثر على الطريق العام وفي ظل حراسة من الشرطة لتأمين المظاهرة بشكل حقيقي واي خروج على ما جاء بالاخطار بيتم التعامل مع المظاهرة فورا وبالقوة ومنعها من الاستمرار لكن لان الناس هناك عندهم ديمقراطية من فترة طويلة فالكل عادة بيلتزم والشرطة بتلتزم والناستعبر عن رايها
تضمن ان مظاهرة يوم التلات تبقي بالطريقة دي ؟؟؟؟؟؟؟؟؟؟
المؤكد لا لان اللي بيدعوا ليها مش محددين اي حاجة تتعلق بيها غير انها ضد حكومة شفيق وخلاص
اذا كانت المظاهرة بكرة ولغاية دلوقت الناس اللى بيدعوا انهم ممثلي ثورة 25 يناير منقسمين حولها ولم يدعو لها الا احمد ماهر ونوارة نجم
يا سلام لو كان التصويت مضاف فيه خانة اخري مع كل اختيار هي يعمل او لا يعمل علشان نشوف كام واحد من اللى بيشتغلوا موافق على المظاهرة وكام واحد منهم معترض ونشوف بردو كام واحد ممن لا يعملوا موافق على التظاهر وكام واحد منهم معترض
بص يا باشا ببساطة شديدة حا أحاول اوضحلك وجهت نظرى . طول ما فية مظاهرات حا تلاقى فية أصابع بتلعب من تحت لتحت و كلة بيدور على مصلحتة لان الدنيا هايصة و مفيش رقابة الناس أستغلت أن الدنيا كلها فيها مظاهرات راح موظفين كتير جدا جدا فى عدة مجالات عملو اضراب عن العمل من أول سواقين الاوتوبيس لغاية موظفين البنوك و الاعلام يعنى فى كافة المجالات و على جميع المستويات و فى الهيصة دى حا يتوجد بلطجية بينشطو جدا جدا و تبدا البلطجة من أول سواقين الميكروباص على الناس لغاية بعض السؤلين الفاسدين الى عاوزين يحرقو الملفات الى ممكن تدينهم . أبسط حاجة جمع 100 فرد كدة و شوف أية الى حا يحصل ممكن تلاقى واحد عاوز اصلاح صحيح و ممكن تلاقى نشالين بيغتنمو الفرصة و أمثلة كثيرة جدا جدا أنت اكيد فهمت المغزى من كلامى
ربنا يسهل
كتر الممارسه هيأدى ان الناس تتعلم و ده الأمل
بالنسبه للحج البرادعى - الكلام بتاع سنه ده قالوا من زمان من قبل الثورة
انا لا اعرف نواره نجم ولا احمد ماهر ولا اعرف شباب 25
انا اللى اعرفه الشعب المصرى اللى قام بالثورة :)
مش معقول كل شويه ييجى واحد يطلع اللى واكله فى صفحه و الناس تجرى وراه من غير نقاش او فهم
اتفق معاك
و الحل بالتوعيه و النقاش من غير كلل و لا ملل
خبر منقول .......................
التعديل الوزاري بالحكومة المصرية يضم شخصيات معارضة
أضف هذا الموضوع على مواقع أخرى
2011/2/21 الساعة 12:45 بتوقيت مكّة المكرّمة
القاهرة 21 فبراير شباط (رويترز) - ذكرت وسائل إعلام اليوم الإثنين أن التعديل الوزاري بالحكومة المصرية يشمل عدة معارضين للرئيس السابق حسني مبارك وهي خطوة لم تكن لتخطر ببال حينكان مبارك في الحكم غير أن وزراءه سيحتفظون بحقائب مهمة.
وقالت جماعة الاخوان المسلمين اكثر الجماعات السياسية تنظيما في مصر والتي منعت من تأسيس حزب سياسي في عهد مبارك إنها لم توجه لها الدعوة لتنضم للحكومة ورفضت التعديل قائلة إنه يجب أن يرحل كل وزراء مبارك.
وشكل مبارك حكومة جديدة بعد قليل من اندلاع احتجاجات 25 يناير كانون الثاني في محاولة لتهدئة الغضب على حكمه الذي امتد 30 عاما لكن الغضب أخذ يتزايد حتى رحيله في 11 فبراير شباط.
ولم يتضمن التعديل الذي أعلن عنه في وقت متأخر من مساء امس الأحد وزراء الدفاع والخارجية والمالية والداخلية. ولم يتضح على الفور ما اذا كان سيتم إعلان تغييرات لهذه الحقائب المهمة.
ويشغل المشير محمد حسين طنطاوي منصب وزير الدفاع منذ 20 عاما. وهو رئيس المجلس الأعلى للقوات المسلحة الذي يدير البلاد.
وقال القيادي في حركة الاخوان عصام العريان "لم يعرض أحد علينا (اي مناصب) ولو عرضوا لن نقبل. نحن نطالب بما يريده الشعب بإلغاء الحكومة لأنها من النظام السابق."
وأضاف "نريد حكومة جديدة من التكنوقراط لا صلة لها بالعهد القديم."
ويضم التعديل الوزاري الأخير الى الحكومة بعض الوجوه الجديدة منهم ثلاثة من أحزاب سياسية مسجلة وهو تغيير مذهل في مصر فقبل أربعة أسابيع فقط كانت جماعات المعارضة متشرذمة وضعيفة جراء عقود من القمع.
وذكرت وسائل إعلام حكومية انه تم تعيين يحيى الجمل نائبا لرئيس الوزراء. وهو فقيه دستوري واستاذ للقانون. كما أنه قيادي في ائتلاف جماعات المعارضة الذي يتصدره الناشط محمد البرادعي ويعرف باسم الجمعية الوطنية للتغيير.
وأصبح منير فخري عبد النور سكرتير عام حزب الوفد وهو حزب ليبرالي وزيرا للسياحة.
كان الوفد قاطع الانتخابات البرلمانية التي جرت في نوفمبر تشرين الثاني لأنه قال مثل كثيرين في المعارضة إنه تم التلاعب فيها. غير أن الكثير من معارضي مبارك كانوا قالوا إن حزب الوفد كان مقربا من حكومته في كثير من الأحيان.
وذكرت صحيفة الجمهورية أن جودة عبد الخالق من حزب التجمع أصبح وزيرا للتضامن الاجتماعي.
وتم إلغاء منصب وزير الإعلام. كان وزير الإعلام السابق أنس الفقي أثار غضب المحتجين لأن الاعلام الحكومي قلل من شأنهم أو تجاهلهم في معظم ايام الثورة الشعبية في البلاد التي امتدت 18 يوما.
وقال التلفزيون الحكومي إن المحلل السياسي عمرو حمزاوي الذي كان عضوا في ما أطلق عليها لجنة الحكماء التي حاولت التوسط للوصول الى حل خلال الانتفاضة أصبح وزيرا للشباب.
وتم تعيين محمد الصاوي الذي يدير مركزا ثقافيا شعبيا بالقاهرة وزيرا للثقافة. وعينت النائبة بالبرلمان جورجيت قليني وزيرة للهجرة.
وتم اختيار احمد جمال الدين وزيرا للتعليم والتعليم العالي والدكتور عمرو عزت سلامة وزيرا للبحث العلمي.